२ पत्रुस् 2 - चेपाङ1 ङ्हाहाङः इस्राएल्कोः मान्तालम्कःहाङः यात्नीस्चाक्इ “लौ ङीपाय् परमेस्वर्कोः कुरा छ्यानःती तोओलम् खेःनाङी” त दाय्ह्ती माःती तोआकानी। नीङ्कःहाङःमा ओउः खाल्कोः माःती तोओलम्पाय् अरु चीःताक्माःत वाङ्नै। ओउः माःती तोओलम्इ अरु मान्ताकायः पेमालो वाय्तो स्याव्ताक्सा कुरा स्यान्ती ओउःमयःकायः ल्हाङ्ती वानःओ प्रभुकायः फेनानी ओउःत झ्यान्ते ओउःमयः रेन्ह्तोलेः न्युम्ह्ती वाय्ओलेः स्याव्नै। 2 न्युम्ह्ती वाय्ओ स्याव्सापाय् स्याव्लेःनै ओउःमयः रेव्ओ काम्लम् जाङ्ह्ती वाह्ओकायः नाःतो अरु मान्तालम् तेःती गुल्ह्ती वाह्नै। एत च्यवःती परमेस्वर्कोः दोङ् पेओ वाह्सा ल्याम्कायः “पेमालो” त दाय्ह्ती अरु मान्तालम्इ तोनानी। 3 ओउःमयःकोः ल्हुङ् तोल्तो स्याव्ती इ माःती स्यान्ओलम्इ लयःकोः ल्हुङ्सै दोःओ कुरा स्यान्ती नीङ्कोः पैसा आह्रेलेः त्याक्ती जेःनानी। लौ ओउःमयःकायः ज्याङःतोहाङःसैलेः परमेस्वर्इ तय्छनःती योआथास ओउःमयः जुगाङ् न्युम्ह्तोलेः वाय्ओसै सुमा दल्इली बा। 4 उय्ह्लेहाङः ओउः लाङ्काकोः ल्होक्ओमयः पेमालो जाङ्ह्तोक्हाङः ओउःमयःकायः परमेस्वर्इ यातैज्योः वेताक्ती गम्मामाःत नरकहाङः ताती ल्होक्आथास। ल्होक्आक्तीको ओउःमयःकायः च्याक्ओहाङः थुनती तय्छनःती योसामा न्युम्ह्ताक्सा दीन्कायः गम्आथास। 5 ओहाङःसै उय्ह्लेहाङः ओउः ल्हाव्ह्दैबाङ्कोः पेमालो मान्तालम्कायःमा परमेस्वर्इ सुमा वेताक्ती गम्मामाःत लय्ङ्ती वाङ्ओ तीःइ ज्युप्ती वाय्ताक्आथास। पेमालोलम्खेकायः वाय्ताक्थासतो ओउः पेओ कुरा थोल्ह्ती तोओ नोआह्खेकायःमा अरु ओउःकोः सात् लयःमयःचोङ्कायःमा सबै आत् मान्ताकायः ह परमेस्वर्इ तीःसै दल्ताक्आकान्। 6 सोदोम् गोमोरा त तोओ नीस् सहर्कायःमा परमेस्वर्इ म्हेःइ झम्ह्ताक्ती वाय्आकान् “ङाकोः कुरा ग्यामालोलम् एत ताङ्ह्तोलेः स्याव्नै” त अरु मान्तालम्कायः छ्यानःसाकायः ओउःइ सोदोम् गोमोराकायः म्हेःइ झम्ह्ताक्आकान्। 7-8 ओउः पेओ मान्ता लोत् त तोओकायःमा परमेस्वर्इ सोदोम्सै दल्ताक्आथै। लोत्पाय् ओउः सहर्नीस्कोः मान्तालम्इ जुगाङ् क्रीसीःओ रेव्तो हायःओ दीन्का दीन् च्यवःती झ्यान्ते आन ल्हुङ् लीह्ती मुओ। 9 इ सबैलेः प्रभुइ व्हाय्तोलेः जाङ्ह्नौ। ओहाङःसै नोआह्कायःमा लोत्कायःमा परमेस्वर्इ दल्ताक्आकान् त खेःया अरु पेओ मान्तालम्खेकायःमा ओउःइ न्हाङ्तोलेः लीह्सीःओसै दल्ताक्नाःथास। फेरी रेव्ओ काम् जाङ्ह्ओलम्खेकायः लोने वाङ्सा तय्छनःती योसा दीन्कायः न्युम्ह्ती गम्ओलेः मुनै। 10 परमेस्वर्इ तोओ कुरा सायःसा ग्यामाःत लयःकोः ल्हुङ्कोः रेव्तो मोह्हाय्ओ जाङ्ह्ओलम्कायः ओउःइ न्हाङ्तोलेः न्युम्ह्ताक्नाःथास। ओउः पेमालोलम् लयः ङाःती सुकःमा एङःइली त्यावःअ लाङ्काहाङः मुओ ताङ्ह्ओलम्कायःमा एङःमामाःत हेला क्लाःनानी। 11 माःती स्यान्ओलम्सै परमेस्वर्कोः लाङ्कासै ल्होक्ओमयःपाय् न्हाङ्तोलेः ताङ्ह्तोलेः मुनै न्हाङ्तोलेः ग्वम् नाःओ लेःआः इ। ओउःतलेः मुनै प्रभुकोः मीक्हाङः ओउः लाङ्कामयःखेइ ओउः पेमालोलम्कायः गाल्तुम्ओ बेलाहाङः हेला क्लाःती नोःनीली। 