१ तीमोथी 5 - चेपाङ1 थालवःपाकायः खह्र्तोलेः जान्लाम् लयःकोः आपालो लेखालेः “नाङ्कोः काम्पाय् इत पेतो जाङ्ह्उ” त तेती तोउ दा। अरु मान्तालम्खे नाङ्कोः हौलो लेखालेः तोउ। 2 ओउःतलेः दीक्पाल् आमाकायःमा लयःकोः आमालो लेखालेः तोउ। अरु मोमःचोःलम्खे नाङ्कोः हौद्याङ्लो लेखा पेओ ल्हुङ् तोउ दा। 3 बुधामा चोःमा नाःमालो बुधीलम्खेकायः पेतो स्यास्उ दा। 4 बुधा सीओ मोमःचोःपाय् चोःलम् प्लोमःलम् नाःओ त खेःया ओउः चोःलम् प्लोमःलम्इ परमेस्वर्इ तोओ कुरा ग्याती ङ्हाम्ती लयःकोः कीम्कोः काम्पाय् पेतो जाङ्ह्पानी ओउःत हायःती ओउःमयःइ लयःकोः आमा आपाइ ङ्हा स्यास्ती बयःओ पाय्क्ती परमेस्वर्कायः म्रोताक्नानी। 5 सुसु बुधा सीओ मोमःचोःपाय् चोःलम् प्लोमःलम् जुगाङ् नाःमालो मुनै ओउःपाय् परमेस्वर्कायः पेतो ङ्हाम्ती न्हीदीङ्मा याह्दीङ्मा ओउःकायः तेती तोनानी। 6 सुसु बुधा सीओ मोमःचोःखे लुङ्ह्जेःती मुनै ओउःपाय् द्याह् सीओ लेखालेः मुनै। 7 “ओउः मोमःचोःलम्कायः सुइमा गाल्तुम्ती नोःलाम्” त दाय्ह्ती ओउः ङाइ तोओ कुरापाय् सबैकायः तोउ दा। 8 ओहाङःसै यात्चाक् लयःकोः मान्तालम्कायः स्यास्सा ग्याल त खेःया न्हाङ्तोलेः लयःकोः कीम्कोः मान्तालम्कायः लयःकोः आमा आपा बाजा बज्यय् स्यास्सा ग्याल त खेःया ओउःइ ख्रीस्कोः स्यान्राय् फेआकान् ङ्हाम्मालो मान्तासै पेमालो स्याव्नाः। 9 साथी बर्स पुत्धाङ्मालोहाङः बुधा सीओ मोमःचोःकोः मय्ङ्पाय् अरु बुधा सीओ मोमःचोःलम्कुस् स्यास्साकायः लेखलाम्। मोमःचोःकोः मय्ङ् लेखसाकायः ओउःपाय् यातैज्याङ् बुधाकुस् ह पाय्ह्ओ स्याव्नाः। 10 ओउः मान्ताइपाय् पेओ काम् जाङ्ह्ओकायः अरुइ तय्ह्पाःथास। फेरी ओउःमयः लयःकोः चोःलम्कायः पेतो स्यान्ओ खेःओ खेःतो अरु मान्ताकायः कीम्हाङः पेतो रोम्ओमा ङ्हाम्ओलम्कायः पेतो स्यवओमा खेःओ खेःतो। लीह्सीःओ गोरःओलम्कायः लव्ह्ओमा सबै पेओ काम्लम् जाङ्ह्ओ खेःओ खेःतो। 11 सुसु बुधा सीओ मोमःचोः साथी बर्स पुत्धाङ्माःतो मुनै ओउःकोः मय्ङ् लेखलाम्। दोह् हायःती दाय्ह्सा ओउःमयः लयःकोः ल्हुङ्कोः मोह्हाय्ओ झाक्ती ख्रीस्कायः काम् जाङ्ह्ओ फेती अरु गोय्चोःकुस् पाय्ह्सा बोङःनानी। 12 ओउःमयःइ ख्रीस्कायः ङ्हा तोती गम्ओ कुरा फेती झ्यान्ते अरुइ गाल्तुम्ती नोःनाःथास। 13 फेरी ओउः मोमःचोःलम् लुङ्ह्जेःतो स्याव्ती कीम् कीम्ताङ् छ्युह्तीलेः आल्नै। ओहाङःसै न्हाङ्तोलेः पेमाःत हायःती ओउःमयः अरुकायः पेमालो कुरा नोःनै। 14 ओउःत झ्यान्ते ओउः बुधा सीओ मोमःचोःलम् “अरु बुधाकुस् पाय्ह्पै” त दाय्ह्ती गानाक्ती तोनाङःसु। ओउःत हायःती ओउःमयः चोः दोःती लयःकोः कीम्कोः काम् जाङ्ह्सा खाय्नानी ओहाङःसै ओउःमयःकायः बीरोत्इ गाल्तुम्ती तोसा खाय्उलु। 