२ थेसलोनिकि 1 - चेपाङ1 इ चेती ङा पावुल्मा सीलास्मा तीमोथीमा ङी सुम्चाक्इ नीङ् थेसालोनीकाहाङः मुओलम्कायः लेखती ल्होक्नेःनाङ्स। नीङ्पाय् ङीकोः परमेस्वर् आपाकोःमा प्रभु येसु ख्रीस्कोःमा लेःतेःइ। 2 ओउः परमेस्वर् आपाइमा प्रभु येसु ख्रीस्इमा नीङ्कायः योनःती योती ल्हुङ् धोमाय्ताक्तेःपनै। 3 लौ पुःचोङ् हौचोङ्य नीङ्इ ङ्हाम्सापाय् न्हाङ्तोलेःतेः ङ्हाम्तेःनानी। लयःमयःकायः राप्सापाय् न्हाङ्तोलेःतेः राप्काय्तेःनै ओउःत झ्यान्ते ङीइ परमेस्वर्कायः गलमा “च्युता” त तोसा खेःनाङी। 4 फेरी लीह्सीःओ गोरःओ बेलाहाङः नीङ् पेतोलेः ङ्हाम्ती ग्रमःत मुतेःनै ओउःत खेःओ अरु ङ्हाम्ओलम्कःहाङः नीङ्कायः ताङ्ह्ताक्ती तोनाङःसु। 5 नीङ् लीह्सीःओ गोरःओलम् मुतेःनै ओउःत खेःओ नीङ्पाय् परमेस्वर्कोः राजीहाङः मुसा स्याव्नाः। एतलेः “परमेस्वर्इ पेतो हायःनौ” त सबै मान्तालम्इ चीःसा खाय्नानी। 6 परमेस्वर्इ पेतो हायःती ओउः नीङ्कायः लीह्सीःओ बयःओलम्खेकायः लीह्सीःओ बयःती न्युम्ह्ताक्नाःथास। 7 नीङ् लीह्सीःओ गोरःओलम्खेकायः प्रभु येसु थाती वाङ्सा खेःओ दीन्हाङः ओउःइ ङीकुस् ल्हुङ् द्युमःतोलेः स्याव्ताक्नाःतय्ही। ओउःनम् दीन्हाङः प्रभु येसुपाय् लयःकोः ताङ्ह्ओ ग्वम् नाःओ लाङ्कासै ल्होक्ओमयःकुस् लाङ्कासै थाती वाङ्नै। 8 ओहाङःसै ओउः परमेस्वर्कायः चीःमालोमा प्रभु येसुकोः पेओ समचार् सायःसा ग्यामालो मान्तालम्कायःमा ओउःमयःकायः ल्युङ्ओ म्हेःइ जेःती न्युम्ह्ताक्नाःथास। 9 ओउः पेमालोलम् गलकायःमा न्युम्ह्तीलेः मुनै। प्रभुपाय् आङ्ग थाङ्ग त पेओमा ताङ्ह्ओमा स्याव्ती थातोक्हाङः ओउःमयः ओउःकुस् मुसा जुगाङ् दोःइली। 10 ओउः दीन्हाङःपाय् सबै प्रभुकोः मान्तालम्इमा ओउः प्रभुकायः मानती तोनाःथै सबै ङ्हाम्ओलम्इमा प्रभुकायः ग्याङ्ह्ती ताङ्ह्ताक्ती तोनाःथै। नीङ्इमा ङीइ तोओ कुरा ङ्हाम्ती झ्यान्ते ओउःकायः ताङ्ह्ताक्तेःनानी। 11 ओउःत खेःओ “गतलो पेतो वाह्साकायः ओउःइ गोत्तेःआकाय् ओउःतलेः वाह्पनै” त दाय्ह्ती नीङ्कायः परमेस्वर्कः गलमा तेती तोमानाङःसु। “लौ परमेस्वर्य ओउःमयः पेतो झाक्ओ कुरालम्मा ङ्हाम्ती जाङ्ह्सा पेओ काम्लम्मा नाङ्कोः ग्वम् दोःती दप्तोलेः जाङ्ह्पानानी” त दाय्ह्तीमा नीङ्कायः ङाइ परमेस्वर्कः तेती तोनेःनाङ्स। 12 ओहाङःसै ङीकोः प्रभु येसुकोः मय्ङ्मा नीङ्इ ताङ्ह्ताक्तेःनानी नीङ्मा येसु ख्रीस्कुस् ताङ्ह्तोलेः स्याव्तेःनै। ङीकोः परमेस्वर्मा प्रभु येसु ख्रीस्इमा नीङ्कायः योनःती योती ओउःतलेः स्याव्ताक्पाःचु। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.