२ पत्रुस् 1 - चेपाङ1 ङा सीमोन् पत्रुस् त तोओ येसु ख्रीस्इ छ्युङ्ह्ती ल्होक्ओ नोकरीइपाय् इ चेती सबै ङीलो लेखा पेतो ङ्हाम्ओलम्कायः लेखती ल्होक्नेःनाङ्स। एत अरुसै जुगाङ् दोःमालो ङ्हाम्ओ ल्हुङ्पाय् ङीकोः ओजायः जय्कुमःओ परमेस्वर्इमा ङीकायः दल्ताक्ओ येसु ख्रीस्इमा आन पेतो हायःती दोःताक्आतय्ही 2 परमेस्वर्कायःमा ङीकोः प्रभु येसुकायःमा पेतो तय्ह्तेःपानी ओहाङःसैको नीङ्कायः प्रभुइ आन योनःती योती ल्हुङ् धोमाय्ताक्तेःपै। 3 ओउःकोः काम् जाङ्ह्ती पेतो वाह्ताक्सा थेङा परमेस्वर्इ ङीकायः दोह् दोह् चाहनाः ओउःलेः लयःकोः ग्वम्इ बयःआतय्ही। ओउःकायः तय्ह्आक्तीको ङी ओउःकुस् पेओमा ताङ्ह्ओ स्याव्नाःतय्ही एत हायःसाकायः ओउःइ गोत्आतय्ही। 4 एतलेः ओउःइ तोती गम्ओ आन ताङ्ह्ओमा पेओ थोक्लम् बयःआतय्ही। ओहाङःसैको ल्हाव्ह्दैबाङ्कोः पेमालो सीताक्ती वाय्ताक्ओ मोह्हाय्ओलम्सै दल्ती ङी परमेस्वर्कोः बानीकोः दोःनाःतय्ही। 5 ओउःत झ्यान्ते नीङ्इ ङ्हाम्ओ कुस्ब्रक्त पेतो हायःती वाह्न। पेतो हायःती वाह्ओ कुस्ब्रक्त व्हाय्तोलेः स्याव्न। 6 व्हाय्तो स्याव्ओ कुस्ब्रक्त लीङ्हायःमाःतोलेः वाह्न। लीङ्हायःमाःत वाह्ओ कुस्ब्रक्त लीह्सीःओ गोरःसा ल्हुङ् दोःतेःपै। लीह्सीःओ गोरःसा ल्हुङ् दोःओ कुस्ब्रक्त परमेस्वर्कायः म्रोताक्ओ कुरा ग्याती जाङ्ह्नु। 7 परमेस्वर्कायः म्रोताक्ओ कुरा जाङ्ह्ओकुस् ब्रक्त ङ्हाम्ओ पुःचोङ् हौचोङ्कायः राप्नु ओउःमयःकायः राप्ओकुस् ब्रक्त सबैकायः राप्नु दा। 8 एत न्हाङ्तोलेः हायःसा जुगाङ् चाहनाः उया नीङ्कोः परमेस्वर्कायः जाङ्ह्ओ काम्पाय् लोल। फेरी एत हायःती नीङ् पेतोलेः वाह्तेःनै त खेःया ङीकोः प्रभु येसु ख्रीस्कोः कुरा व्हाय्तोलेःतेः जाङ्ह्सा खाय्तेःनानी। 9 सुखे एतलेः वाह्ल ओउःइ पेतो चीःउलु च्यवःसा खाय्मालो मान्तालो लेखा मुनाः। ओउःइ ङ्हा जाङ्ह्ओ पेमालो काम्लम् द्याह् म्हीत्ती वाय्ओ लेःआः त म्हेःआकान्। 10 लौ उया पुःचोङ् हौचोङ्लम् परमेस्वर्इ नीङ्कायः छीङ्ह्तीलेः गोत्तेःआकाय् ओउःत खेःओ एतलेः पेतो हायःती वाह्सा बोङःनु दा ओहाङःसै नीङ् गलकायःमा वाय्तोलेः स्याव्तेःइली। 11 फेरी ङीकायः दल्ताक्ओ प्रभु येसु ख्रीस्कोः गलमा वाय्मालो राजीहाङः पोक्ती मुसाकायः ङी जुगाङ् पेतोलेः दोःनाःतय्ही। 