खबरदुत 11 - चेपाङ1 कर्नीलीयस्कुस् पत्रुस् साथीचोङ् मुआकाय् ओहाङःसैको “यहुदी खेःमालो जात्लम् परमेस्वर्कोः कुरा ङ्हाम्नानी” त दाय्ह्ओ यहुदीया देस्हाङः मुओ येसुकोः छ्युङ्ह्ओमयःमा अरु ङ्हाम्ओलम्इमा सायःआकानी। 2 ओउः मान्तालम्कःहाङः यात्नीस्पाय् “यहुदी खेःमालो मान्तालम् ङी यहुदी मान्तालम्लो लेखा पुन् तात्ओ चीन्ह त्याक्सा खेःतो” त दाय्ह्ती मुओ खेःतो। ओहाङःसैको पत्रुस्लम् यरुसालेम्ताङ् पाय्ह्ती वाङ्तोक्हाङः ओउःमयःइ पत्रुस्कायः जान्आकानी। 3 “नाङ्कायःपाय् ‘यहुदी जात्कोः चीन्ह त्याक्मालो मान्तालम्कुस् ल्याव्ह्काय्तीताङः जेःतेःआकान्’ त सायःआलाङःसु। इपाय् दोह् दोह् कुरालो” त जान्ती तोथातो 4 ओउःत झ्यान्ते पत्रुस्इ सबै कर्नीलीयस्कोः कुरा छ्यानःआथास। 5 “जोपा सहर्ताङ् आल्ती मुतोक्हाङः ङा परमेस्वर्कायः तोती मुङोतो माङःखाहाङः आन घोक्ओ लावःलो लेखा चार् चोङ्हाङः लाइ छुःतो लाङ्कासै क्लाःओ च्यवःआलाङः। 6 ओहाङःसैको पेतो योती भीत्रहाङः सबै साःहाङः वाह्ओमयःलम् स्याःलम् जाःलम् कुच्युरुङःलम् वाःलम् सबै इमयःकोः जात्लम् च्यवःङोतो। 7 ओउः योती मुतोक्हाङः ‘अ पत्रुस्य इमयःकोः यात्नीस्ज्योः सात्ती जेःउ दा’ त दाय्ह्ती ङाइ हाव्नयः सायःआलाङः। 8 ‘खेःल प्रभु इलो खेःओ ऐन्इ जेःसा ताक्मालो जात्लम्पाय् क्रीसीःओ जात्लम्पाय् ङाइ गलमा जवती जेःङल’ त त्याङ्ङोतो 9 ‘लौ इलो लेखा परमेस्वर्इ “पेनाः” त तोओ थोक्लम्कायःपाय् नाङ्इ “पेल” त तोसा स्याव्ल’ त फेरीलेः ओउः हाव्नयः दाय्ह्ओ सायःआलाङः। 10 सुम् पल्त इतलेः स्याव्आ ओहाङःसैको ओउः सबै वाह्ओमयःकायः त्यावःताङ् द्यानःती लनःओ खेःतो। 11 ओहाङःसैको त्यावःताङ् लनःओ कुस्ब्रक्त ङा मुओ कीम्ताङ् सुम्चाक् सीजारीयासै ल्होक्ओ मान्तालम् दाह्ती वाङ्इतो। 12 ‘लौ इमयःकुस् गतमा म्हर्माःत आल्अ दा’ त दाय्ह्ती परमेस्वर्कोः ग्वालामःइ तोआताङः। एत तोआक्तीको ङामा इ छजन साथीलम्मा ओउः सुम्चाक्कुस् सीजारीयाताङ् आल्आलाङी। आल्ती ओउः रोमी जात्कोः मान्ताकोः कीम्ताङ् दाह्ती वाङ्ती पोक्ङीतो। 13 ओहाङःसैको ओउः मान्ताइ लयः च्यवःओ कुरा सबै तोती ल्हाक्ती छ्यानःआताङी ‘लौ ङाकोः कीम्हाङः यात्ज्योः लाङ्कामयः च्यवःङोतो “लौ नाङ्इ जोपा सहर्ताङ् सीमोन् पत्रुस् त तोओकायः गोत्लाङ् ल्होक्उ दा। 