२ तीमोथी 3 - चेपाङ1 ल्हाव्ह्दैबाङ्कोः द्युम्खेःओ दीन्लम्हाङः आन पेमालो लीह्सीःओ दीन् वाङ्लेःनाः ओउःत नाङ्इ चीःसा खेःतो। 2 ओउः बेलाहाङःपाय् मान्तालम् लःलयःकायः राप्नीङ्इसी पैसा आन क्युसा बोङःनानी। लःलयःखेकायः “ताङ्ह्ओचाक् लेःआः ङ” त दाय्ह्ती लयःकायः नेह्रो ओर्ताक्नाःइसी अरुखेकायः पेमालो नोःती ओउःमयःइ लयःकोः आमा आपाइ तोओ कुरापाय् सायःसा जुगाङ् ग्याइली दोह्मा म्हर्माःत सबै त्याक्नानी। परमेस्वर्कोः कुराकः ग्यामामाःत 3 अरु सुकायःमा राप्मामाःत योनःती योमामाःत अरुकायः माःती गाल्तुम्ती तोनानी अरुलम्कायः आन खह्र्तोलेः नोःनै। लयः मोह्हाय्ओ ह जाङ्ह्ती पेओ काम् जाङ्ह्साकायः जुगाङ् झाक्इली। 4 ओउःमयः गलमा ङ्हाम्सीःमालो मुती दोह् काम् खेःयामा लयः ङाःती जाङ्ह्सा ग्यानै। परमेस्वर्कोः काम्खे जाङ्ह्सा झाक्माःत लयः मोह्हाय्ओ लुङ्ह्जेःओ काम्लम् ह जाङ्ह्सा झाक्नै। 5 अरुकोः मीक्हाङः परमेस्वर्कोः काम् जाङ्ह्ओलो लेखा मुगार्इतो ओउःकोः ग्वम्लेः जुगाङ् चीःबाय्नीली। ओउः खाल्कोः मान्तालम्कुस् ब्राङ्तेःचाः क्लेत्उसु। 6-7 ओउःमयःइ मान्ताकोः कीम् कीम्ताङ् वाह्ती व्हाय्मालो मोह्हाय्ओ ल्हुङ् नाःओ मोमःचोःलम्कायः थ्योन्ह्ती उन्चुलावःनाःथास। ओउः मोमःचोःलम्पाय् लयःकोः रेव्ओ ल्हुङ्कोः मोह्हाय्ओलम् झाक्तीलेः जाङ्ह्ती नया नया कुराखे स्यान्सा बोङःनानी। ओउःमयःइ गलकायःमा स्यान्नाःइसी दोङ् कुराखेपाय् गलमा चीःसा खाय्नीली। 8 उय्ह्लेकोः यानस् याम्ब्रस् त तोओनीस् मोसाकोः काम्पाय् आन त्याःसा बोङःचुतो ओउःनीस्लो लेखालेः 9 ओउः पेमालो मान्तालम्इपाय् कीम् कीम्हाङः वाह्ती दोङ् कुरा स्यान्ओकायः त्याःसा बोङःनानी। ओउःमयःकोः ल्हुङ् जुगाङ् रेव्तो त झ्यान्ते परमेस्वर्कायः ङ्हाम्सामा ओउःकःताङ् वाङ्सामा खाय्नीली। ओउःत हायःसा बोङःनीतो यानस् याम्ब्रस्कायःलो लेखालेः अरुइ “ओउःमयः आह्रे तोओलम् ह” त चीःती झ्यान्ते ओउः मान्तालम्इ द्याह् नाःतोकायः पेमालो थ्योन्ह्सा खाय्नीली। 10-11 ओउःमयःखेइ एतलेः हायःनानी नाङ्खे ङाकायः गत स्यान्ओ गत वाह्ओ दोह्कायः बोङःओ त कनःती चीःतेःआची। ङाकायःपाय् गुच्युक् ङ्हाम्ओ गुच्युक् गोरःओमा राप्ओमा गुच्युक् लीह्सीःओ च्यवःओ तमा चीःतेःआची। अन्तीयोक् इकोनीयुम् लीस्त्र त तोओ सहर्लम्हाङः ङाकायःपाय् मान्तालम्इ लीह्सीःओ बयःताङःतो ओउः लीह्सीःओ गोरःओसै प्रभुइ ङाकायः दल्ताक्आताङः। 12 माः रैस सुसु येसु ख्रीस्कुस् ब्राङ्ती पेतो हायःती वाह्सा बोङःनानी ओउःकायःलेः अरुइ लीह्सीःओ बयःनाःथास। 13 ओउःमयःखेइ लीह्सीःओ च्यवःनानी रेव्तो माःती जाङ्ह्ओलम्खेइ पेमालो हायःधार्ना न्हाङ्तोलेः रेव्तो स्याव्नै। ओउःमयःइमा अरुकायः तोपाल्नानी अरुलम्इमा ओउःमयःकायः तोपाल्नाःथास। 14 ओउःमयःखे न्हाङ्तोलेः रेव्तो स्याव्नै नाङ्खेपाय् नाङ्कायः ङ्हा स्यान्ओ ङ्हा ङ्हाम्ओ दोङ् कुरालेः ङ्हाम्ती मुअ। दोह् हायःती दाय्ह्सा नाङ्कायः स्यान्ओलम्पाय् “दोङ् कुरा स्यान्ओलम् खेःइतो” त तय्ह्मातेःनौ बा। 15 फेरी हौ मुतोक्हाङःसै परमेस्वर्कोः आखरःकोः कुरालेः नाङ्इ चीःमातेःआकान्। ओउः कुरा चीःतीपाय् नाङ्इ येसु ख्रीस्कायः ङ्हाम्ती रेव्ओसै दल्सा खाय्तेःनौ। 16 ओउः आखरःपाय् सबै परमेस्वर्कःसै दोःओ लेःआः बा ओउःत खेःओ ओउः आखरःकोः कुरापाय् दोङ् कुरा स्यान्साकायः पेलेःनाः। फेरी रेव्तो काम् जाङ्ह्ओलम्कायः गानाक्ती तोसाकायःमा “मान्ता गत हायःती पेतो वाह्सा खाय्नौ” त स्यान्साकायःमा ओउः आखरःपाय् स्याव्लेःनाः। 17 ओहाङःसैको स्यान्आक्तीको परमेस्वर्कोः काम् जाङ्ह्सा मान्ता पेतो व्हाय्तोलेः स्याव्ती झ्यान्ते सबै पेओ काम्लम् जाङ्ह्सा र्ययःती मुनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.