15 यात् नीस् मोमःचोःइपाय् देङीलेः सैतान्कोः कुरा जाङ्ह्नानी। 16 लयःकोः मान्ताकःहाङः सुसु ङ्हाम्ओ मोमःचोःकोः बुधा सीओ मोमःचोः मुनै ओउः मोमःचोःकायः ओउः मान्ताइलेः स्यास्सा खेःतो। अरु ङ्हाम्ओलम्इ ओउः मोमःचोःकायः स्यास्सा परमाःत झ्यान्ते अरु मान्ता सुमा नाःमालो मोमःचोःलम्कायः स्यास्सा खाय्नानी। 17 सुसु दीक्पाल्लम्इ ङ्हाम्ओलम्कायः पेतो स्यालःनाःथास ओउःकोः काम् जाङ्ह्झ्याङ्कोः नीस् भाक् बयःपाःथै। सुसुइ ङ्हाम्ओलम्कायः पेतो स्यान्नाःथास येसुकोः कुरा पेतो थोल्ह्ती तोनाःथास न्हाङ्तोलेः ओउःकायः नीस् भाक् दोःपाःथै। 18 दोह् हायःती दाय्ह्सा “गहुङ् लैओ स्याःकायः मौला लावताक्लाम्” त दाय्ह्ओमा “काम् जाङ्ह्ओ मान्ता ओउःकोः काम् जाङ्ह्झ्याङ् दोःपाः” तमा आखरःहाङः लेखती मुनाः। 19 ओहाङःसै “ओउःइ रेव्ओ काम् जाङ्ह्ओआः” त दाय्ह्ती अरुइ यात्चाक् ङ्हाम्ओलम्कायः स्यालःओ दीक्पाल्कायः गाल्तुम्ती तोसा बोङःनानी त खेःया ओउःमयःइ नीस् सुम्चाक् ओउःकोः रेव्तो जाङ्ह्ओ च्यवःओलम्कायः वानःसा खेःतो ओहाङःसै ओउःमयः गाल्तुम्ती तोओ पाःती तोसा खाय्नानी। पाःती तोओलम् नाःल त खेःया ओउःकोः गाल्तुम्ती तोओ सायःतेःचनौ। 20 सुसुखे रेव्तो जाङ्ह्आकानी ओउःकायः अरु ङ्हाम्ओलम्कोः मीक्हाङः जान्उ ओहाङःसैको अरुलम्इ ओउः मान्तालो लेखा रेव्तो हायःसा रैनै। 21 लौ इ ङाइ तोओ कुरापाय् पेतो जाङ्ह्उ दा सुकायःमा ताङ्ह्ओ मान्ताकायःमा मीओकायःमा घार्ती योउ दा सुकायःमा अरुसै न्हाङ्तोलेः बयःतेःचनौ। एत नाङ्इ परमेस्वर्कोः मीक्हाङःमा येसु ख्रीस्कोः मीक्हाङःमा ओउःकोः लाङ्काहाङः मुओ ल्होक्ओमयःकोः मीक्हाङःमा पेतो जाङ्ह्उ दा त ङाइ तोनेःनाङ् बा। 22 ङ्हाम्ओलम्कायः काम् जाङ्ह्सा मान्ताकायः रेन्ह्तोलेः छ्युङ्ह्ती क्रुत् झाम्ह्ती काम् जाङ्ह्ताक्तेःचनौ। रेव्तो जाङ्ह्ओलम्कुस् वाह्तेःचानाः उया नाङ्मा रेव्तो स्याव्तेःनाः छय्ङ्तोलेः मुतेःपाः। 23 नाङ् ग्रुतेःनाः त झ्यान्ते तीः ह तुङ्लाम् नाङ्कोः तुक्कायः बल धाक्सायःकोः तीःमा तुङ्उ दा। 24 कोय् मान्ताकोः रेव्ओ काम्लम् सबैकायः छ्यानःतो लेःआः ओउःमयःकायः गाल्तुम्ती तोसा परल। अरुलम्कोः रेव्ओ काम्लम्पाय् गाल्तुम्ती तोआक्तीको ह लोने छ्यानःओलेः स्याव्नाः। 25 ओउःलो लेखालेः कोय् मान्ताकोः पेओ काम्लम् सबैकायः छ्यानःतो लेःआः अरु ङ्हा छ्यानःआक्मालो पेओ कुरालम्मा लोन्तेः छ्यानःतोलेः स्याव्सा खेःतो |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.