२ कोरीन्थी 12 - चेपाङ1 ङा लयःकोः नेह्रो ओर्ताक्सा खेःनाङः बा। ओउःत हायःसा खेःसापाय् खेःतो दोह्मा हायःउलु। द्याह् प्रभुइ ङाकायः छ्यानःओ कुरामा माङःखा च्यवःताक्ओ कुरामा तोचेःनाङ्स। 2 चौध बर्स स्याव्ओहाङः यात्चाक् ख्रीस्कायः ङ्हाम्ओ मान्ता तय्ह्आलाङः। ओउःपाय् लाङ्काकोः अरुसै त्यावःअ खेलाहाङः लनःओ खेःतो माङःखाहाङःया थोङ्ह्हाङः लनःओ ङाइ चीःङल परमेस्वर्इ ह चीःनौ। 3-4 ओउः मान्तापाय् अरुसै पेओ लाङ्काकोः खेलाहाङः लनःओ खेःतो माङःखाहाङः लनःओया थोङ्ह्हाङः लनःओया गाव्खे ङाइ चीःङल परमेस्वर्इ ह चीःनौ। ओहाङः लनःआक्तीको ओउः मान्ताइ नोःसा खाय्मालो कुरा सायःआकान्। ओउः कुरापाय् ओउः मान्ताइ सुकायः खेःयामा ल्हाक्ती नोःसा स्याव्ल। 5 ओउः मान्ताखेकायः ङाइ ताङ्ह्ताक्ती नोःचाङः लयःखेकायः ताङ्ह्ताक्ङसल ङाखेकायःपाय् “मीओ लेःआः ङ” त नोःचाङःस ह। 6 ङा लयःकायः ताङ्ह्ताक्ती नोःसा झाक्चाङः त खेःया ओउःत नोःओ दोङ् कुरा लेःआः आह्रे ख्याल् नोःओपाय् खेःल। दोङ् कुरा खेःसापाय् खेःनाः ओउःत नोःसा ग्याङल उया ङाइ जाङ्ह्ती तोती वाह्ओसै अरुलम्इ ङाकायः न्हाङ्तोलेः ताङ्ह्ताक्चाःताङः यादो। 7 ओहाङःसैको ओउः नाःतो ग्याङ्ह्सीःओमा पेओ थोक्लम् च्यवःआक्तीको ङाकायः लयःकोः नेह्रो ओर्ताक्माःसाकायः सैतान्सै यात्ज्योः चुःलो लेखा मायः सयःती जीक्ताक्ओ बेथा ङाकायः ल्होक्ओ खेःतो। 8 ओउः जीक्ओपाय् “स्याक्ती वाय्पाः” त दाय्ह्ती सुम् पेन्ह्कायः प्रभुकः तेङोतो 9 “लौ ङाइ योनःती बयःओ ग्वम् नाङ्कायः दाह्लेःनाः बा। लयः काम् जाङ्ह्सा लोमालो मान्ताकायः ङाकोः ग्वम्इपाय् पुत्तोलेः जाङ्ह्ताक्सा खाय्नौ” त दाय्ह्ती प्रभु त्याङ्आ। ओउःत झ्यान्ते “ख्रीस्कोः ग्वम्इपाय् दोःपाङः” त दाय्ह्ती ङा जीक्ती ध्यव्तो स्याव्ओहाङः चोङाय्तीलेः मुनाङः। 10 माः रैस ख्रीस्कोः काम् जाङ्ह्तोक्हाङः ङा जीक्ओया अरुइ ङाकायः हेला क्लाःओया लीह्सीःओ बयःओया ओउः बेलाहाङःलेः ङा चोङाय्ती मुनाङः दोह् हायःती दाय्ह्सा काम् जाङ्ह्सा लोमालोहाङः प्रभुकोः ग्वम् दोःनाङः। 11 एत व्हाय्माःत लयःकोः नेह्रो ओर्ताक्ती नोःसाकायः नीङ्इलेः तोताक्तेःआनाङ्स। ङाकायः पेतोलेः तोतेःआनाङ्स त खेःया ङाइ लयःकायःलेः तोसा परआक्ङल। ङापाय् दोह्मा खेःङल माःसापाय् माः खेःतो ओउः येसुइ छ्युङ्ह्ओ ताङ्ह्ओ ल्होक्ओमयः त लयःकायः तोओलम्पाय् ङासै ताङ्ह्ओ खेःइली। 12 दोङ्सीलेः नीङ्कःहाङः प्रभुकोः छ्युङ्ह्ती ल्होक्ओमयःलो लेखा ग्याङ्ह्राय्लम्मा अरु ताङ्ह्ओ काम्लम्मा जाङ्ह्साकायः ङाइ यव्ह्मामाःत सावःमामाःत जाङ्ह्आलाङः। 