२ थेसलोनिकि 3 - चेपाङ1 लौ उया पुःचोङ् हौचोङ्य प्रभु येसुकोः पेओ नोःराय् नीङ्कःहाङः रेन्ह्तोलेः छालःओ खेःतो ओहाङःसै थोल्ह्ती तोधार्नालेः नीङ्इ पेतो ङ्हाम्तेःआकानी। ओउःत झ्यान्ते परमेस्वर्कः तेती तोतोक्हाङः “ङीकःहाङःलो लेखालेः चार् दोवाताङ् प्रभुकोः पेओ नोःराय् रेन्ह्तोलेः पेतो स्याव्पाः” त दाय्ह्तीमा ङीकोः काम् पेतो स्याव्साकायः तेन दा। 2 फेरी “रेव्तो जाङ्ह्ओलम्सै दल्ताक्पाःथास” तमा दाय्ह्ती ङीकायः परमेस्वर्कः तेती तोमानु। दोह् हायःती दाय्ह्सा ओउः पेओ नोःराय्कायः यात्नीस्चाक्इ ङ्हाम्सा ग्यामालो मुनै ओउःमयःइ ङीकायः रेव्तो जाङ्ह्सा बोङःनानी। 3 ओउःमयःखेइ रेव्तो हायःसा बोङःनानी ङीकोः प्रभुखेपाय् ङ्हाम्सीःओ लेःआः। ओउःइ नीङ्कायः ग्वम् बयःती रेव्तो जाङ्ह्सा ताक्तेःइली। 4 लौ ङीइ तोओ कुरा नीङ्इ “पेतोलेः ग्याती सायःती झ्यान्ते जाङ्ह्धै मुनै” त प्रभुइ म्हर्ताक्आताङी। 5 परमेस्वर्कोः राप्ओ ल्हुङ्मा ख्रीस्कोः गोरःती वाह्ओ ल्हुङ्मा प्रभुइ दोःताक्तेःपै। 6 लौ पुःचोङ् हौचोङ्य ओउः लीङ्हायःती मुओ ङ्हाम्ओलम्कुस् “वाह्तेःचनै” त दाय्ह्ती प्रभु येसु ख्रीस्कोः मय्ङ् पेह्ती तोनेःनाङ्सु। ओउःमयःखेइ ङीइ छ्यानःओ कुरापाय् सायःमाःत वाह्नै। 7 गतलो ङीइ हायःआलाङःसु ओउःतलेः नीङ्इमा तेःती हायःसा खेःतो ओउःत नीङ्खेइ पेतोलेः चीःतेःनानी। नीङ्कःहाङः मुतोक्हाङः ङी अरुकायः काम् नाओ खेःङीली। 8 सुकोःमा जेःगा तुङ्गा सोह्लेः जेःङुसुलु। नीङ्कायः दुख बयःसा ग्यामाःत झ्यान्ते ङीइ न्हीदीङ् याह्दीङ्हाङः लयःकायः केलःती काम् जाङ्ह्आलाङःइसी। 9 नीङ्कःसै जेःगा तुङ्गा सोह् त्याक्सा स्याव्सापाय् स्याव्ओ खेःतो ङीइ नीङ्कायः पेतो स्यान्साकायः ओउःतलेः हायःआलाङःसु। 10 ओउः बेलाहाङः “सुसुइ काम् जाङ्ह्सा ग्यामालो मुनै ओउःकायः जेःगा तुङ्गा बयःलाम्” त दाय्ह्ती तोनेःआलाङ्स। 11 नीङ्कःहाङः “काम् जाङ्ह्सा ग्यामालो मान्तालम् मुनै” त दाय्ह्ओ सायःआलाङःसु ओउःत झ्यान्ते ङीइ एतलेः तोनेःनाङ्स। ओउःमयःइ लयः झेसा ग्यामाःत अरुकायः काम् जाङ्ह्सा त्याःताङःनानी। 12 ओउःमयःखेकायः ङीइ प्रभु येसु ख्रीस्कोः मय्ङ् पेह्ती “लयःकायः काम् केलःती जाङ्ह्ती झेती मुपनै” त दाय्ह्ती तोनाङःसु बा। 13 नीङ्खे पुःचोङ् हौचोङ्य पेओ काम् जाङ्ह्साकायः थङअःतेःचनै। 14 इ ङीइ लेखती तोओ कुरा यात्चाक्इ सायःसा ग्याइली त खेःया ओउःकायः रास्ताक्साकायः ओउःकुस् वाह्लाम्। 15 ओउःकुस् वाह्सापाय् वाह्तेःचनै ओउःकायः बीरोत्लो लेखा योतेःचानी। रेव्ओ काम् जाङ्ह्ओ हौलो लेखालेः ओउःकायः गानाक्ती तोनु। 16 लौ ङीकोः ल्हुङ् धोमाय्ताक्सा प्रभुइ नीङ्कायः गलकायःमा दोह् दोह् खेःयाकायःमा ल्हुङ् धोमाय्ताक्तेःपनै ओउःपाय् नीङ् सबैकुस् ब्राङ्तोलेः मुपै। 17 द्याह् ङा पावुल् त तोओइ लयःकोः क्रुत्इ लेखती नमस्ते ल्होक्नेःनाङ्स। इतलेः “ङाकोः चेती लेःआः” त छ्यानःसाकायः सबै चेती दप्ती लेखनाङः। 18 लौ ङीकोः प्रभु येसु ख्रीस्इ नीङ् सबैकायः योनःती योतेःपनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.