२ तीमोथी 2 - चेपाङ1 लौ उया नाङ्पाय् ङाकोः चोःलो लेखा स्याव्तेःनाः येसु ख्रीस्इ नाङ्कायः योनःती योती बयःओ ग्वम् दोःती ल्हुङ् क्रोङ्तोलेः मुअ। 2 आने नाःतो अरु मान्तालम्कुस्इ ङाइ स्यान्ओ कुरा सायःतेःनीतो ओउः कुरापाय् अरु ल्हुङ् नीङ्ओ मान्तालम्कायः स्यान्उसु ओहाङःसैको ओउःमयःइपाय् अरु अरुकायः लोने स्यान्सा खाय्नानी। 3-4 नाङ् येसु ख्रीस्कोः सीपाही मान्तालो लेखा मुतेःनाः। पेओ सीपाहीपाय् लीह्सीःओ गोरःसा म्ह्याङ्लेःनाः। मीन्ह्काय्लाङ् आल्ओ बेलाहाङः ओउःइ लयःकोः सेनापतीकायः म्रोताक्सा बोङःनौ अरु सीपाही खेःमालो काम्इ लयःकायः र्योन्ताक्ती गम्ताक्सल। नाङ्मा ओउःतलेः मुअ। 5 फेरी सुसुइ इनाम्कायः खेलनाः ओउःइ खेलओकोः नीयम्कायः ग्यासा खेःतो ओउःपाय् ग्याल त खेःया इनाम्मा दोःल। 6 फेरी राङ्हाङः काम् हारीनःती जाङ्ह्ओ मान्ताइलेः ओउः राङ्कोः सायः अरुसै ङ्हा त्याक्सा खेःतो। 7 लौ इ ङाइ तोओ कुरापाय् ल्हुङ्हाङः लाय्उ दा ओहाङःसैको प्रभुइ ओउः कुराकोः माने पेतो चीःताक्तेःनाः। 8 येसु ख्रीस्पाय् सीओसै उह्ती च्योक्ओ लेःआः ओउःपाय् राजा दावुद्कोः प्लोमःदानेलेः खेःनाः। ओउःकोः कुरा म्हेःमाःत ल्हुङ्हाङः सेती गम्उ दा। ओउः कुरापाय् ङाइ थोल्ह्ती तोओ पेओ समचार् लेःआः। 9 ओउः समचार् थोल्ह्ती तोसा थेङा ङाइ द्याह् लीह्सीःओ गोरःसा खेःनाङः। माः रैस पेमालो काम् जाङ्ह्ओ मान्तालो लेखालेः ङा झ्याल्खानहाङः साङ्लाइ पानःओलेः मुनाङः। ङाखे पानःओलेः मुलेःनाङः परमेस्वर्कोः नोःराय्खेपाय् सुइमा पानःसा खाय्नीली थुनसा खाय्नीली। 10 एत हायःओ स्याव्ती ङाइ परमेस्वर्इ छीङ्ह्ओ मान्तालम्कायः लीह्सीःओ गोरःलेःनाङः दोह् हायःती दाय्ह्सा ओउःमयःइमा येसु ख्रीस्इ जाङ्ह्ओ आन पेओ गलमा द्योक्मालो जीङः दोःसा खाय्नानी। 11 इपाय् द्याह् दोङ् ङ्हाम्सीःओ कुरा लेःआः। ङी येसुकुस् सीनाःतय्ही त खेःया लोने ओउःकुस् उह्ती च्योक्नाःतय्ही। 12 ङीइ लीह्सीःओ गोरःनाःतय्ही त खेःया ओउःकुस्लेः हुकुम् बयःसा मान्ता स्याव्नाःतय्ही। ओउःकायः ङी “ओउःकोः मान्तापाय् खेःतय्हीली” त दाय्ह्ती क्लेत्ती तोनाःतय्ही त खेःया ओउःइलेः ङीकायःमा क्लेत्नाःतय्ही। 13 ङीखेइ ओउःकायः ङ्हाम्ओ फेनाःतय्ह्नी त खेःया ओउःखे ङ्हाम्सीःओ मुलेःनाः गलमा ल्हुङ् क्लोय्क्ल। 14 ओउः कुरापाय् नाङ्इ स्यान्ओलम्कायः कोदीङःती तोउसु। “लौ स्यान्ओ कुराकायः गलमा काय्काय्तेःचनै” त दाय्ह्ती ओउःमयःकायः परमेस्वर्कोः मीक्हाङः गानाक्ती तोमाउसु। काय्काय्धार्नालेः सायःओलम्कायः ब्रःताक्नाःथास वाय्ताक्नाःथास पेओपाय् दोह्मा जाङ्ह्नीली। 