खबरदुत 10 - चेपाङ1 ओहाङःसैको सीजारीया त तोओ सहर्हाङः यात्चाक् रोमी सीपाहीलम्कोः कप्दन् खेःतो। ओउःकोः मय्ङ् कर्नीलीयस् लेःआः। 2 ओउः मान्ताइ लयःकोः कीम्कोः चोःलम् याङ्लम्कुस्इ परमेस्वर्कायः झाह्ती लुङ्ती तोनीतो ओउःपाय् आन पेओ मान्ता खेःतो। ह्र्यात् मान्तालम्कायःमा ओउःइ आन बयःउतो दीन्का दीन् ओउःइ परमेस्वर्कायः आन झाह्ती तोओ खेःतो। 3-4 ओहाङःसैको यात्दीन्हाङः न्हीदीङ्कोः सुम् बजेहाङः ओउःइ माङःखाहाङः परमेस्वर्कोः लाङ्कासै ल्होक्ओमयः थाओ पेतोलेः च्यवःआकान्। ओहाङःसैको ओउः ल्होक्ओमयः ओउःकःताङ् वाङ्ती “अ कर्नीलीयस्य” त दाय्ह्ती गोत्उतो ती कर्नीलीयस्पाय् ओउःकः रैती योती “दोह्लो प्रभु” त दाय्ह्ती त्याङ्आ। “लौ नाङ्कोः तेओ कुरा सायःतीमा नाङ्कोः पेओ जाङ्ह्ओ काम्लम् च्यवःतीमा नाङ्कुस् परमेस्वर् आन म्रोलेःनाः। 5 द्याह् यात्चाक् सीमोन् पत्रुस् त तोओ गोत्साकायः नाङ्कोः मान्तालम्कोः यात्नीस्चाक् जोपा सहर्ताङः ल्होक्उ दा। 6 ओउः वानःसा खेःओ पत्रुस्पाय् द्युम्मालो तीःकोः चीनःसै मुओ सीमोन् सर्की त तोओकोः कीम्हाङः मुनाः” त दाय्ह्ती ओउः ल्होक्ओमयःइ तोआथै। 7 एत तोआक्तीको ओउः परमेस्वर्कोः ल्होक्ओमयः पाय्ह्आ। ओउः ल्होक्ओमयः पाय्ह्आक्तीको कर्नीलीयस् त तोओइ नीस्चाक् काम् जाङ्ह्ओ नोकरीनीस्मा यात्चाक् लयःकोः काम् जाङ्ह्ओ परमेस्वर्कायः झाह्ओ सीपाहीकायःमा गोत्आकान्। 8 गोत्आक्तीको सबै ओउः ल्होक्ओमयःइ तोओ कुरा स्यान्ती तोती ओउः सुम्चाक्कायः जोपा सहर्ताङ् ल्होक्आथास। 9 ल्होक्आक्तीको उनम्ह्कोः स्याङ्ह्लो ओउःमयःखे जोपाताङ् दाह्खेःतोक् बेलाहाङः पत्रुस्खे न्हीदीङ्हाङः कीम्कोः त्यावःअ आङ्गन्ताङ् परमेस्वर्कायः तोलाङ् लन्ह्आ। 10 ओहाङः न्याम् दोपारे स्याव्ओहाङः लन्ह्ती मुती पत्रुस् योङ्क्राय्ओ खेःतो। ओहाङःसैको ओउःकायः जेःगा खाङ्ती मुमुबालेहाङः ओउःइ माङःखा च्यवःआकान्। 11 ओहाङःसै ओउः माङःखा च्यवःतोक्हाङः फेल्बाङ् ओङ्ह्ती ओउःसै लाइ चार् चोङ्हाङः छुःती गम्ओ लावःलो लेखा साःताङ् क्लाःओ च्यवःआकान्। 12 ओउः क्लाःओ लावःहाङः सबै साःहाङः वाह्ओमयःमा वाःलम्मा मुओ खेःतो। 13 एत च्यवःती “लौ पत्रुस्य इमयःकोः सात्ती जेःउ दा” त दाय्ह्तीताङः पत्रुस्इ हाव्नयः सायःआकान्। 14 इत सायःआक्तीको “खेःल प्रभु इलो खेःओ ऐन्इ जेःसा ताक्मालो जात्लम्पाय् ङाइ गलमा जवती झ्यान्ते जेःङल” त दाय्ह्ती त्याङ्आ। 15 “दोह्खेलो थोक्लम् परमेस्वर्इ ‘पेनाः’ त तोलेःनाः ओउःकायः नाङ्इ ‘पेल’ त तोसा स्याव्ल” त दाय्ह्ती फेरीलेः दाय्ह्आ। 