२ थेसलोनिकि 2 - चेपाङ1 लौ पुःचोङ् हौचोङ्य ङीकोः प्रभु येसु ख्रीस् वाङ्सा कुरामा ङी ओउःकःताङ् हुम्ती वानःसा कुरामा द्याह् तोसा खेःतो। 2 प्रभु वाङ्सा खेःओ दीन् “द्याह्पाय् दाह्ओ लेःआः” त तोओ सायःतेःआकानी त खेःया “लौ ल्हुङ् रुःमामाःत ब्रःमामाःत ल्हुङ् धोमाय्तो मुन” त तेती तोनेःनाङ्स। “ओउः कुरापाय् पावुल्इ परमेस्वर्कोः ग्वालामःसै दोःती स्यान्आताङी चेतीहाङः लेखआताङी” त दाय्ह्ती यात्नीस्चाक्इ माःती तोनानी यादो। 3 ओउःपाय् खेःल बा। ओउःत माःती तोओ कुरातेः सायःतेःचानी। परमेस्वर्कोः बीरोत्लम् ओउःकः काय्काय्लाङ् चीङ्धाङ्माःच्युक्हाङःमा ओउः लोने वाय्तो स्याव्सा जुगाङ् रेव्ओचाक् छ्यानःधाङ्माःच्युक्हाङःमा ङीकोः प्रभु वाङ्सा दीन्पाय् पुत्तो स्याव्धाङ्ल। 4 फेरी ओउः रेव्ओचाक्पाय् लयःकायः ताङ्ह्ताक्ती सबै मान्ताइ मानओ द्यव्तालम्मा थोक्लम्मा “ओउःमयःसै ङापाय् ताङ्ह्तोलेः मुनाङः” त दाय्ह्ती ओउः थोक्लम् मानसा ताक्उलु लयःकायःलेः “ङापाय् परमेस्वर् लेःआः ङ” त तोती परमेस्वर्कोः मन्दीर्हाङः च्युङःनाः। 5 ओउः कुरा नीङ्इ म्हेःतेःधाङ्तेःनीली माःर ङा नीङ्कुस् ङ्हा मुतोक्हाङः ओउःत तोझुङ्नेःनाङ्सतो। 6 क्रोःओ बेलाहाङः ओउः रेव्ओचाक्पाय् छ्यानःसालेः दोःनाः। द्याह्पाय् दोह्लाङःइ ओउःकायः थालाङ् वाङ्सा त्याःनाःथै ओउःपाय् दोह्लो त नीङ्इ चीःतेःनानी। 7 ओउः रेव्तो जाङ्ह्ओपाय् थालाङ् वाङ्सा दोःमाःत तेन्छ्याङ्मा अरुइ चीःमाःत रेव्तो जाङ्ह्लेःनौ। ओउःकायः थासा त्याःओ चाक्कायः आलःधाङ्माच्युक्हाङः ओउःतलेः रेव्तो जाङ्ह्लेःनौ 8 ओहाङःसैको ओउः आल्सा बेलाहाङःपाय् ओउः रेव्ओ चाक्पाय् छ्यानःतीलेः थानाः। थाआक्तीको प्रभु येसुइ आन पेतो आङ्ग थाङ्ग त ग्वम्कुस् वाङ्ती ओउः रेव्ओचाक्कायः यातै सास्हाङः सात्ती वाय्नाःथै। 9 ङ्हापाय् ओउः रेव्ओचाक् वाङ्तोक्हाङः ओउःपाय् सैतान्कोः ग्वम् दोःती ओउःइ आन ग्याङ्ह्सीःओ काम्लम् माःती जाङ्ह्नौ। 10 ओउःइमा आन पेमालो हायःती ओउः सीती वाय्सा खेःओ मान्तालम्कायः आन तोपाल्नाःथास। ओउः मान्तालम्इ दोङ् पेओ कुरा झाक्ती सायःमाःत झ्यान्ते दल्तो स्याव्इली सीती वाय्लेःनै। 11 दोङ् कुरा ओउःमयः झाक्इली त खेःया परमेस्वर्इ माःओ कुराकायः ङ्हाम्ओ ल्हुङ् बयःनाःथास। 12 ओउःत झ्यान्ते ओउः दोङ् कुरा ङ्हाम्माःत रेव्ओ काम् जाङ्ह्सा झाक्ओलम्इपाय् लोने न्युम्ह्नानी। 13 लौ नीङ् प्रभुइ राप्ओ पुःचोङ् हौचोङ्य ङीइ परमेस्वर्कायः गलमा “च्युता” त तोसा खेःनाङी दोह् हायःती दाय्ह्सा ओउःइ लयःकोः ग्वालामःइ छय्ङ्ताक्साकायः नीङ् दोङ् कुरा ङ्हाम्ओलम्कायः “ओउःमयः दल्तो स्याव्पै” त दाय्ह्ती ङ्हाहाङःसै छ्युङ्ह्तेःआकाय्। 14 ओउःत हायःसाकायः ङीइ ओउःकोः पेओ समचार् थोल्ह्ती तोओहाङः परमेस्वर्इ गोत्तेःआकाय्। ओहाङःसै नीङ् प्रभु येसुकुस् ताङ्ह्तोलेः स्याव्सा दोःतेःनै। 15 ओउःत चीःती पुःचोङ् हौचोङ्य ग्रमःत मुती ङीइ तोओमा लेखओ स्यान्राय्मा ल्हुङ्हाङः सेती गम्नु दा। 16 ङीकोः परमेस्वर् आपाइ लयःइलेः ङीकायः राप्ती गलकायःमा ल्हुङ् धोमाय्ताक्तोमा पेतो आसतोमा स्याव्ताक्आतय्ही। 17 ओउःइमा ङीकोः प्रभु येसु ख्रीस्इमा नीङ्कायः ल्हुङ् धोमाय्ताक्ती सबै पेओ काम्लम् जाङ्ह्सा खाय्ताक्तेःपै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.