१ तीमोथी 4 - चेपाङ1 “लोनेः स्याव्सा बेलाहाङः यात्नीस्चाक्इ ख्रीस्कायः ङ्हाम्ओ फेनानी” त दाय्ह्ती परमेस्वर्कोः ग्वालामःइ दोङ्ह्तोलेः तोआकान्। ओउः मान्तालम्इपाय् दोङ् कुरा फेती लान्इ बयःओ माःती तोओ कुरा ह सायःनानी। 2 ओउः पेमालो कुरा माःती तोओलम्पाय् दोह् खेःयामा रेव्ओ काम् जाङ्ह्सा ग्यानै। ओउःमयःइपाय् ल्हुङ्हाङः परमेस्वर्कोः कुरा दोह्मा चीःनीली ओउःमयःकोः ल्हुङ्पाय् जुगाङ् पेल। 3 ओउःमयःइ “गोय्चोःकायः कमा वानःसामा स्याव्ल मोमःचोःकायः भाव्कः पाय्ह्सामा स्याव्ल” त दाय्ह्तीमा “कोय् जेःगा जेःसा स्याव्ल” त दाय्ह्तीमा स्यान्नानी। ओउःमयःइ तोओपाय् दोङ् कुरा खेःल बा। सबै जेःगालम्पाय् दोङ् कुरा ङ्हाम्ओलम्इ परमेस्वर्कायः “च्युता” त तोआक्तीको जेःसा स्याव्लेःनाः। ओउःत हायःसाकायः परमेस्वर्इ इ जेःगा जाङ्ह्ती बयःआतय्ही। 4 परमेस्वर्इ जाङ्ह्ओ थोक्लम् सबै पेलेःनै ओउःकायः “च्युता” त तोआक्तीको दोह् खेःयामा त्याक्सा स्याव्नाः। 5 ओउः जेःगा त्याक्नु दोह् हायःती दाय्ह्सा ओउःत परमेस्वर्कायः तोधार्नालेः ओउःकोः नोःराय्इ ओउः थोक्लम् छय्ङ्ताक्नौ। 6 इ कुरापाय् नाङ्इ अरु ङ्हाम्ओ पुःचोङ् हौचोङ्कायः स्यान्तेःनौ त खेःया येसु ख्रीस्कोः काम् पेतो जाङ्ह्तेःनौ। ओउः दोङ् ङ्हाम्ताक्सा कुरा सायःतीमा ओउः पेओ स्यान्राय् ग्याती जाङ्ह्तीमा नाङ्इ व्हाय्तोलेः वाह्सा खाय्तेःनौ। 7 ओउः उय्ह्लेकोः दोङ् कुरा खेःमालो ल्हाक्राय्कोः खाल्लम्मा अरु आह्रे नोःओमा सायःतेःचौ ओउः कुरापाय् दोह्मा हायःउलु। परमेस्वर्कोः ल्याम्हाङः वाह्सा बोङःउ। 8 दोम्इ वाह्ओखेइ मान्ताकायः पेतो स्याव्ताक्उलु परमेस्वर्कोः काम् जाङ्ह्ती वाह्ओखेइ मान्ताकोः जीङःकायः आन पेतो स्याव्ताक्नौ। तेन्छ्याङ्कोः जीङःकायःमा पेलेःनाः लोने दोःसा रौ जीङःकायःमा पेलेःनाः। 9 इलेः दोङ् ङ्हाम्सीःओ कुरा लेःआः इपाय् पेतो सायःउ दा। 10 ङी परमेस्वर्कोः काम् आन त्युस्तीलेः जाङ्ह्धै मुनाङी दोह् हायःती दाय्ह्सा ङीइ ओउः दोङ् जीङः नाःओ परमेस्वर्कायः झाह्ती ल्युङ्ह्ती ङ्हाम्नाःतय्ह्नी ओउःपाय् सबै मान्ताकायः दल्ताक्नाःथास। माः रैस ओउः ङ्हाम्ओलम्कायः ओउः न्हाङ्तोलेः दल्ताक्नाःथास। 11 ओउः कुरापाय् स्यान्ती तोउ दा। 12 नाङ् थालवःपा स्याव्तेःधाङ्ल ओउःत खेःओ अरुलम्इ नाङ्कायः मीतो योताक्लाम्। सबैकायः गत हायःती पेतो नोःसा गत हायःती पेतो वाह्सा राप्सा ङ्हाम्सा छय्ङ्तो स्याव्सामा इ सबै छ्यानःउसु दा। 13 ङा वाङ्धाङ्माःच्युक्कायः परमेस्वर्कोः आखरः अरुलम्कायः पह्रमाउसु ओउःमयःकायः लव्ह्ती तोती स्यान्माउसु। 14 फेरी नाङ् परमेस्वर्कःसै दोःओ ग्वम्इलेः काम् जाङ्ह्उ दा। ओउः ग्वम्पाय् परमेस्वर्कोः कुरा छ्यानःओलम्इ नोःधार्नालेःमा ङ्हाम्ओलम्कायः स्यालःओ थालवःपालम्इ क्रुत् झाम्ह्तीमा ओउः बेलाहाङः बयःओ खेःतो। 15 इ कुरापाय् म्हेःमाःत ल्हुङ्हाङः घीःतीलेः धुःती जाङ्ह्उ ओहाङःसैको नाङ् गुच्युक् व्हाय्तोतेः स्याव्तेःओ त अरुइ च्यवःसा खाय्नानी। 16 लयः वाह्ओमा लयःइ स्यान्ओमा पेतो चीःती हायःउ ओउःत हायःधार्ना नाङ्इ लयःकायःमा नाङ्कोः कुरा सायःओलम्कायःमा दल्ताक्तेःनौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.