१ तीमोथी 6 - चेपाङ1 नोकरीलम्पाय् लयःकोः मालीक्कः एङःती सायःसा खेःतो ओहाङःसैको परमेस्वर्कायःमा ङीइ स्यान्ओ कुराकायःमा सुइमा पेमालो नोःसा खाय्नीली। 2 ओहाङःसैको सुसु नोकरीकोः मालीक्खेपाय् ङ्हाम्ओ मान्तालेः मुनै ओउः मालीक्कायः “ओउःपाय् ङाकोः ङ्हाम्ओ हौ लेःआः” त दाय्ह्ती नोकरीइ मीतो योलाम्। ओउःकोः काम्पाय् न्हाङ्तोलेः पेतो जाङ्ह्सा खेःतो दोह् हायःती दाय्ह्सा ओउःमयःकोः काम्पाय् लयः राप्ओ ङ्हाम्ओलम्कायः जाङ्ह्ओ लेःआः। इ कुरापाय् अरुकायः स्यान्ती तोउ दा। 3 सुसुइ थे कुरा स्यान्ती प्रभु येसु ख्रीस्कोः दोङ् कुरामा परमेस्वर्कायः पेतो स्यवसा कुरामा सायःसा ग्याइली त खेःया 4 ओउःपाय् दोह्मा चीःमाःत झ्यान्ते लयःकोः नेह्रो ओर्ताक्नाःइसी। ओउःमयःइ कुरा कुराकायः पेमालो तानःती काय्काय्सा आन बोङःनानी ओहाङःसैको चोरःओ लओ ल्हुङ्मा वाङ्नाः काय्काय्ओ जान्ओ पेमालो नोःओमा वाङ्नाः। 5 ओउःमयः रेव्ओ ल्हुङ् नाःओलम्इ दोङ् व्हाय्ओ कुरा चीःमाःत झ्यान्ते सबै कुराकायः तानःती नोःकाय्सा बोङःनानी। “ङीइ परमेस्वर्कायः स्यवनाःतय्ह्नी त खेःया पैसा क्युसा दोःनाःतय्ही” त दाय्ह्ती ओउःमयः चीःमाःत म्हर्नाःइसी। 6 ओउःतलेः म्हर्नाःइसी दोङ्सीलेः मान्ताइ परमेस्वर्कोः काम् पेतो जाङ्ह्नानी त खेःया ओउःपाय् साहुलो लेखालेः ल्हुङ् रुःसा परइली। 7 ओत्ओ दीन्हाङः ङीइ ल्हाव्ह्दैबाङ्ताङ् दोह्मा वानःतय्ह्नीली सीआक्तीकोमा ल्हाव्ह्दैबाङ्सै दोह्मा लात्ती आलःसा खाय्तय्ह्नीली 8 ओउःत झ्यान्ते जेःगा तुङ्गामा नाय्मा दोःआक्तीको ल्हुङ् धोमाय्नाःतय्ही। 9 सुसुइ आन पैसा क्युसा बोङःनानी ओउःपाय् पेमालोहाङः वाह्ती लयःकोः ल्हुङ्कोः मोह्हाय्ओ बोङःती जुगाङ् वाय्तोलेः स्याव्नै। 10 दोह् हायःती दाय्ह्सा पैसा क्युसा मोह्हाय्ओपाय् सबैकोः रेव्ओकोः जादरः लेःआः। यात्नीस्चाक्खेइ ओउःत क्युसा बोङःआकानी त झ्यान्ते पेतो ङ्हाम्ओ फेती आन लीह्सीःओ स्याव्ताक्आकायःइसी। 11 नाङ्खे परमेस्वर्कोः मान्ता लेःतेःआः ओउःत झ्यान्ते एत रेव्तो हायःओ जाङ्ह्ती वाह्माःत जुगाङ् पेओ परमेस्वर्कायः म्रोताक्ओ काम् जाङ्ह्ती वाह्अ अरुकायः राप्ती काङ्तोलेः हायःउ दा। 12 ङ्हाम्साकायः पेतो ग्रमःत ङ्हाम्ती मुअ दा फेरी रौ जीङःपाय् पेतोलेः त्याक्उ। इत रौ जीङः दोःसाकायः नाङ्इ नाःतो मान्तालम्कोः मीक्हाङः छ्यानःती तोतोक् बेलाहाङः परमेस्वर्इ गोत्तेःआ। 13 लौ सबै थोक्कायः जीङः बयःसा परमेस्वर्कोः मीक्हाङःमा पोन्तीयस् पीलातस्कःहाङः पेतो छ्यानःती तोओ येसु ख्रीस्कोः मीक्हाङःमा इत तोनेःनाङ् बा। 14 ङीकोः प्रभु येसु ख्रीस्कोः थाती वाङ्नम् दीन् पुत्धाङ्माःच्युक्हाङःकायः ओउः ङाइ तोओ कुरा पेतो नीङ्ओ ल्हुङ्इलेः जाङ्ह्उ दा। 15 ख्रीस्कोः थाती वाङ्ओपाय् परमेस्वर्इ लयःकोः क्रोःओ बेलाहाङः छ्यानःनौ। ओउःपाय् अरुसै पेओ ग्वम् नाःओ हुकुम् बयःओ लेःआः राजालम्कोः राजामा प्रभुलम्कोः प्रभु लेःआः। 16 ओउःपाय् झुङ्आले गलकायःमा मुआ गलकायःमा मुलेःनाः ओउःच्युक् आङ्ग थाङ्ग त थोङ्ओहाङः मुती झ्यान्ते सुइमा ओउःकःताङ् वाङ्सा खाय्नीली। ओउःकायःपाय् सुइमा च्यवःआक्नीली सुइमा च्यवःसा खाय्नीली। ओउःपाय् जुगुलाङःहाङः एङःतोमा ग्वम् नाःओ स्याव्पाः माः ओउःतलेः स्याव्पाः। 17 ल्हाव्ह्दैबाङ्कोः नाःतो नाःओलम्कायः “लौ अरुलम्कायः मीतो योतेःचानी” त दाय्ह्ती तोउसु दा। फेरी “तेन्छ्याङ्कोः क्युओ पैसालम् थोक्लम् चोङाय्तोलेः योतेःचानी ओउः देङी वाय्सा खेःओ थोक्पाय् खेःल ङीकायः सबै पेओ दोःताक्सा परमेस्वर्इ बयःसा खाल्कायः चोङाय्तोलेः योती ल्युङ्ह्ती मुन” तमा दाय्ह्ती तोउसु। 18 ओउःमयःइ नाःतो पेओ काम्लम् जाङ्ह्ती आय्ह्ओ ल्हुङ्इ नाःतो नाःमालोलम्कायः बयःपानानी। 19 ओउःहाङःसै ओउःमयःइ लोनेः वाङ्सा दीन्कायः आन पेओ काम् जाङ्ह्झ्याङ्कोः सेती गम्ती ओउःमयः दोङ् रौ जीङःपाय् दोःनै। 20 अ तीमोथीय नाङ्खेकायः बयःओ कुरापाय् पेतोलेः ल्हुङ्हाङः गम्उ दा। अरु मान्ताखेइ “लौ इ पेओ व्हाय्ओ कुरा लेःआः” त दाय्ह्ती दोङ्सीलेः आह्रे व्हाय्मालो कुरा नोःनै। ओउः कुरापाय् गलमा सायःतेःचनौ। 21 यात्नीस् ओउःत नोःओलम् ख्रीस्कायः ङ्हाम्ओ फेआकानी। लौ नीङ् सबैकायः परमेस्वर्इ योनःती योतेःपै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.