16 सुम् पल्तकायः उत स्याव्आ ओहाङःसैको सुम् पल्त स्याव्आक्ती ओउः लावःहाङः मुओ थोक्लम्कायः सबै त्यावःताङ् द्यान्ह्ती लनःओ खेःतो। 17 ओहाङःसैको एत माङःखा च्यवःआक्तीको “इपाय् दोह् ताप्नाः” त पत्रुस् ल्हुङ्हाङः म्हर्तो ओउःत म्हर्ओ कुस्ब्रक्त कर्नीलीयस्इ ल्होक्ओ सुम्चाक् सीमोन्कोः कीम्ताङ् दाह्आकाय्। 18 दाह्आक्तीको “लौ इहाङः सीमोन् पत्रुस् मुनाःया मुलया” त दाय्ह्तीताङः गोःती व्हत्आकानी। 19 ओउःमयः गोःतोक् बेलाहाङः पत्रुस्पाय् माङःखाकोः कुरा ल्हुङ्हाङः लाय्ती मुओ खेःतो। “लौ सुम्चाक्इ नाङ्कायः बोङःती दाह्ती मुनै। 20 चीङ्ती ग्ल्युङ्ह्आक्तीको ओउःमयःकुस् गतमा म्हर्माःत आल्अ। ओउः मान्तालम् ङाइलेः ल्होक्आलाङःसु बा” त दाय्ह्ती परमेस्वर्कोः ग्वालामःइ तोआथै। 21 एत तोओ सायःआक्तीको पत्रुस् ग्ल्युङ्ह्ती ओउःमयःकायः क्रुस्ती “नीङ्इ क्रुस्सा बोङःओजा ङा लेःआः बा। दोह् हायःलाङ् वाङ्तेःआकाय्” त दाय्ह्ती पत्रुस्इ व्हत्आथास। 22 “यात्चाक् सीपाहीकोः कप्दन् कर्नीलीयस् त तोओइ ल्होक्आताङी। ओउःपाय् आन पेओ परमेस्वर्कायः झाक्ती तोओ मान्ता लेःआः। इतलेः सबै सीजारीयाकोः यहुदीलम्इ चीःती कर्नीलीयस्कायः लुङ्ती तोनानी। ओहाङःसै ओउःकःताङ् यात्चाक् परमेस्वर्कोः ल्होक्ओमयः थाती ‘लौ नाङ्इ जोपाहाङः मुओ सीमोन् पत्रुस्कायः गोत्लाङ् ल्होक्उ दा। गोत्ती वानःआक्तीको ओउःकोः कुरा पेतोलेः सायःनु’ त दाय्ह्ती ओउः ल्होक्ओमयःइ तोताङःआथै। ओउःत झ्यान्ते ङीइ नाङ्कायः गोत्लाङ् दाह्आलाङी” त दाय्ह्ती ओउः सुम्चाक्इ पत्रुस्कायः छ्यानःआथै। 23 एत छ्यानःओ सायःआक्तीको “लौ उया इ कीम्हाङः ङाकुस् मुआक्न” त पत्रुस्इ दाय्ह्ती तोआथास। तोआक्तीको ओउःमयः पत्रुस्कुस् जेःती दोह्आक्तीको एनःआकाय्। ओहाङःसैको न्याम् थोङ्आ। न्याम् थोङ्आक्तीको पत्रुस् च्योक्ती ओउः सुम्चाक्कुस् आल्आकाय्। ओउःमयःकुस् यात्नीस्चाक् जोपा सहर्कोः येसुकायः ङ्हाम्ओलम्मा आल्आकाय्। 24 ओहाङःसैको आल्दा आल्दा उनम्ह्कोः स्याङ्ह्लोहाङः सीजारीया सहर्ताङ् दाह्आकाय्। ओउःमयः दाह्तोक् बेलाहाङः पत्रुस् त्याक्साकायः कर्नीलीयस्पाय् ल्युङ्ह्ती मुओ खेःतो। ओउःइ लयःकोः मान्तालम्मा साथीलम्कायःमा गोत्ती सबै कर्नीलीयस्कोः कीम्ताङ् हुम्ती पत्रुस् रोम्ती त्याक्साकायः मुआकाय्। 25 ओहाङःसैको पत्रुस् दाह्ती कीम्हाङः पोक्खेःतोक् बेलाहाङः कर्नीलीयस् ओउःकःताङ् वाङ्ती द्यव्ताकायःलो लेखा पत्रुस्कायः बाःती स्यवथातो 26 एत पत्रुस्इ च्यवःती “छ्यो चीङ्अ। ङामा मान्ता लेःआः ङ बा” त ओउःकायः दाय्ह्ती तोआकान्। 