13 अरु ङ्हाम्ओलम्कःहाङः जाङ्ह्ओ काम्लम्पाय् नीङ्कःहाङः गाव्खे जाङ्ह्आक्नेःनाङ्सल दोह् दोह् हायःआक्नेःनाङ्सल सबै जाङ्ह्आलाङः बा। नीङ्कःसै जेःगा तुङ्गाकोः पैसा त्याक्ङल ओउः ह हायःआक्नेःनाङ्सल। आने ङाइ त्याक्ङल त खेःया लौ ओउःत हायःओ पेनाःया पेलया। 14 द्याह् नीङ्कःताङ् वाङ्सा चीङ्नाङः इकुस्इ सुम् पेन्ह्कायः नीङ्कःताङ् वाङ्आलाङः। द्याह् वाङ्तोक्हाङः नीङ्कःसै ङाइ दोह्मा त्याक्ङल नीङ्कोः चीस् त्याक्साकायः खेःल नीङ्कायः क्रुस्साकायः ह वाङ्लेःनाङः। दोह् हायःती दाय्ह्सा चोःलम्इ आमा आपाखेकायः बयःसा खेःल आमा आपानीस्इ चोःलम्खेकायः बयःसा स्याव्नाः माःर। 15 ङा नीङ्कोः आपालो लेखा मुनाङः नीङ्कायः दोह् खेःयामा बयःसा ग्यानाङः माः रैस लयःकोः आखीमःमा बयःसा ग्यानाङः बा। नीङ्कायः ङाखेइ आन राप्नेःनाङ्स ओउःत झ्यान्ते दोह् हायःतीतेः ङाकायः बलचोः ह राप्तेःनेःनाङ्स। 16 नीङ्लम्पाय् “माः ओउःइ लयः वाङ्ती ङीकःसै दोह्मा त्याक्उलु। ओउःत हायःआक्उलु ओउःइ माः जाङ्ह्ती अरु मान्तालम् ल्होक्ती ङीकःसै त्याक्सा बोङःआकान्” त दाय्ह्ती यात्नीस्चाक्इ ङाकायः गाल्तुम्ती नोःनै यादो। 17 दोङ्सीलेः सुसुइ ङाइ ल्होक्ओ मान्तापाय् नीङ्कःसै त्याक्आक्तीको ङाकायः पैसा ल्हाआताङः र। 18 तीतस्कायः ङाइ तोती ल्होक्आलाङः ओउःकुस् यात्चाक् अरु ङ्हाम्ओ हौमा नीङ्कःताङ् ल्होक्आलाङः। ल्होक्आक्तीको तीतस्इ नीङ्कःसै दोह्मा लयःकायःलेः त्याक्उलु ङीमा नीङ्कःहाङः ओउःलो लेखालेः पेतोलेः वाह्आलाङी माः र। 19 ङी एत तोतीलेः लयःकायः त्याङ्नाःइसी त म्हर्तेःनै यादो। खेःल ङीइ ख्रीस्कोः काम् जाङ्ह्ती परमेस्वर्कोः मीक्हाङः नोःनाङी। सबै कुरा नीङ् राप्ओलम्कायः पेतो स्याव्ताक्साकायः जाङ्ह्नेःनाङ्स। 20 ङा वाङ्तोक्हाङः नीङ्खे ङा झाक्ओसैमा थे स्याव्तेःचै ङाखे नीङ् झाक्ओसैमा थे स्याव्चाङः। एत म्हर्ती ङा ल्हुङ् रुःती मुनाङः। नीङ्कःहाङः काय्काय्ओ लह्ओ मल्ह्ओ सायःसा ग्यामालो ल्हुङ्लम्मा पेमालो गाल्तुम्ती नोःओमा लयःकोः नेह्रो ओर्ताक्ती वाह्ओलम्मा अरु रेव्तो वाह्ओलम्मा 21 इ सबै ङाइ वाङ्ओहाङः च्यवःनाङः त खेःया ङा परमेस्वर्कोः मीक्हाङः जुगाङ् रास्सीःतो मीतो स्याव्नाङः। फेरी ओउः रेव्तो जाङ्ह्ओलम्इ लयःकोः अह्र्सीःओ ल्हास्या जाङ्ह्ओ काम्लम् फेमाःत झ्यान्ते ङा र्याःगार्सीःतो स्याव्चाङः यादो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.