२ कोरीन्थी 5 - चेपाङ1 ङीकोः ल्हाव्ह्दैबाङ्हाङः मुओ वाय्सा खेःओ आङ्पाय् आय् कीम्लो लेखा ह्र्योङःती वाय्नाः ओउःत झ्यान्ते परमेस्वर्इ लयः जाङ्ह्ओ रौ आङ् ओउःकःसै दोःनाःतय्ही त चीःनाङःइसी। ओउः आङ्पाय् ल्हाव्ह्दैबाङ्कोः खाल् खेःल लाङ्काहाङः मुओ गलमा ह्र्योङःती वाय्मालो खाल् लेःआः बा। 2 ओउः नया लाङ्काकोः आङ् लावसाकायः ङी आन झाक्ती ल्हुङ् सरङ् भरङ् त सायःनाङःइसी। 3 ओउः आङ्पाय् दोःआ त खेःया ङी सोह् मुसा परङीली। 4 इ ल्हाव्ह्दैबाङ्कोः आङ्हाङः मुच्युक्हाङः ङी ल्हुङ् द्युम्तो स्याव्नाङी ओउःत झ्यान्ते “पेओ आङ् दोःपाःतय्ही” त म्हर्ती ल्हुङ् सरङ् भरङ् त सायःनाङःइसी तेन्छ्याङ्कोः आङ् फेसाकायः खेःल ओउः रौ आङ् दोःसा आन झाक्नाङी। ओहाङःसैको ओउः सीसा खेःओ आङ्खेपाय् ल्ह्युन्ती वाय्ती ओउः सीसा चीःमालो नया आङ्खे दोःनाःतय्ही बा। 5 एत हायःओ थाङ्ताक्सा चाक्पाय् परमेस्वर् लेःआः बा। फेरी इ कुरा लोने स्याव्नाः त ङीकायः चीःताक्सा थेङा ओउःकोः ग्वालामः ङ्हा बयःआतय्ही। 6 एत चीःती झ्यान्ते ङी ल्हुङ् घ्युम्माःत धोमाय्तोलेः मुनाङी। इ ल्हाव्ह्दैबाङ्कोः आङ्हाङः मुतोक्हाङः प्रभु येसुकुस् मुसा दोःधाङ्ङीली। 7 ओउःत झ्यान्ते ङी लाङ्काकोः कुरा च्यवःसा खाय्धाङ्माःखाहाङः ङ्हाम्तीलेः वाह्नाङी। 8 माः रैस ङी ल्हुङ् घ्युम्माःत धोमाय्तो मुनाङी। इहाङःकोः आङ् फेसा झाक्ती ङी प्रभुकुस् न्हाङ्तोलेः मुसा छ्युप्नाङःसु 9 ओउःतलेः छ्युप्ङुसुतो इहाङः मुओया ओउःकुस् मुओया गाव् खेःयामा ङीइ प्रभुकायः म्रोताक्साकायः ओउःकोः काम् पेतो जाङ्ह्सा बोङःनाङःसु। 10 ङीकोः काम् तय्छनःती योसाकायः यात्नम् दीन्हाङः ङी सबै ख्रीस्कःहाङः चीङ्लाङ् आल्सा परनाःतय्ही ओहाङःसैको ल्हाव्ह्दैबाङ्हाङःकोः मुतोक्हाङः ङी पेतो जाङ्ह्आतय्ह्नी त खेःया लोने पेओलेः दोःनाःतय्ही। खेःल ङी पेमालो जाङ्ह्आतय्ह्नी त खेःया पेमालोलेः दोःनाःतय्ही। 11 एतलेः प्रभुकः एङःती झ्यान्ते ङीइ मान्तालम्कायः होम्ती तोसा बोङःनाङःसु। ङीकायःपाय् “गत ताङ्ह्तो मान्तालो” त परमेस्वर्इ पेतो चीःनाःतय्ही एतलेः नीङ्इमा ङीकायःपाय् “गत ताङ्ह्ओ मान्तालो” त ल्हुङ्हाङः चीःतेःनाःताङी ओउःत ङा झाक्तीलेः म्हर्नाङः। 