खबरदुत 12 - चेपाङ1 ओहाङःसैको ओउःतोक्हाङः हेरोद् त तोओ राजाइ ओउः येसुकायः ङ्हाम्ओलम्कायः यात्नीस्कायः पेमालो हायःसा बोङःआकान्। 2 युहनाकोः पुः याकुब् त तोओकायः चुम्ती ओउःकायः हेरोद्इ च्युपेइ पाल्ती सात्ताक्आथै। ओउःत हायःआक्तीको याकुब्कायः “सात्आकानी” त चीःती यहुदी मान्तालम् म्रोओ खेःइतो। 3 यहुदी मान्तालम् म्रोती मुनै त झ्यान्ते हेरोद् राजाइ पत्रुस्कायःमा चुम्ताक्आथै। ओउःकायःपाय् यहुदीलम्कोः लाङ् जेःओ छ्यात्कोः दीन्हाङः चुम्ओ खेःतो। 4 चुम्आक्तीको लोने ओउः छ्यात्कोः दीन् पुत्आक्तीको पत्रुस्कायः “सबै मान्तालम्कोः मीक्हाङः सात्चाङः” त दाय्ह्ती म्हर्ती हेरोद् राजाइ ओउःकायः झ्याल्खानहाङः काती गम्आथै। काती गम्आक्तीको चार् चार्जन सीपाहीलम् तोङ्क तोङ्क जाङ्ह्ती ओउः झ्याल्खानकोः चार् खेप्कायः ल्युङ्ह्ताक्सा गम्आथास। 5 झ्याल्खानहाङः राक्ती गम्तोक् बेलाहाङः अरु येसुकायः ङ्हाम्ओलम्इ “लौ पत्रुस्कायः सात्ताक्लाम् फेताक्पाःथै” त दाय्ह्ती परमेस्वर्कायः आन तेती तोआकानी। 6 ओहाङःसैको पत्रुस्कायः सात्सा खेःओ दीन्हाङः याह्दीङ्हाङः पत्रुस्पाय् साङ्लाइ पानःओलेः नीस् सीपाहीकोः पीस्हाङः एनःती मुओ खेःतो। ओउः झ्याल्खानकोः धोकालम्हाङः ओउः चार्जन सीपाहीलम् ल्युङ्ह्ती मुइतो 7 रोमो तोकोलेः ओउः झ्याल्खानकोः कोथा आन थोङ्तोलेः स्याव्आ फेरी यात्चाक् परमेस्वर्कोः लाङ्कासै ल्होक्ओमयः पत्रुस्कःहाङः थाती वाङ्आ। थाती वाङ्आक्तीको ओउः ल्होक्ओमयःइ पत्रुस्कायः कीस्हाङः घान्ती म्हाङ्थातो ती पत्रुस्कोः साङ्ला फास्ती ग्लेःआ। 8 साङ्ला ग्लेःआक्तीको “लौ रेन्ह्तोलेः नाय् लावती जुत्ता दुप्स” त दाय्ह्ती ओउः ल्होक्ओमयःइ तोआथै। ओहाङःसैको पत्रुस् एत हायःआक्तीको “लौ नाङ्कोः क्रमःनाय् क्रमःती ङाकायः गुल्ह्ची” त दाय्ह्ती ओउः ल्होक्ओमयः झ्याल्खानकोः बाहीरताङ् स्यालःती ग्ल्युङ्ह्आ। 9 ओउःकायः गुल्ह्ती पत्रुस्पाय् पेतो म्र्यामाःत माङःखाहाङः हायःओलो लेखा ग्ल्युङ्ह्ती वाङ्आ। 10 ग्ल्युङ्ह्ती वाङ्ती ओउः नीःनीस्ज्योः ल्युङ्ह्ओ सीपाहीलम्कःहाङः च्योल्ती बाहीरहाङः मुओ फालाम्कोः दुवार्ताङ् दाह्आकाच। दाह्आक्तीको ओउः दुवार् लयःलेः फोल्ती ओउःनीस्पाय् सहर्कोः रोत्हाङः दाह्ती वाङ्आकाच। ओहाङःसैको ओउः रोत्हाङः आल्तोक्हाङः ओउः ल्होक्ओमयः वेङ्ती मीह्ती ज्याल्आ। 