14 गोत्आक्तीको नाङ्कायःमा नाङ्कोः कीम्कोः मान्तालम्कायःमा सीमोन् पत्रुस्इ रेव्झ्याङ्कायः क्युम्ह्ताक्ओसै दल्ताक्सा कुरा स्यान्ती तोतेःनै” त दाय्ह्ती ओउः लाङ्कामयःइ तोआताङः रैस’ त दाय्ह्ती ओउः रोमी मान्ताइ ङीकायः छ्यानःआताङी। 15 छ्यानःआक्तीको ङाइ स्यान्ती तोखयःतोक्हाङः ओउः कीम्हाङः हुम्ती सायःओ मान्तालम् ङी अनम्ह्लो लेखालेः ओउःमयःमा परमेस्वर्कोः ग्वालामः दोःआकाय्। 16 एत च्यवःती ‘युहनाखेइ तीःइ बाप्तीस्मा जाङ्ह्थासतो नीङ्खेकायः परमेस्वर्कोः ग्वालामःइ बाप्तीस्मा जाङ्ह्तेःनै’ त येसुइ ङ्हा तोओ कुरा गीलआलाङः। 17 एतलेः ङीइ प्रभु येसु ख्रीस्कायः ङ्हाम्तोक् बेलाहाङः दोःओ परमेस्वर्कोः ग्वालामःपाय् ओउः यहुदी खेःमालो मान्तालम्कायःमा परमेस्वर्इ दोःताक्आथास। ओउः त खेःओ ङाइ परमेस्वर्कायः त्याःती तोसा खाय्आक्ङल” त दाय्ह्ती येसुकोः छ्युङ्ह्ओमयःकायःमा अरु ङ्हाम्ओलम्कायःमा पत्रुस्इ छ्यानःती तोआथास। 18 ओहाङःसैको इ कुरा सायःआक्तीको ओउःमयःइ पत्रुस्कायः जान्ओ फेती परमेस्वर्कायः लुङ्ती तोआकानी “लौ इत हायःती अरु अरु जात्कोः मान्तालम्इ रेव्तो हायःओ फेनानी त खेःया परमेस्वर्इ ओउःमयःकायःमा गलमा द्योक्मालो जीङः दोःताक्आथास” त दाय्ह्ती परमेस्वर्कायः झाह्ती तोआकानी। 19 ओउःमयः परमेस्वर्कायः झाह्ती तोआकानी ओहाङःसैको स्तीफन्कायः सात्ओ बेलाहाङः अरु येसुकायः ङ्हाम्ओलम् रुनःधती क्रव्ती यात्नीस्खे फोनीस्या देस्ताङ् आल्आकाय्। अरुखे क्युप्रस् देस्ताङ्मा अन्तीयोक् देस्ताङ्मा आल्आकाय्। आल्तोक् बेलाहाङः ओउःमयःइ येसुकोः पेओ कुरा यहुदी जात्कोः मान्तालम्कायः झुङ्आले तोआकानी। 20 ओउःमयःपाय् यहुदी जात्कोः मान्तालम्कायः तोनीतो यात्नीस् अरु क्युप्रस् त तोओ देस्कोः मान्तालम्मा क्युरीनी देस्कोः मान्तालम्मा अन्तीयोक् सहर्ताङ् दाह्ती वाङ्ती एलेनी भासा नोःओ मान्तालम्कायःमा प्रभु येसुकोः कुरा तोआथास। 21 ओउःमयः परमेस्वर्कोः ग्वम् दोःती स्यान्ती तोतीलेः नाःतो एलेनी भासा नोःओलम्इ प्रभु येसुकोः कुरा ङ्हाम्ती जाङ्ह्आकानी। 