12 इ दोङ् कुरापाय् नीङ्इ चीःती पेतो ग्रमःतलेः ङ्हाम्तेःनानी चीःसापाय् पेतोलेः चीःतेःनानी ङाइ ओउः कुरापाय् कोदीङःती तोनेःनाङ्स। 13 ङा सीधाङ्माःखाहाङः एत कोदीङःती तोसा खेःतो त म्हर्नाङः। 14 दोह् हायःती दाय्ह्सा नाःतो दीन् पुत्मालोहाङः इ आङ्पाय् फेसा खेःनाङः ङीकोः प्रभु येसु ख्रीस्इ ओउःत ङाकायः दोङ्ह्तीलेः तोती झ्यान्ते एत स्याव्नाङः त चीःआलाङः। 15 ङा सीआक्तीकोमा ओउः कुरा नीङ् म्हेःमाःत मुसा खेःतो ओउःत स्याव्ताक्साकायः ङाइ आन बोङःनाङः। 16 ङीइ प्रभु येसु ख्रीस् ताङ्ह्तो ग्वम् छ्यानःती वाङ्ओ दीन्कोः कुरा नीङ्कायः ल्हाक्ती तोओहाङः ङीइ माःती नोःओ ख्याल् कुरा तोङुसुलु ओउःपाय् दोङ् कुरालेः खेःतो। येसु ख्रीस्पाय् गुच्युक् ताङ्ह्ओलेः त ङीइ लयः मीक्इ च्यवःआलाङःसु। 17 ङीइ बुम्हाङः योती मुतोक्हाङः येसुकोः परमेस्वर् आपाइ ओउःकायः ताङ्ह्ताक्तीलेः तोती “लौ इपाय् ङाकोः आन राप्ओ ल्हुङ्गोरे चोः लेःआः बत्ताङः ओउःकः ङा आन म्रोलेःनाङः” त दाय्ह्ती ओउः आन पेओमा ताङ्ह्ओ परमेस्वर्पाय् दाय्ह्आ। 18 ओउः लाङ्कासै वाङ्ओ हाव्नयःपाय् ङीइ परमेस्वर्कोः बुम्हाङः येसुकुस् मुतोक्हाङः लयःकोः नोइलेः सायःआलाङःसु 19 एत च्यवःती ङीइ परमेस्वर्कोः कुरा छ्यानःओमयःकोः नोःराय् द्याह् न्हाङ्तोलेः पेतो ङ्हाम्नाङःसु। नीङ्इमा ओउः नोःराय् घीःती सायःसा खेःतो दोह् हायःती दाय्ह्सा ओउः नोःराय्इपाय् च्याक्ओहाङः मुओ बत्तीलो लेखालेः नीङ्कोः ल्हुङ् थोङ्ताक्तेःनै। बीहानकोः सुक्र कार् दाह्ती लन्ह्आक्तीको “च्याक्ओ क्रव्लेःनाः सबै थोङ्ओलेः स्याव्नाः” त मान्ताइ चीःनानी। ओउःलो लेखालेः ओउः नोःराय्इ नीङ्कोः ल्हुङ्हाङः थोङ्ती मुती झ्यान्ते “सबै जुगाङ् थोङ्ताक्ओ ख्रीस्कोः वाङ्नम् दीन् दाह्खेःनाः” त चीःसा खाय्तेःनानी। 20 इतमा चीःसा खेःतो परमेस्वर्कोः कुरा छ्यानःओमयःइ आखरःहाङः लेखओ कुरापाय् परमेस्वर्कोः ग्वालामः आःताः दोःमाःत सुइमा पेतो चीःती छ्यानःसा खाय्नीली। 21 दोह् हायःती दाय्ह्सा ओउःमयः परमेस्वर्कोः कुरा छ्यानःओमयःइ आखरःहाङः लेखओ कुरापाय् सुइमा लयःकोः ल्हुङ्सै लेखओ खेःल। ओउः कुरापाय् मान्ताकोः लयः झाक्ओ कुरा खेःल परमेस्वर्कोः ग्वालामःकोः ग्वम् दोःती परमेस्वर्कःसै वाङ्ओ कुरा नोःआकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.