२ पत्रुस् 3 - चेपाङ1 लौ ङाइ राप्ओ मान्तालम्य इ चेतीकुस् ङाइ नीस्ज्योःलेः लेखनेःआलाङ्स। “ओउःमयः ङ्हा चीःओ दोङ् छय्ङ्ओ कुरापाय् ल्हुङ्हाङः गीलताक्सा खेःतो” त दाय्ह्ती ओउःनीस् चेती लेखनेःआलाङ्स। 2 परमेस्वर्कोः कुरा छ्यानःती तोओमयःइ उय्ह्लेहाङः नोःओ कुरामा ङीकायः दल्ताक्सा प्रभुसै दोःओ ओउःइ छ्युङ्ह्ओ ल्होक्ओमयःकायः बयःओ हुकुम्मा नीङ्इ गीलसा खेःतो। 3 ल्हाव्ह्दैबाङ्कोः द्युम्खेःओ दीन्लम्हाङः लयःकोः ल्हुङ्कोः रेव्तो मोह्हाय्ओ काम् जाङ्ह्ओलम् थानै त नीङ्इ ङ्हालेः चीःसा खेःतो। ओउः मान्तालम्इ ङ्हाम्ओलम्कायः हेला क्लाःती 4 “लौ ख्रीस्पाय् गल वाङ्चै ओउःइ ‘लौ ङा लोने वाङ्नाङः’ त तोती गम्ओआः ओउःपाय् वाङ्ल बा। ङीकोः आपालम् सबै सीओलेः मुनै ल्हाव्ह्दैबाङ् जाङ्ह्ओहाङःसै दोह्मा नया दाङ्धाङ्ल” त दाय्ह्ती ओउःमयःइ तोनानी। 5 ओउःत तोसापाय् तोनानी दोङ् कुरा चीःमालो लेखालेः तोनानी दोह् हायःती दाय्ह्सा परमेस्वर्कोः नोःराय्इ उय्ह्लेहाङः फेल्बाङ्मा जाङ्ह्आकान् साःमा तीःसै फाःती गम्ओ खेःतो एत ओउःमयःइ झाक्तीलेः म्हेःआकानी। ओहाङःसैको तीःइपाय् घोदुङ् यादुङ् जाङ्ह्ओलेः खेःतो। 6 ओउः तीः दुम्ती लय्ङ्ती वाङ्ओ बेलाहाङः ल्हाव्ह्दैबाङ्कायःमा ओहाङः मुओ मान्तालम्कायःमा उय्ह्लेहाङः ह्र्योङःओ खेःतो। 7 परमेस्वर्कोः नोःराय्इमा इ तेन्छ्याङ् मुओ फेल्बाङ्मा ल्हाव्ह्दैबाङ्मा लोनेः म्हेःइ झम्ह्ती माक्साकायः गम्लेःनौ। ओउः वाङ्सा खेःओ तय्छनःती योती पेमालोलम् न्युम्ह्ताक्सा दीन्च्युक्कायः ह फेल्बाङ्मा ल्हाव्ह्दैबाङ्मा मुलेःनाः। 8 लौ ङाइ राप्ओ मान्तालम्य इ यात्ज्याङ् कुरापाय् म्हेःलाम्। प्रभुकोः मीक्हाङः यात् दीन्पाय् यात् हजार् साल्च्युक्लो लेखालेः मुनाः ओउःकायःपाय् यातैज्योः लेःआः। 9 ओउःइ तोती गम्ओ कुरापाय् “जाङ्ह्साकायः प्रभुइ बाय्तोलेः जाङ्ह्नौ” त यात् नीस्चाक् म्हर्नै ओउःपाय् दोङ् कुरा खेःल बा। मान्तालम्कायः “सबै रेव्तो जाङ्ह्ओ काम्लम् फेती ह्र्योक्ती वाय्ओसै दल्पै” त दाय्ह्ती प्रभुइ गुह्र्माःत ल्युङ्ह्ती मुनाः। 