२ युहना 1 - चेपाङ1 लौ नाङ् परमेस्वर्इ छ्युङ्ह्ओ मेम्साहेप्य इ चेती ङा ओउः थालवःपाइ नाङ्कायःमा नाङ्कोः चोःकायःमा लेखती ल्होक्नेःनाङ्स। नीङ्कायःपाय् ङाइमा सबै अरु दोङ् कुरा ङ्हाम्ओलम्इमा राप्नेःनाङ्स 2 दोह् हायःती दाय्ह्सा ओउः दोङ् कुरापाय् ङीकोः ल्हुङ्हाङः तेन्छ्याङ्मा मुलेःनाः गलकायःमा मुनाः। 3 लौ परमेस्वर् आपाइमा ओउःकोः चोः येसु ख्रीस्इमा नीङ्कायः काङ्तीलेः योनःती योती धोमाय्ओ ल्हुङ्मा दोङ् कुरा चीःओमा राप्ओ ल्हुङ्मा बयःपाःतय्ही। 4 नाङ्कोः चोःलम्इपाय् परमेस्वर्इ तोओलो लेखा दोङ् कुरा ग्याती सायःओलेः त च्यवःआलाङःसु। एत च्यवःआक्तीको ङा चोङाय्तो स्याव्आलाङः। 5 लौ मेम्साहेप्य ङी सबै राप्काय्ती मुइ त दाय्ह्ती तेती लेखनेःनाङ्। ओउःपाय् रौ तोओलेः खेःल ङ्हासैकोः लेःआः बा। 6 ओउः ङ्हासैकोः परमेस्वर्इ तोओ कुरापाय् सायःचाःतय्ह्नी त खेःया ङी सबै राप्तीलेः वाह्मानाःतय्ही। ओहाङःसै ओउः ङ्हासै तोओ कुरापाय् इ लेःआः “सबै राप्काय्ती वाह्न” त दाय्ह्ओ लेःआः। 7 ल्हाव्ह्दैबाङ्हाङः नाःतो माःती स्यान्ओलम् वाङ्आकाय्। ओउःमयः “लौ येसु ख्रीस्पाय् दोङ् मान्ता स्याव्ती वाङ्ल” त दाय्ह्ती स्यान्नानी। ओउःमयः माःरेव् लेःआः बा। येसु ख्रीस्कोः बीरोत् लेःआः इ 8 ओउःत खेःओ ल्हुङ् घीःती मुन ओहाङःसैको नीङ्कोः हायःझ्याङ्कोः वाय्माःत मुनाः जुगाङ् दोःतेःनै। 9 सुसुखेइ येसुकोः स्यान्राय्कुस् अरु थे कुरा स्यान्ती तोचानी ओउःलेः परमेस्वर्कोः ल्हुङ्तुक् चीःनीली। ख्रीस्कोः स्यान्राय् झुङ्आले स्यान्ओमयःखेपाय् ओउःमयःइ परमेस्वर् आपाकोः ल्हुङ्तुक्मा चीःनानी चोःकोः ल्हुङ्तुक्मा चीःनानी। 10 ओउः थे कुरा स्यान्ती तोओ मान्तापाय् नाङ्कःताङ् वाङ्नाः त खेःया ओउःकायः कीम्हाङः रोम्लाम्। ओउःकायः “लौ भालातेः वाङ्ओतेःआः” तमा तोलाम्। 11 ओउःकायः यात्चाक्इ ओउःतलेः पेतो तोओ त खेःया ओउः मान्ताकोः रेव्ओ काम् ब्राङ्तीलेः जाङ्ह्नौ। 12 लौ नीङ्कायः नाःतो अरु तोसा म्हर्ङोतो ओउःपाय् द्याह् लेखसा झाक्ङल लोने नीङ्कायः क्रुस्आक्तीको तोनेःनाङ्स। नीङ्कायः योसा आन झाह्नाङः ओउः योतोक्हाङः नोःकाय्तोक्हाङः पेतो स्याव्ती झ्यान्ते चोङाय्नाःतय्ही। 13 लौ नाङ्कोः परमेस्वर्इ छ्युङ्ह्ओ नाःकोः चोःलम्इ नाङ्कायः नमस्ते ल्होक्तेःनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.