11 ओउः ल्होक्ओमयः ज्याल्आक्तीको पत्रुस् म्र्याती “दोङ्सीलेः परमेस्वर्इ लाङ्कामयः ल्होक्ती ङाकायः हेरोद्सै दल्ताक्आताङः बा। ओउः यहुदीलम्इ पेमालो हायःसा बोङःओकायः परमेस्वर्इ ताक्थासल” त पत्रुस् व्हक्ती म्हर्आ। 12 ओहाङःसैको ओउःतोक्हाङः मर्कस् त तोओकोः आमा मरीयम् त तोओकोः कीम्हाङः नाःतो मान्तालम् पत्रुस्कायः परमेस्वर्कःताङ् तेती तोलाङ् मुओ खेःतो। 13 ओउः कीम्हाङः दाह्ती वाङ्ती पत्रुस्पाय् दय्ह्लौहाङः धाङ्ती भीत्रसै यात्चाक् रोदा त तोओ काम् जाङ्ह्ओ मोमःचोः धोका फोल्लाङ् वाङ्आ। 14 ओउः मोमःचोःपाय् वाङ्आक्तीको पत्रुस्कोः हाव्नयः सायःती “पत्रुस् लेःआः” त तय्ह्ती आन चोङाय्ती झ्यान्ते ओउःकोः ल्हुङ् आलःआथै। ओउःकोः ल्हुङ् आलःती ब्लाङ्ह् फोल्सा म्हेःती भीत्रलेःताङ् द्यान्ह्ती “लौ पत्रुस्लेः बाहीरहाङः मुनाः रैस” त सबै हुम्ओलम्कायः तोआथासतो 15 “ओउःलेः खेःलया नाङ्इ ब्रःती सायःओतेःआः” त दाय्ह्ती ओउःमयःइ ङ्हाम्थाल। “दोङ्सी ओउःकोः हाव्नयः लेःआः सायःआलाङः बा” त दाय्ह्ती ओउः मोमःचोःइ फेरी तोथासतो “खेःल ओउःकोः रीः थाती वाङ्आ यादो” त दाय्ह्ती अरुलम् त्याङ्आकाय्। 16 ओहाङःसैको पत्रुस् बाहीरताङ् धाङ्ती मुधाङ्ओ त झ्यान्ते यात्नीस्चाक् आल्ती ब्लाङ्ह् फोल्तोक्हाङः पत्रुस्लेः मुओ च्यवःआकानी। ओउःकायः च्यवःआक्तीको ओउः भीत्रहाङः मुओ मान्तालम् आन ग्याङ्ह्आकाय्। 17 ओहाङःसैको ओउःमयः नोःसा ताक्माःत “लौ ङाकायः प्रभुइ झ्याल्खानसै दल्ताक्ती वानःआताङः” त दाय्ह्तीताङः पत्रुस्इ सबै मेस्लो स्याव्ओ कुरा ल्हाक्ती छ्यानःआथास। छ्यानःआक्तीको “द्याह् इ कुरा येसुकोः हौ याकुब्कायःमा अरु ङीकोः मान्तालम्कायःमा छ्यानःती तोनु दा” त दाय्ह्ती पत्रुस् ओउःमयःकः वेङ्ती अरु थाव्ताङ् आल्आ। 18 पत्रुस्खे अरु थाव्ताङ् आल्आ ओहाङःसैको न्याम् थोङ्आक्तीको पत्रुस्कायः “गाःताङ् आल्आ” त दाय्ह्ती ओउः सीपाहीलम् ओउःकायः बोङःती नोःकाय्आकाय्। 