२ कोरीन्थी 4 - चेपाङ1 ङीकायः योनःती योती परमेस्वर्इ ओउः काम् जाङ्ह्सा बयःआताङी ओउःत झ्यान्ते ङी ल्हुङ् घ्युम्तो स्याव्ङीली। 2 ङी अरुइ चीःमालो रेव्ओ काम् जाङ्ह्ओमा फेआलाङःसु। ले ब्रेह्तीलेः माःती नोःमामाःत ङी परमेस्वर्कोः दोङ् कुरा छ्योय्ह्मामाःत स्यान्नाङःसु। एतलेः परमेस्वर्कोः मीक्हाङः वाह्ती ङीइ सबै मान्तालम्कायः ङीकोः ल्हुङ्पाय् “दोङ् पेओ लेःआः” त छ्यानःनाङःसु। 3 ङीइ थोल्ह्ती तोओ पेओ कुरा सबैइ चीःती सायःसा खाय्नानी ओउः सीती वाय्सा खेःओ ङ्हाम्मालो मान्तालम्इ ह चीःसा खाय्नीली ओउःमयःकःसै नुसुती मुनाः 4 दोह् हायःती दाय्ह्सा ओउःमयःइ ल्हुङ्हाङः चीःती ङ्हाम्साकायः इ ल्हाव्ह्दैबाङ्कोः सैतान् राजाइ ताक्थासल। ओउःत खेःओ ओउः परमेस्वर्लो लेखा ताङ्ह्ओ ख्रीस्कोः पेओ समचार्पाय् ओउः मान्तालम्इमा चीःसा खाय्नीली ओउः पेओ कुराइमा ओउःमयःकोः ल्हुङ्हाङः थोङ्ताक्सा दोःल। 5 ङीइ थोल्ह्ती तोओपाय् लयःकायः ताङ्ह्ताक्ती तोओलेः खेःङीसीली ओउःपाय् खेःल “येसु ख्रीस्पाय् ङीकोः प्रभु लेःआः” तमा थोल्ह्ती तोमानाङःसु। फेरी “येसुकोः काम् जाङ्ह्साकायः नीङ्कोः नोकरीपाय् ङी लेःआः” तमा तोमानाङःसु। 6 परमेस्वर्इलेः “लौ च्याक्ओहाङः थोङ्तो स्याव्पाः” त दाय्ह्ती तोओआः बा ओउः परमेस्वर्इपाय् ङीकोः ल्हुङ्मा थोङ्ताक्आताङी। ओहाङःसैको ओउः थोङ्ओपाय् येसु ख्रीस्कोः खेन्सै वाङ्ती परमेस्वर् गुच्युक् पेओमा ताङ्ह्ओमा त चीःताक्नाःताङी। 7 ङीपाय् ध्यव्ओ मान्तालम् खेःनाङी। ओउःतलेः खेःङीतो ओउःत पेओ ल्हुङ् थोङ्ताक्सा कुरापाय् परमेस्वर्इ ङीकायः बयःती झ्यान्ते ङीकोः ग्वम्पाय् जुदालेः परमेस्वर्सै दोःओआः ङीकःसै खेःल त छ्यानःनौ। 8 ङीकायःपाय् इःसै उःसै नाःतो क्लीमःसा बोङःताङीतो ओउःमयःइ जुगाङ् क्लीमःसा खाय्ताङीली। ङीपाय् “दोह् हायःचाङी दोह् हायःचाङी” त म्हर्झुङ्ङीतो दोह्तमा क्रङीली। 9 अरुलम्इ ङीकायः लीह्सीःताक्तो बयःताङीतो परमेस्वर्इ ङीकायः गलमा फेताङीली। आन सात्खेःझुङ्ताङीतो जुगाङ् सात्ती वाय्सापाय् खाय्ताङीली। 10 प्रभु येसुकोः जीङः ङीकोः आङ्हाङः मुलेःनाः त छ्यानःसाकायः ङीपाय् येसुलो लेखालेः आङ्हाङः गलमा सीखेःओ मुसा खेःनाङी। 11 फेरी ङीकोः सीसा खेःओ आङ्हाङः येसुकोः जीङः छ्यानःसाकायः ओउःकायः काम् जाङ्ह्ती मुतोक्हाङः ङी आन सात्खेःझुङ्नाःताङी। 12 एत हायःती नीङ्कायः जीङः दोःताक्साकायः ङी सीखेःतो स्याव्सालेः खेःनाङी। 13 “ङाइपाय् ओउःकोः कुरा ङ्हाम्आलाङः ओउःत खेःओ ओउः ङ्हाम्ओ कुरापाय् तोआलाङः” त दाय्ह्ती दाय्ह्ओ आखरःहाङः लेखती मुनाः। एतलेः ङीइमा ङ्हाम्आक्तीको ङीइ ङ्हाम्ओ कुरापाय् तोनाङःसु। 14 येसु सीआक्तीको परमेस्वर्इ ओउःकायः उह्ती च्योक्ताक्आथै ओउःतलेः परमेस्वर्इ ङीकायःमा येसुकुस्इ च्योक्ताक्ती नीङ्कुस्मा परमेस्वर्कःताङ् आलःनाःतय्ही। 15 इ सबै नीङ्कायः पेतो स्याव्ताक्सा लेःआः बा एत हायःती न्हाङ्तोलेः नाःतो मान्तालम्कायः परमेस्वर्इ योनःती योती ओउःकोः रौ जीङः दोःताक्नाःथास। ओउःच्युक् नाःतो मान्तालम्इपाय् न्हाङ्तोलेः परमेस्वर्कायः ताङ्ह्ताक्ती “च्युता” त दाय्ह्ती तोनानी। 16 ओउःत झ्यान्ते ङी ल्हुङ् घ्युम्तो स्याव्ङीली। ङीकोः आङ्खेपाय् वाय्लेःनाः ङीकोः परमेस्वर्सै दोःओ जीङःखे दीन्का दीन् रौ सेह्र्तोलेः स्याव्नाङी। 17 फेरी ङीइ द्याह् बल लीह्सीःओ गोरःसा बेलापाय् यात् चीच्योक्खेकायः ह मुलेःनाः लोनेः ओउःत गोरःआतय्ही त झ्यान्ते ङी ओउःसै न्हाङ्तोलेः पेओमा गलकायःमा द्योक्मालो जाङ्ह्झ्याङ्कोः दोःनाःतय्ही। 18 ङीपाय् तेन्छ्याङ्कोः च्यवःसा खाय्ओ कुराखे बोङःमाःत च्यवःसा खाय्मालो कुराखे झुङ्आले बोङःनाङःसु। तेन्छ्याङ्कोः च्यवःसा खाय्ओ कुराखे ज्याङःतोकायः मुल ओउः द्याह् च्यवःसा खाय्मालो कुराखे गलकायःमा मुलेःनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.