12 ओउः मान्तालम्खेइ जुगाङ् चीःमाःत हेला क्लाःनानी। ओउःमयःपाय् चीःमालो चुम्ती सात्ती वाय्सा खेःओ जाःलो लेखालेः रेव्तो हायःनानी जाःलो लेखालेःमा सात्ती वाय्तोलेः स्याव्नै। 13 ओउःमयःइ अरुकायः लीह्सीःओ बयःनीतो ओउःत झ्यान्ते अरुलम्इ ओउःमयःकायःमा लीह्सीःओ बयःनाःथास। दोह्मा रेव्ओ काम्लम् न्हीदीङ्कोः थोङ्ओ बेलाहाङः ओउःमयःइ लयः ल्हुङ्कोः मोह्हाय्ओ जाङ्ह्सा झाक्नै। नीङ्कुस्इ भोस् जेःतोक् बेलाहाङः ओउःमयःइ लयःकोः पेमालो काम्लम् चोङाय्तोलेः जाङ्ह्ती अरुलम्कायः नेह् क्लाःती गाल्ताक्नानी। 14 ओउःमयःकोः मीक् लुःर्यव् मीक् ह। रेव्तो जाङ्ह्साकायः ओउःमयःकोः ल्हुङ् गलमा द्युम्ल। व्हाय्तो व्हक्मालोलम्कायः बाय्क्ती वाय्ताक्नानी। ओउःमयः ल्हह्ओ ल्हुङ् झाक्ती ह वाह्सा चीःनानी ओउःत झ्यान्ते परमेस्वर्इ लोने आन न्युम्ह्ताक्नाःथास। 15 दोङ् पेओ वाह्सा ल्याम् फेती ओउः ल्याम् मीह्ताक्नानी। द्याह् बोसोर्कोः चोः बालाम्त तोओलो लेखालेः वाह्नै बालाम्इपाय् पेमालो काम् जाङ्ह्झ्याङ्कोः पैसा लेःसा आन झाक्ओ खेःतो। 16 ओउः पेमालो काम्पाय् बालाम्इ जाङ्ह्चौ खेःतो ओउःकोः नोःसा चीःआक्मालो गधाइलेः मान्तालो लेखा नोःती परमेस्वर्कोः कुरा छ्यानःओ बालाम्कायः जान्ती एतलेः ब्रःती जाङ्ह्साकायः त्याःआथै। 17 ओउः पेमालो स्यान्ओलम्पाय् तीः सीप्ती ज्याल्ओ पन्ध्यारोलो लेखा लेःआः इ। मारुःइ आलःओ तीः लात्मालो मुस्लो लेखालेः स्याव्ती ओउःमयःकायः परमेस्वर्इ जुगाङ् च्याक्ओहाङः वाय्ती गम्नाःथास। 18 ओउःमयः लयःकोः नेह्रो ओर्ताक्ओ कुरा नोःती अरु तोहालेः रेव्ओ काम् फेओलम्कायः लुःर्यव् कुराइ थ्योन्ह्ती फेरी रेव्ताक्नाःथास। 19 ओउः रेव्ओ काम् तोहालेः फेओलम्कायः ओउः माःती स्यान्ओलम्इ “लौ ङीकुस् वाह्तेःनै त खेःया नीङ् ऐन्कोः नोकरी फेसा खाय्तेःनानी” त तोती गम्नीतो ओउःमयःपाय् लयःलेः रेव्तो काम् जाङ्ह्ओ नोकरीलेः स्याव्नै। सुसु रेव्तो जाङ्ह्साकायः फेसा खाय्नीली ओउःपाय् रेव्ओ काम्कोः नोकरी मुनै। 20 ओउःमयःइ ङीकायः दल्ताक्सा प्रभु येसु ख्रीस् तय्ह्आक्तीको ओहाङःसै ल्हाव्ह्दैबाङ्कोः रेव्ताक्ओ कुरा फेआक्तीको फेरी ओउः कुराकायः जाङ्ह्सा द्यान्ह्नै त खेःया ओउःमयः ङ्हाहाङःसै न्हाङ्तोलेः पेमालो स्याव्नै। 21 परमेस्वर्इ तोओ कुरामा ओउःकोः काम् पेतो जाङ्ह्सामा चीःआक्तीको ओउःत हायःओ फेसाकायः न्हाङ्तोलेः स्याव्ल। ओउःत हायःओसै ओउःमयःइ ओउः पेओ कुरा गलमा चीःमाःत मुओ पेचाः खेःतो। 22 “कुयःइलेः लयः हास्ओकःताङ् जेःलाङ् द्यान्ह्नाः” फेरी “जेस्आक्तीको प्याक्लेः हीलोताङ् द्यान्ह्ती लाःती वाह्नाः” त मान्ताइ जवती तोओ कुरा मुनाः। ओउः पेमालो कुरा द्यान्ह्ती हायःओलम्पाय् ओउः कुयःमा प्याक्लो लेखालेः स्याव्नाः बा दोह् हायःती दाय्ह्सा ओउःमयः लोने न्हाङ्तोलेः पेमालो स्याव्नै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.