27 इत तोतोक्हाङः कोथाहाङः पोक्ती पत्रुस्इ नाःतो हुम्ओ मान्तालम् च्यवःआकान्। 28 ओउः हुम्ओ मान्तालम् च्यवःती “लौ ङी यहुदी जात्लम्पाय् अरु यहुदी खेःमालो जात्लम्कुस् ल्याव्ह्काय्सामा स्याव्ल ओउःमयःकोः कीम्ताङ् पोक्सामा स्याव्ल त जवनाङःसु। एत नीङ्इ चीःतेःनानी बा। ङामा एत जवङोतो ‘एत हायःसा स्याव्ल नाङ्कुस् सबै मान्तालम् घार्लेःनै सुकायःमा “ब्लाय्क्सीःओ” त नोःलाम्’ त ङाकायः परमेस्वर्इ स्यान्आताङः। 29 ओउःत खेःओ नाङ्कःताङ् गोत्ओहाङः ङा गतमा म्हर्माःत वाङ्आलाङः। इतलेः ङा दाह्ती वाङ्आलाङः। लौ द्याह् तोनाङ्स दा ङाकायः इहाङः दोह् हायःलाङ् वानःतेःआनाङ्स” त ओउः हुम्ओ मान्तालम्कायः पत्रुस् दाय्ह्ती तोआथास। 30 “लौ क्याम्नम्हाङः न्हीदीङ्कोः सुम् बजे स्याव्तोक्हाङः ङाइ परमेस्वर्कायः तोती मुङोतो रोमो तोकोलेः ङाइ भाम्तो थोङ्ओ नाय् लावओ मान्ता ङाकःहाङः द्याङ्तो चीङ्ओ च्यवःआलाङः। 31 ओउःत च्यवःतोक्हाङः ‘अ कर्नीलीयस्य नाङ्इ परमेस्वर्कायः झाह्ती तोओ कुरा सायःतीमा नाङ्इ ह्र्यात्कायः बयःओ काम् च्यवःतीमा परमेस्वर् म्रोतीलेः मुनाः। 32 लौ नाङ्इ सीमोन् पत्रुस् त तोओ गोत्ती वानःसाकायः जोपा सहर्ताङ् ल्होक्उ दा। ओउःपाय् सीमोन् त तोओ सर्कीकोः कीम्हाङः द्युम्मालो तीः द्याङ्तो द्याह् मुलेःनाः’ त दाय्ह्तीपाय् ओउः मान्ताइ तोआताङः। 33 एत तोआक्तीको ङाइ रेन्ह्तोलेः नाङ्कायः गोत्साकायः ल्होक्ङोतो नाङ् द्याह् भालातेःआः वाङ्तेःआ बा। लौ द्याह् प्रभुइ नाङ्कायः तोसा बयःओ कुरा सायःसाकायः ङी सबै परमेस्वर्कोः मीक्हाङः हुम्तीलेः मुनाङी” त दाय्ह्ती कर्नीलीयस्इ तोआथै। 34 ओउःत तोआक्तीको “दोङ्सीलेः परमेस्वर्इ सुकायःमा घाराङ्लेः राप्नाःथास। इतलेः ङाइ द्याह् पेतोलेः चीःनाङः। 35 सुसुइलो परमेस्वर्कायः झाह्ती तोमाचानी ओउःकोः काम् पेतो जाङ्ह्माचानी ओउःकायःलेः परमेस्वर्इ म्रोतीलेः सायःनौ बा दोह् जात् खेःयाकायःमा ओउःकायःलेः म्रोतीलेः सायःनौ। 36 लौ परमेस्वर्इ ङी इस्राएली मान्तालम्कायः तोओ कुरापाय् नीङ्इ चीःतेःनानी यादो। सबै जात्कोः प्रभु येसु ख्रीस् त तोओलेः परमेस्वर्कोः पेओ ल्हुङ् धोमाय्ताक्ओ नोःराय् थोल्ह्ती तोलाङ् ल्होक्ओ खेःतो। 37 युहना त तोओइ गालीलहाङः बाप्तीस्मा स्यान्ओहाङःसै इ इस्राएल् देस्हाङः स्याव्ओ ताङ्ह्ओ कुरामा नीङ्इ चीःतेःनानी यादो। 38 ओउः बेलाहाङः नासरेत् गाव्सै वाङ्ओ येसु त तोओकायः परमेस्वर्इ लयःकोः ग्वालामःमा ग्वम्मा दोःताक्आथै। परमेस्वर्कोः ग्वालामः दोःआक्तीको येसु आन पेतो हायःती इःताङ् उःताङ् आल्ती जीक्ओ मान्तालम्मा लान्इ ङायःओ मान्तालम्कायःमा स्याक्ताक्ओ काम् जाङ्ह्ओ खेःतो। 