10 प्रभुइ ल्युङ्ह्सापाय् ल्युङ्ह्लेःनौ ओउःकोः वाङ्सा खेःओ दीन्पाय् कुःसा बोङःओ मान्तालो लेखालेः वाङ्नाः। ओउः दीन् “गल वाङ्नाः” त अरुइ चीःआक्नीली। ओउः दीन्हाङःलेः फेल्बाङ्पाय् ताङ्ह्ओ मुक्ओ कुस्ब्रक्त म्हीत्ती वाय्लेःनाः। ओउःहाङः सबै थोक्लम्कायः म्हेःइ माक्नौ। ल्हाव्ह्दैबाङ्मा ओहाङः मुओ सबै थोक्लम् म्हीत्तोलेः वाय्तो स्याव्नाः। 11 सबै एतलेः म्हीत्तोलेः स्याव्नाः त खेःया नीङ् गत वाह्सा खेःतो दाय्ह्सा। नीङ्तो ल्हुङ्इ परमेस्वर्कोः काम् जुगाङ् पेतो जाङ्ह्ती 12 परमेस्वर्कोः दीन्कायः “लौ रेन्ह्तोलेः वाङ्पाः” त दाय्ह्ती ल्युङ्ह्ती मुसा खेःतो। ओउः दीन्हाङः फेल्बाङ्कायः म्हेःइ झम्ह्ती सबै ओउःहाङः मुओ थोक्लम् युताक्ती वाय्नौ। 13 ओउःखे वाय्सापाय् वाय्लेःनाः ङीपाय् परमेस्वर्इ तोती गम्ओ नया फेल्बाङ् ल्हाव्ह्दैबाङ्खेकायः ल्युङ्ह्ती मुनाःतय्ही ओहाङः नीङ्ओलम् ह मुनै पेमालोपाय् दोह्मा वाङ्ल। 14 लौ उया ङाइ राप्ओलम्य दोह्मा रेव्ओ हायःमाःत नीङ्ओ ओजायः जय्कुमःओ ल्हुङ् स्याव्ती परमेस्वर्कुस् ल्हुङ् ब्राङ्ती मुसा त्युस्तीलेः बोङःनु दा। 15 नीङ्कायःपाय् “लौ इमयः सबै पेतो दल्तो स्याव्पै” त दाय्ह्ती ङीकोः प्रभु ल्युङ्ह्ती मुनाः रेन्ह्तोलेः वाङ्धाङ्ल। एतलेः ङीइ राप्ओ हौ पावुल्इ परमेस्वर्इ चीःताक्ओ कुरालेः लेखतेःआकाय्। 16 ओउः कुरापाय् पावुल्इ सबै चेतीहाङः एतलेः लेखनौ। यात्नीस् ओउःइ लेखओ कुरापाय् चीःसाकायः चाक्तो लेःआः। ओउः कुरापाय् व्हाय्मालोमा पेमालो मान्तालम्इ ङोय्ह्तोलेः छ्यानःनानी अरु आखरःहाङः लेखओ कुरामा एतलेः ङोय्ह्तोलेः छ्यानःनानी ओउःत हायःती ओउःमयः लयःकायःलेः वाय्तोलेः स्याव्ताक्नाःइसी। 17 लौ उया ङाइ राप्ओलम्य इ कुरा चीःतेःनानी ओउःत झ्यान्ते धय्ती मुन। ओहाङःसैको रेव्ओ काम् जाङ्ह्ओलम्इ पेमालो कुरा स्यान्ती नाङ्कायः ब्रःताक्सामा दोङ् कुरा ग्रमःतलेः ङ्हाम्ओकायः फेताक्सामा खाय्तेःइली। 18 लौ ङीकायः दल्ताक्ओ प्रभु येसु ख्रीस्इ नीङ्कायः न्हाङ्तोलेः बयःती ओउःकोः ल्हुङ्तुक् चीःताक्लेःपै। देङीमा गलकायःमा ङीकोः प्रभु जुगाङ् ताङ्ह्तोलेः स्याव्पाः। लौ ओउःतलेः स्याव्पाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.