12 एत तोती ङी लयःकोः नेह्रो ओर्ताक्सा बोङःङुसुलु ङीपाय् “गत ताङ्ह्ओ मान्ता” त नीङ्कायः छ्यानःसाकायः ह ओउःतलेः तोनेःनाङ्स। ओहाङःसैको अरु वाङ्ती ङीकोः ल्हुङ्कोः कुरा म्हर्माःत “लौ योसाकायः इमयःपाय् ङीच्युक् पेओमा ताङ्ह्ओमा खेःइली” त लयःकायः ताङ्ह्ताक्सा ङीकायः मीताक्सा बोङःतोक्हाङः नीङ्इ पेतोलेः त्याङ्सा खाय्तेःनानी। 13 ङी लयःकायः ब्रःतीलेः नोःनाङी। एत यात्नीस्चाक् दाय्ह्नै यादो। लौ ओउःत नोःओपाय् परमेस्वर्कोः काम् जाङ्ह्साकायः नोःओ लेःआः। व्हक्तोलेः नोःनाङी त खेःया ओउःपाय् नीङ्कायःलेः नोःओआः बा। 14 ख्रीस्इलेः ङीकायः आन राप्नाःताङी त चीःती ङीइ ओउःकोः काम् जाङ्ह्सा खेःनाङी। यात्चाक्पाय् सबै दल्ताक्साकायः ल्हाङःतीलेः सीआ ओउःत झ्यान्ते ओउः सील त खेःया सबै सीचाः खेःतो। 15 ख्रीस्पाय् सबैकायः ल्हाङःती दल्ताक्साकायः सीआ त खेःओ ओउः दल्ओलम्इ लयःकायः खेःइसीली ओउः सीआक्तीको उह्ती च्योक्ओ ख्रीस्कोः काम् जाङ्ह्साकायः दल्ओआः इ बा। 16 द्याह्हाङःसै ङीखेइ सुकायःमा ओउःकोः रुप् ह योती तय्छनःती योङुसुलु ओउःत हायःती ल्हाव्ह्दैबाङ्कोः मान्तालम्खेइ तय्छनःती योनानी। माः रैस ङी यात् पेन्ह्कायः ख्रीस्कायः ल्हाव्ह्दैबाङ्कोः मान्तालो लेखालेः तय्छनःती योङुसुतो द्याह्पाय् ङीइ ओउःकायः एतलेः योङुसुलु। 17 ओउःत खेःया सुसु ख्रीस्कोः मान्ता लेःआः ओउःपाय् नया स्याव्ओ मान्ता खेःलेःनाः। आय् कुरा द्याह् म्हीत्ती मीह्लेःआ लौ सबै कुरा रौलेः खेःनाः बा। 18 इ कुरा सबै परमेस्वर्कःसै वाङ्ओ लेःआः। ङ्हापाय् ङी ओउःकोः बीरोत् खेःङीतो येसु ख्रीस् ल्होक्आक्तीको ङीकायः लयःकुस् ब्राङ्काय्ताक्ती द्याह् परमेस्वर्कोः मान्ता स्याव्ताक्आताङी। फेरी अरुलम्कायः इ परमेस्वर्कुस् ब्राङ्काय्ओ कुरा तोसाकायःमा परमेस्वर्इ ङीकायः ल्होक्आताङी। 19 ओउः कुरापाय् इतलेःआः मान्तालम्कायः लयःकुस् ब्राङ्काय्ताक्सा थेङा परमेस्वर्इ ख्रीस्कायः ल्होक्आथै। फेरी मान्ताकोः रेव्ओ काम्पाय् परमेस्वर्इ म्हीत्ताक्ती वाय्नौ। इ कुरा थोल्ह्ती तोसा काम्पाय् ङीकायःलेः बयःआताङी। 20 ङीपाय् ख्रीस्कोः ल्होक्ओमयः खेःनाङी ओउःत झ्यान्ते “लौ परमेस्वर्कःताङ् द्यान्ह्ती ओउःकुस् ब्राङ्काय्ती मुन दा” त दाय्ह्ती ख्रीस्कोः कुरा तेतीलेः तोनाङःसु। 21 ख्रीस्इपाय् दोह्मा रेव्तो जाङ्ह्उलु ओउःकोः मीक्हाङः ङीकायः ख्रीस्कुस् पेतो स्याव्ताक्साकायः परमेस्वर्इ ख्रीस्कायः रेव्तो मान्ताकोः रेव्झ्याङ्कोः बयःआथै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.