39 ओउःइ यरुसालेम् सहर्हाङः यहुदीया देस्हाङः जाङ्ह्ओ काम्लम् ङीइ लयःकोः मीक्इलेः च्यवःती दोङ्सीलेः तोनेःनाङ्स। ओहाङःकोः मान्तालम्इ येसुकायः चुम्ती क्ल्याय्ओ सीङःहाङः योकोःती सात्थातो 40 ओउः सात्ओ दीन्कोः चीत्सैलोहाङः ओउःकायः परमेस्वर्इ सीओसै च्योक्ताक्आथै। येसु सेलः स्याव्आक्तीको ओउःकायःपाय् परमेस्वर्इ मान्ताकःताङ् वानःती छ्यानःआथास। 41 सबै मान्तालम्कायः छ्यानःओ खेःल सुसुकायः परमेस्वर्इ ङ्हा छ्युङ्ह्ओ खेःतो ओउःकायःलेः ह छ्यानःआताङी। फेरी ओउः येसु च्योक्ती छ्यानःओ बेलाहाङःपाय् ङीइ ओउःकुस् जेःगा जेःआलाङःसु तुङ्गा तुङ्माआलाङःसु। 42 ओहाङःसैको ‘लौ ङाकोः पेओ कुरा सबैलम्कायः तोनु दा’ त ङीकायः येसुइ तोआताङी। ‘ओउः येसुपाय् सबै सीओ मान्ताकायःमा सेलः मुओ मान्ताकायःमा सु पेओ खेःतो सु पेमालो खेःतो त कुरा तय्छनःती सायःसाकायःमा तात्साकायःमा इ येसुकायःलेः परमेस्वर्इ छ्युङ्ह्आथै’ त ङीइ तोसा खेःनाङी। 43 ‘सुसुलो येसुकोः कुरा ङ्हाम्चानी ओउः मान्ताकोः रेव्ओ काम्लम् परमेस्वर्इ येसुकोः मय्ङ्इलेः क्युम्ह्ताक्ती वाय्नौ’ त उय्ह्लेहाङःसै परमेस्वर्कोः कुरा छ्यानःओ मान्तालम्इ लेखआकानी बा” त दाय्ह्ती हुम्ओ मान्तालम्कायः पत्रुस्इ तोआथास। 44 पत्रुस् इतलेः स्यान्ती तोतोबालेहाङः ओउः सायःती मुओ मान्तालम् परमेस्वर्कोः ग्वालामः दोःआकाय्। 45-46 परमेस्वर्कोः ग्वालामः दोःआक्तीको ओउःमयः थे थे भासा नोःती परमेस्वर्कायः लुङ्ती तोती मुआकाय्। एत च्यवःती पत्रुस्कुस् वाङ्ओ यहुदी जात्कोः येसुकायः ङ्हाम्ओलम् आन ग्याङ्ह्आकाय् “इ यहुदी जात् खेःमालो मान्तालम्कायःमा परमेस्वर्कोः ग्वालामः दोःआनाः रैस” त ग्याङ्ह्ती नोःकाय्आकाय्। 47 “लौ ङी यहुदी जात्लो लेखालेः इ रोमी जात्कोः मान्तालम्मा परमेस्वर्कोः ग्वालामः दोःनै। द्याह् इमयःकायःमा तीःइ बाप्तीस्मा जाङ्ह्सा स्याव्नाः माःर। बाप्तीस्मा बयःओ त्याःसा स्याव्ल रैस” त पत्रुस् दाय्ह्ती दाय्ह्आ। 48 “लौ कर्नीलीयस्कायःमा ओउःकोः मान्तालम्कायःमा येसुकोः मय्ङ् पेह्ती बाप्तीस्मा जाङ्ह्पाःथास” त दाय्ह्ती पत्रुस्इ तोआकान्। एत तोआक्तीको ओउः मान्तालम्इ बाप्तीस्मा त्याक्आकानी। बाप्तीस्मा त्याक्आक्तीको “लौ ङीकुस् चार्पास् दीन्च्युक्कायः मुन” त दाय्ह्ती झ्यान्ते पत्रुस्मा ओउःकोः साथीलम्मा कर्नीलीयस्कुस् चार्पास् दीन्कायः मुआकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.