22 ओहाङःसैको “अन्तीयोक्हाङः नाःतो एलेनी भासा नोःओलम्इ ङ्हाम्नानी” त दाय्ह्आ यरुसालेम्हाङः मुओ येसुकायः ङ्हाम्ओलम्इ सायःआकानी। ओउःत सायःआक्तीको ओउः अन्तीयोक्कोः ङ्हाम्ओ मान्तालम्कःताङ् ओउःमयःइ बर्नाबास् त तोओ ल्होक्आकानी। 23 ओहाङःसैको अन्तीयोक् सहर्ताङ् दाह्ती वाङ्आक्तीको “परमेस्वर्इ ओउःमयःकायः आन पेतो जाङ्ह्आथास” त च्यवःती बर्नाबास्पाय् आन चोङाय्ओ खेःतो “लौ इ प्रभु येसुकोः कुरा फेमाःत ल्हुङ् फुस्तीलेः ङ्हाम्नु दा” त दाय्ह्ती बर्नाबास्इ लव्ह्ती तोआथास। 24 बर्नाबास् त तोओपाय् परमेस्वर्कोः ग्वालामः आन दोःती परमेस्वर्कोः कुरा पेतो ङ्हाम्ती जाङ्ह्ओ खेःतो ओउःत झ्यान्ते ओउः अन्तीयोक् मुतोक्हाङः नाःतो अरु मान्तालम्इ येसुकोः कुरा ङ्हाम्ती सायःआकानी। 25 नाःतो मान्तालम् ङ्हाम्आकानी त झ्यान्ते “ओउःमयःकायः सावुल्इमा पेतो स्यान्पाःथास” त दाय्ह्ती बर्नाबास्पाय् तार्सुस् सहर्ताङ् आल्ती सावुल्कायः बोङःआकान्। 26 सावुल्कायः बोङःती क्रुस्आक्तीको ओउःकायः बर्नाबास्इ अन्तीयोक्ताङ् वानःआथै। ओहाङः ओउः नीस्चाक्इ अन्तीयोक्कोः ङ्हाम्ओलम्कुस् यात् बर्सच्युक्कायः याक्ती नाःतो मान्ताकायः स्यान्आथास। फेरी इ अन्तीयोक् सहर्हाङः अरु थाव्कोः ङ्हासैलेः येसु ख्रीस्कायः ङ्हाम्ओमयःकायः “ख्रीस्त्यान्” त मय्ङ्आथास। 27 ओहाङःसैको यात्नीस्चाक् लोने स्याव्सा कुरा छ्यानःओ येसुकायः ङ्हाम्ओलम् यरुसालेम्सै आल्ती अन्तीयोक्ताङ् दाह्आकाय्। 28 ओउःमयःकःहाङः यात्चाक् आगाबस् त तोओ चीङ्ती “लौ इ ल्हाव्ह्दैबाङ्हाङः लोन्ह्ते जोक्तो अनीकाल् वाङ्लेःनाः” त दाय्ह्ती परमेस्वर्कोः ग्वालामःइ चीःताक्ओ कुरा तोआथास। ओउः अनीकाल् लोन्ह्ते क्लाव्दीयस् राजाकोः मुतोक्हाङः स्याव्आ। 29 ओहाङःसैको इ कुरा सायःती ओउः अन्तीयोक्कोः येसुकायः ङ्हाम्ओमयःइ “लौ लःलयःकोः नाःजम्च्युक् यरुसालेम्हाङः मुओ ङ्हाम्ओमयःकायः पैसा ल्होक्पाः” त दाय्ह्ती होम्काय्आकाय्। 30 ओउःत होम्काय्आक्तीको पैसा हुम्ती वानःआक्तीको बर्नाबास्कायःमा सावुल्कायःमा ल्हाआथाच। ओउः पैसापाय् ओउःनीस्इ यरुसालेम्ताङ् लात्ती आल्आकाच। ओहाङःसैको दाह्आक्तीको ओहाङःकोः येसुकायः ङ्हाम्ओलम्कोः थालवःपालम्कायः ओउः पैसा बयःआकाचु। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.