२ तीमोथी 4 - चेपाङ1 सीओलम्कायःमा स्याक्ती मुओलम्कायःमा सबै मान्तालम्कायः तय्छनःती योलाङ् वाङ्सा येसु ख्रीस् लेःआः बा। ओउःकोः मीक्हाङःमा परमेस्वर्कोः मीक्हाङःमा ङाइ द्याह् इ कुरा दोङ्ह्ती तोनेःनाङ् बा। येसु ख्रीस्मा ओउःकोः राजीमा वाङ्नाः त झ्यान्ते 2 ओउःकोः नोःराय् गलकायःमा थोल्ह्ती तोउ दा। क्रोःओ बेलाहाङःमा क्रोःमालो बेलाहाङःमा ओउः कुरापाय् होम्ताक्साकायःमा गानाक्साकायःमा लुङ्साकायःमा काङ्ती स्यान्ती तोचाक्उ ती। 3 लोने वाङ्सा बेलाहाङः मान्तालम्इ दोङ् कुरापाय् सायःसा ग्यामालो स्याव्नै। ओउःमयःइ लयः झाक्ओ कुरा स्यान्ओलम् आन वानःनानी दोह् हायःती दाय्ह्सा ओउःमयःइ लयः मोह्हाय्ओ जाङ्ह्सा बोङःनानी। 4 ओहाङःसैको वानःआक्तीको ओउःमयःइ दोङ् कुरा फेती उय्ह्लेकोः आह्रे भाङःती नोःओ ल्हाक्राय्लम् सायःनानी। 5 ओउःमयःखेइ ओउःत हायःनानी नाङ्खेइ काम् व्हाय्तोलेः जाङ्ह्उ। लीह्सीःओ गोरःती ख्रीस्कोः पेओ समचार् थोल्ह्ती तोमाउ परमेस्वर्कोः काम्पाय् सबै पेतो जाङ्ह्माउ। 6 नाङ्खेकायः ङाइ एत तोलेःनाङः। ङाखेपाय् द्याह् लयःकोः ज्युआङ् भोगरती क्लेह्सा खेःनाङः ल्हाव्ह्दैबाङ्सै लन्ह्सा बेला दाह्खेःआलाङः। 7 ङ्हाम्सापाय् ग्रमःत मुआलाङः ङाकोः काम् दप्ती खाय्आलाङः। 8 द्याह् ङाकोः काम् जाङ्ह्झ्याङ्कोः मुलेःनाः। ओउः जाङ्ह्झ्याङ्कोः ओउः पेओ तय्छनःती योओ प्रभुइ लयः वाङ्सा खेःओ दीन्हाङः बयःनाःताङः। दोःआक्तीको ङापाय् परमेस्वर्कोः मीक्हाङः जय्कुमःत स्याव्नाङः। फेरी ङा ह दोःसा खेःङल ओउःकोः वाङ्सा खेःओकायः झाह्ती योओलम्मा सबै ङालो लेखालेः दोःनै। 9 लौ ङाकःताङ् रेन्ह्तोलेः वाङ्सा बोङःउ दा। 10 देमस्इ तेन्छ्याङ्कोः ल्हाव्ह्दैबाङ्कोः कुरा झाक्ती झ्यान्ते ङाकायः फेआताङः ओउःपाय् थेसालोनीका सहर्ताङ् आल्ओआः। क्रेसेन्स्खे गालाती जील्लाताङ् आल्आ तीतस्खे आने दाल्मातीया जील्लाताङ् आल्आ। 11 ङाकुस् आने लुका ह मुलेःनाः। नाङ् वाङ्ओहाङः मर्कस्मा गोत्ती वानःउ ओउःइपाय् ङाकोः काम् पेतो लव्ह्ती जाङ्ह्सा चीःनौ। 12 त्युखीकुस्कायः ङाइ एफेसस् सहर्ताङ् ल्होक्आलाङः। 13 त्रोआस् सहर्हाङः ङाकोः क्रमःनाय् कार्पस्कःहाङः फेआलाङः। नाङ् इहाङः पाय्ह्ती वाङ्तोक्हाङः ओउः नाय्मा लात्ती वानःअ ङाकोः कीताप्लम्मा कागत्लम्लेःमा लात्ती वानःअ। 14 सीकन्दर् त तोओ ताम्ब तुप्ओ मान्ताइ ङाकायः आन पेमालो जाङ्ह्आताङः ओउःइ पेमालो जाङ्ह्झ्याङ्कायः प्रभुइलेः न्युम्ह्ताक्नाःथै। 15 नाङ्इमा ओउःकायः धय्ती योउ ओउःइपाय् ङाइ थोल्ह्ती तोओ कुराकायः आन त्याःती तोआकान्। 16 ङाकोः मुत्ध स्याव्तोक्हाङः सुइमा ङाकायः लव्ह्ताङःल सबै ङाकायः फेती क्रव्आकाय्। एत हायःसा थेङा ओउःमयःकायः प्रभुइ गाल्तुम्ती नोःलाम्। 17 ओउःमयःखे सबै क्रव्इतो प्रभुखेइलेः ङाकुस् मुती ग्वम् बयःआताङः ओउःत झ्यान्ते ओहाङः मुओ यहुदी खेःमालोलम्कायः ङाइ परमेस्वर्कोः पेओ समचार् जुदालेः थोल्ह्ती तोसा खाय्ओ खेःतो। ओहाङःसैको ङा सीओसै दल्ताक्ओआः ङ। 18 माः रैस ओउःसैमा प्रभुइ दल्ताक्आताङः। ङाकायः सबै रेव्ओसै दल्ती प्रभुइ लयःकोः लाङ्काकोः राजीहाङः लोने पेतोलेः वानःनाःताङः। ओउःकायः गलकायःमा ताङ्ह्लेःनाः त मनःती तोपानानी। माः ओउःतलेः स्याव्पाः दै। 19 प्रीस्कीला अक्वीलानीस् पय्क्चाःकायःमा ओनेसीफोरस्कोः कीम्हाङः मुओलम्कायःमा नमस्ते बयःचाक्उसु। 20 एरास्तस् कोरीन्थ सहर्हाङः मुआ। त्रोफीमस् जीक्ती मुती झ्यान्ते ओउःकायः ङाइ मीलेतस् सहर्हाङः एङ्ती मुसाकायः फेआलाङः। 21 लौ य्हुदा महीनाकोः ङ्हासै इहाङः दाह्ती वाङ्सा बोङःउ ती। युबुलस्मा प्रुदेन्स्मा लीनस्मा क्लाव्दीयामा सबै ङ्हाम्ओ पुःचोङ् हौचोङ्लम्इमा नाङ्कायः नमस्ते ल्होक्तेःनाः। 22 लौ प्रभुपाय् नाङ्कोः वाहीमःकुस् मुपाः ओउःइ सबैकायः योनःती योती पेतोलेः बयःतेःपै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.