१ तीमोथी 3 - चेपाङ1 इपाय् दोङ् नोःराय् लेःआः। यात्चाक्इ ङ्हाम्ओलम्कोः स्यालःओ मान्ता स्याव्सा झाक्नाः त खेःया ओउःत हायःसा पेलेःनाः। 2 स्यालःओ मान्तापाय् नीङ्ओ ल्हुङ् नाःओ मान्ता खेःतो ओउःपाय् यातैज्योः बुधी वानःओ मान्ता खेःतो। फेरी ओउः मान्तापाय् व्हाय्ओमा गेओ ल्हुङ् नाःओ मान्ता खेःसा खेःतो अरुकायः वाङ्ह्ती रोम्ओ मान्ता खेःसा खेःतो अरुकायः स्यान्सा खाय्सा खेःतो। 3 ओउःपाय् हान् तुङ्ती ङोओमा खह्र्ओ मान्ता खेःसाकायः स्याव्ल काङ्ओ नीङ्ओ ल्हुङ् नाःओ खेःसाआः बा। फेरी ओउः मान्तापाय् पैसा क्युती मोह्हाय्ओ ल्हुङ् नाःसा स्याव्ल। 4 ओउःपाय् लयःकोः कीम्कोः मान्तालम्कायः पेतो गानाक्ती तोसा चीःओ मान्ता खेःतो। ओउःइ तोओ कुरा ओउःकोः लयःकोः चोःलम्इ ग्याती सायःसा खेःतो। 5 दोह् हायःती दाय्ह्सा यात्चाक्इ लयःकोः कीम्कोः मान्तालम्कायः गानाक्ती तोसा खाय्उलु त खेःया ओउःइ सबै परमेस्वर्कायः ङ्हाम्ओलम्इ गत हायःती गानाक्ती तोसा खाय्चौ र। 6 फेरी ओउः स्यालःओ मान्तापाय् चोक्ओ ल्हुङ्तुक्इ ङ्हाम्ओ मान्ता खेःतो तोहा ङ्हाम्ओ मान्तापाय् लयःकोः नेह्रो ओर्ताक्ती सैतान्लो लेखा वाय्तोलेः स्याव्नाः यादो। 7 ओउःकायःपाय् ङ्हाम्ओलम्कुस्इ झुङ्आले खेःल ङ्हाम्मालोलम्मा “ओउःपाय् पेओ मान्ता लेःआः” त नोःसा खेःतो। ओहाङःसैको ओउःकायः अरुइ गाल्तुम्ती नोःसा खाय्नीली ओउःकायः सैतान्इ थ्योन्ह्ती होम्सा खाय्थाल। 8 ङ्हाम्ओलम्कायः काम् जाङ्ह्ओ मान्तामा पेओ ज्योओ मान्ता खेःसा खेःतो। ओउःपाय्लेः ब्रेह्ती माःती नोःओमा आन हान् तुङ्ओमा पैसा क्युसा मोह्हाय्ओमा स्याव्ल। 9 परमेस्वर्इ छ्यानःओ कुरा ओउःइ दोङ्सीलेः पेतो ङ्हाम्सा खेःतो। 10 काम् जाङ्ह्सा चुःधाङ्मालोहाङः ओउःकोः ल्हुङ्तुक् योआक्सा खेःतो ओउःकोः ल्हुङ् पेतो छय्ङ्तो ह ओउःइ ङ्हाम्ओलम्कायः काम् जाङ्ह्सा स्याव्लेःनाः। 11 ओउःकोः बुधीमा ओउःतलेः पेतो वाह्सा खेःइतो माःती गाल्तुम्ती तोओपाय् स्याव्ल। ओउःपाय् लीङ्हायःमामाःत बाय्मामाःत काम् पेतो जाङ्ह्पनौ। 12 ओउः ङ्हाम्ओलम्कायः काम् जाङ्ह्ओ मान्तामा यातैज्योः बुधी वानःओ मान्ता खेःतो। लयःकोः चोःलम्कायःमा कीम्कोः मान्तालम्कायःमा पेतो गानाक्ती तोसा खेःतो। 13 ओउःत हायःआक्तीको ओउःकायः अरुलम् पेतोलेः नोःकाय्नै ओहाङःसैको ओउःइ येसु ख्रीस्कायः ङ्हाम्सा कुरा फुती तोसा खाय्नौ। 14 इ चेती लेखसापाय् लेखनेःनाङ्स नाङ्कःताङ् रेन्ह्तोलेः वाङ्सा झाक्नाङः 15 खेःल ङा रेन्ह्तोलेः वाङ्सा दोःङल त खेःया इ चेतीकोः कुरा पह्रआक्तीको परमेस्वर्कोः चोःयाङ्लम् त तोओ ङ्हाम्ओमयःकःहाङः “गत हायःसा पेलेःनाः” त चीःसा खाय्तेःनानी। माः रैस ओउः जीङः नाःओ परमेस्वर्कोः ङ्हाम्ओमयःकःहाङः ओउःकोः दोङ् कुरा सेती गम्ओ लेःआः। 16 दोङ्सीलेः ङीकोः ङ्हा चीःआक्मालो ङ्हाम्ओ कुरापाय् आन ताङ्ह्जेःनाः बा। ओउः कुरा इलेःआः। “येसु ख्रीस्पाय् मान्ताकोः आङ्हाङः थाती वाङ्ओआः। ओउःकायः ‘परमेस्वर्कोः ग्वालामःइ जुगाङ् छय्ङ्तो लेःआः’ त छ्यानःआकान् ओउःकायःमा परमेस्वर्कोः लाङ्कासै ल्होक्ओमयःइ च्यवःआथै ओउःकोः कुरापाय् देस् देस्ताङ् थोल्ह्ती तोओआः। थोल्ह्ती तोआक्तीको ल्हाव्ह्दैबाङ्कोः मान्तालम्इ ओउःकायः ङ्हाम्आकानी ओहाङःसै ओउःकायः ताङ्ह्ताक्साकायः त्यावःताङ् लनःआथै” त दाय्ह्ओ मुनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.