15 ओहाङःसैको ओउःकोः काम् जाङ्ह्ओ बेलाहाङः परमेस्वर्कायः म्रोताक्सा बोङःती दोङ् कुरालेः पेतो स्यान्उ दा ओउःत झ्यान्ते ओउःकोः मीक्हाङः नाङ् रास्सामा घ्युम्सामा परतेःल। 16 ल्हाव्ह्दैबाङ्कोः आह्रे भाङःती नोःओ कुरालम्सै वेङ्ती मुस ओउःत आह्रे नोःओइलेः मान्तालम्कायः परमेस्वर्कःसै न्हाङ्तोलेः लोक्तो लोक्तो स्याव्ताक्नाःथास। 17 छाह्धै आल्ओ चालो लेखा इ पेमालो कुराइ सबैकायः पेमालो स्याव्ताक्नौ। ओउःत नोःओपाय् य्हुमेनीयस्मा फीलेतस्मा ओउः नीस्चाक् आन नोःझुङ्नाःच। 18 दोङ् कुरा फेती “लौ मान्ताकोः उह्ती च्योक्ओ बेलापाय् द्याह् द्युम्जेःआ” त दाय्ह्ती यात्नीस्चाक्कोः ङ्हाम्ओ ब्रःताक्नानी। 19 यात्नीस्चाक्कायः ब्रःताक्ओ लेःआः बुरु दोह् दोह् परमेस्वर्इलेः लयः तोती गम्आकान् ओउःपाय् ग्रमःत मुओ तोस्बाङ्लो लेखा गलमा वाय्सा खाय्मालो लेःआः। ओउः बाङ्हाङः “लयःकोः मान्तालम्कायः प्रभुइ तय्ह्नाःथास” त दाय्ह्ओमा लेखती मुनाः। फेरी “सुसुइलो येसुकोः मीक्हाङः ओउःकायः ‘प्रभुय’ त दाय्ह्नै ओउःमयःइ रेव्ओ काम् जाङ्ह्ओकायः फेनानी” त दाय्ह्ओमा लेखती मुनाः। 20 ताङ्ह्ओ कीम्हाङः नाःतो खाल्कोः माल्ताल्लम् मुनाः। यात्नीस्खे सुन् चान्दीकोः जाङ्ह्ओलेः मुनाः अरुखे साः सीङःकोः जाङ्ह्ओ लेःआः कोय्खे पेओ काम्कायः जाङ्ह्ओलेः अरुखे क्रीसीःओ काम्कायः जाङ्ह्ओलेः। 21 ओउः पेमालो खाल्लम् ताती वाय्आकानी त खेःया सबै पेओलेः मुनाः। ओउःतलेः मान्ताइ रेव्ओ काम् फेती वाय्आक्तीको छय्ङ्तो स्याव्ती प्रभुकायः खाले पेओ काम् म्ह्याङ्ती जाङ्ह्सा खाय्नानी। 22 लौ उया लाव्मयःकोः लयः लुङ्ह्जेःती मोह्हाय्ओ ल्हुङ् फेती परमेस्वर्कायः दोङ् ल्हुङ्इ तेती तोओलम्कुस् ब्राङ्ती नीङ्ओमा ङ्हाम्ओ राप्ओ धोमाय्ओ ल्हुङ् दोःसाकायः ग्याती बोङःउ दा। 23 आह्रे व्हाय्मालो कुरा नोःओलम्कुस् वाह्तेःचाः ओउःत हायःओसै काय्काय्ताक्काय्सा वाङ्नाः इत नाङ्इ चीःतेःनौ। 24 प्रभुकोः काम् जाङ्ह्ओ मान्तापाय् अरुकुस् काय्काय्सा स्याव्ल। ओउःइ खह्र्तो तोमाःत अरुकायः काङ्तोलेः तोसामा पेतो स्यान्सा खेःतो। 25 ओउः परमेस्वर्कोः कुराकः ग्यामालोलम्कायःमा काङ्तोलेः तोती दोङ् कुरा चीःताक्सामा खेःतो दोह् हायःती दाय्ह्सा ओउःमयःकायः परमेस्वर्इ लोने ल्हुङ् द्यान्ह्सा ताक्नाःथास यादो। ओहाङःसै दोङ् कुरा चीःती 26 ओउःमयःइ व्हाय्ओ ल्हुङ् दोःती ओउःमयःकायः ङ्हा थ्योन्ह्ती रेव्ताक्ओ सैतान्सै दल्सा खाय्नानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.