२ कोरीन्थी 7 - चेपाङ1 लौ साथीलम्य एत तोती गम्ओ कुरा ङीइ चीःती झ्यान्ते ङीकोः आङ्मा वाहीमःमा छय्ङ्ताक्पाःतय्ह्नी ओहाङःसैको ङी परमेस्वर्कः एङःती पेतो हायःती वाह्पाःतय्ही। 2 लौ नीङ्कोः ल्हुङ्हाङः ङीकायः पेतो रोम्ताङी दा। ङीइ सुकायःमा पेमालो जाङ्ह्ङुसुलु सुकायःमा वाय्ताक्ङुसुलु सुकायःमा रेव्ताक्सा बोङःङुसुलु। 3 एत तोती नीङ्कायः गाल्तुम्ती तोसा बोङःनेःनाङ्सल नीङ्कायः ङीइ आन राप्नेःनाङ्स सीयामा स्याक्यामा ङीइ ल्हुङ् ब्राङ्तीलेः राप्नेःनाङ्स। 4 नीङ्कोः कुरापाय् ङाइ ङाःती तोसा खाय्नाङः ओउःत झ्यान्ते ङाकायःतेः आन लुङ्तेःनेःनानाङ्स। लीह्सीःओ बेलाहाङःमा ङाइ नीङ्कोः कुरा गीलती ल्हुङ् धोमाय्तो स्याव्ती चोङाय्तोलेः मुनाङः। 5 नाःतो लीह्सीःओ बेलाहाङः च्यवःआलाङःसु। मासीदोनीया देस्ताङ् आल्ओ बेलाहाङः ङी न्यास्सा दोःङीली इःसैमा उःसैमा आन दुख बयःआताङी। बाहीरसैमा काय्काय्ओ वाङ्आ भीत्रसैमा ल्हुङ्हाङः रैआलाङी 6 ओउःत लीह्सीःओ च्यवःङुसुतो सबै क्रओलम्कायः स्याङ्ताक्ओ परमेस्वर्इलेः तीतस् वाङ्ओ बेलाहाङः ङीकायःमा ल्हुङ् स्याङ्ताक्आताङी। 7 ओउःकायः क्रुस्साकायः ह चोङाय्ङीली ओउःइ नीङ्कोः कुरा ल्हाक्ती छ्यानःती झ्यान्ते ङी चोङाय्तो स्याव्आलाङी। “लौ ओउःमयः नाङ्कायः क्रुस्सा आन झाह्तीलेः मुमानै। फेरी नाङ्इ जान्ओ कुरा ग्याती म्ह्युङ्ती सायःती झ्यान्ते ल्हुङ् द्यान्ह्ती आन लीह्तीमा मुनै नाङ्कोः कुरा जाङ्ह्साकायः आन ल्हुङ् र्याङःतीमा मुनै” त दाय्ह्ती तीतस्इ छ्यानःती दाय्ह्ओ कुरा सायःआक्तीको न्हाङ्तोलेः चोङाय्तो स्याव्आलाङः। 8 ङाइ अनम्ह् लेखओ चेती पह्रआक्तीको नीङ् लीह्तो स्याव्तेःआकाय् त खेःया एत लीह्तो स्याव्ओकायः ङ्हाखे झाक्आक्ङल द्याह्खे झाक्नाङः 9 दोह् हायःती दाय्ह्सा यात् चीच्योक्कायः लीह्आक्तीको नीङ्इ ल्हुङ् द्यान्ह्ती रेव्ओ काम् फेती पेतो जाङ्ह्तेःआकानी। नीङ् ल्हुङ् द्यान्ह्तेःआकाय् त चीःती चोङाय्तो स्याव्आलाङः। नीङ्कोः लीह्ओकायः खेःल लीह्आक्तीको परमेस्वर्कःताङ् द्यान्ह्तेःआकाय् ओउःत चीःती चोङाय्तोलेः मुनाङः। नीङ्कोः लीह्ओ पेमालो खाल्कोः खेःल। 10 परमेस्वर्कःताङ् द्यान्ह्ताक्सा लीह्सीःओइ मान्ताकायः दल्ताक्नाःथै। ओउः खाल्कोः लीह्सीःओखे पेलेःनाः ल्हाव्ह्दैबाङ्कोः खाल्कोः लीह्सीःओखेइ सीताक्नौ ओउःपाय् पेल। 11 नीङ्कोः लीह्सीःओ परमेस्वर्कःसै दोःओआः बा। लीह्आक्तीको परमेस्वर्कोः काम् जाङ्ह्साकायः नीङ् गुच्युक् म्ह्युङ्तीलेः ग्यातेःआकाय्। “ङीइ पेतोलेः हायःआलाङःसु” त दाय्ह्ती छ्यानःसाकायः नीङ् द्याह् आन झाक्तेःनै। ओउः पेमालो जाङ्ह्ओचाक्कः गुच्युक्तेः ल्हुङ् अह्र्सीःतो स्याव्तेःआकाय् गुच्युक्तेः ल्हुङ् रुःतेःआकाय् अरुकायः पेतो राप्ती ओउः काम् पेतो जाङ्ह्साकायः गुच्युक्तेः झाक्तेःआकाय्। माः है एत हायःती नीङ्कोः ल्हुङ् पेतो लेःआः त फानःती छ्यानःतेःआकानी। 12 चेती लेखओ बेलाहाङः ओउः रेव्तो जाङ्ह्ओ मान्ताकायःमा लेखमाङल ओउःइ लीह्ताक्ओ मान्ताकायःमा लेखङल। ङीइ तोओ कुरापाय् नीङ् परमेस्वर्कोः मीक्हाङः गुच्युक् म्ह्युङ्ती जाङ्ह्सा ग्याओ लेःआः त छ्यानःसाकायः लेखनेःआलाङ्स। 13 नीङ् पेतोलेः हायःतेःआकानी त चीःती ङी आन म्रोआलाङी। फेरी तीतस्कायः नीङ्इ सबै धोमाय्ताक्तेःआकानी ओउःत झ्यान्ते न्हाङ्तोलेः म्रोनाङी। 14 नीङ् मान्तालम्कायः “ओउःमयः पेलेःनाः” त दाय्ह्ती तीतस्कायः ङाःती तोङोतो एत तोओ दोङ् कुरा लेःआः। ङाइ तोओलो लेखालेः ताप्तेःताक्तेःआकानी ओउःत झ्यान्ते ङाइ तीतस्कायः आह्रे ङाःती तोओ खेःङल ङा रास्सा परङल। 15 ओउःकायः नीङ्इ रैतीमा ग्यातीमा रोम्तेःआकानी त गीलती तीतस् आन ल्हुङ् म्रोतीलेः मुनाः। 16 ओउःत हायःती नीङ् पेतोलेः स्याव्तेःनै त चीःती ङा धोमाय्तीमा ल्हुङ् ङाःतीमा मुलेःआनाङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.