19 “ओउःकायः वेःताङ् ङोय्ताङ् पेतो बोङःनु दा” त दाय्ह्ती हेरोद् राजाइ हुकुम् बयःथासतो पत्रुस्कायः च्यवःसा जुगाङ् खाय्नीली। ओउः ङ्हा राक्ती गम्ओ पत्रुस्कायः च्यवःसा खाय्नीली त झ्यान्ते पत्रुस्कायः ल्युङ्ह्ती गम्ओ सीपाहीलम्कायः हेरोद् राजाइ सात्ताक्आथास। सात्ताक्आक्तीको लोन्ते हेरोद् राजा यहुदीया देस् फेती सीजारीयाहाङः याक्आ। 20 ओहाङःसैको तायर् सीदोन् त तोओ नीस् सहर्कोः मान्तालम्कः हेरोद् राजा ल्हुङ् मल्ह्तो स्याव्ओ खेःतो। हेरोद् राजा ल्हुङ् मल्ह्तो स्याव्ती झ्यान्ते “लौ ङी मान्तालम्कः हेरोद् राजा ल्हुङ् मल्ह्तो मुसा स्याव्ल। ओउःकोः देस्हाङः ङीकोः चुय्लम् जेःगालम् लेःसा खेःतो” त दाय्ह्ती ओउः सहर्नीस्कोः मान्तालम् नोःकाय्ती त्योम्काय्ती ओउःमयः हेरोद्कुस् ब्राङ्साकायः ओउःकःताङ् नोःलाङ् वाङ्आकाय्। ओउःमयः नोःलाङ् वाङ्तोक् बेलाहाङः यात्चाक् ब्लास्तस् त तोओ राजाकोः दर्बाल्कोः ताङ्ह्ओ मान्ताकुस् होम्ती “लौ हेरोद् राजाकुस् ब्राङ्साकायः ङी नोःकाय्सा दोःताक्ताङी दा” त दाय्ह्ती तोआथै। तोआक्तीको ओउः सहर्नीस्कोः मान्तालम्कायः हेरोद् राजाकुस् नोःकाय्सा दीन् गम्आथास। 21 ओहाङःसैको ओउः दीन्हाङः हेरोद्इ ओउःकोः पेओ राजाकोः नाय्लम् लावती ओउःकोः राजाकोः च्युङःओ थाव्हाङः च्युङःती हुम्ओ मान्तालम्कायः भासन् कुरा तोआथास। 22 ओउःकोः भासन् कुरा सायःआक्तीको “इपाय् मान्ताकोः हाव्नयः खेःल इस्वर्कोः हाव्नयः लेःआः बा” त दाय्ह्ती हुम्ओ मान्तालम्इ सोतो गोःआकाय्। 23 ओउःत गोःओ कुस्ब्रक्त हेरोद् राजाकायः परमेस्वर्इ “इपाय् ङाकायः लुङ्मामाःत म्रोताक्मामाःत लयःकोः नेह्रो ओर्ताक्नाःस रैस” दाय्ह्ती यात्ज्योः लाङ्कामयः ल्होक्ती ओउःकायः स्राप्ताक्आथै। स्राप्आक्तीको हेरोद् राजाकोः आङ्हाङः पेः पोक्ती सीताक्आथै। 24 ओउःतलेः हेरोद् राजाखे सीती वाय्ओ खेःतो परमेस्वर्कोः कुरा सायःओ ङ्हाम्ओ मान्तालम्खे न्हाङ्तोलेः लामःतीलेः ब्याव्आकाय् येसुकोः कुरामा न्हाङ्तोलेः थोल्ह्ती तोआकानी। 25 ओहाङःसैको बर्नाबास् त तोओमा सावुल् त तोओमा येसुकोः कुरा स्यान्ती खाय्आक्तीको ओउःनीस् मर्कस् त तोओ लात्ती वानःती यरुसालेम्ताङ् पाय्ह्आकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.