१ तीमोथी 2 - चेपाङ1 लौ उया “परमेस्वर्कः तेती तोओ बेलाहाङः ङ्हापाय् सबै मान्ताकायः तेती तोनु। ओउःमयःकायःमा ‘च्युता’ त तोसा खेःतो” त दाय्ह्ती तोनेःनाङ्। 2 राजालम्कायःमा अरु हुकुम् बयःओलम्कायःमा तेती तोनु ओउःमयःइ पेतो हायःनानी त खेःया ङी लीह्माःत ल्हुङ् धोमाय्तो स्याव्ती परमेस्वर्कः एङःती ओउःकोः काम् पेतो जाङ्ह्ती मुसा दोःनाःतय्ही। 3 एत हायःओपाय् पेलेःनाः ङीकायः दल्ताक्ओ परमेस्वर्कायः म्रोताक्नाःथै। 4 दोह् हायःती दाय्ह्सा ओउःपाय् “लौ सबै मान्तालम् दल्तो स्याव्ती दोङ् कुरापाय् चीःपानी” त झाक्ती दाय्ह्नाः। 5 ओउः परमेस्वर्पाय् यातैज्योः लेःआः फेरी मान्ताकायः परमेस्वर्कःताङ् वानःसाचाक्मा यातैज्याङ् लेःआः ओउः मान्तापाय् येसु ख्रीस् लेःआः बा। 6 ओउःइ सबै मान्ताकायः लयःकोः आङ् ल्हाङःती बयःआकान्। ओउःत हायःधार्नापाय् “परमेस्वर् सबैकायःलेः दल्ताक्सा झाक्नाः” त क्रोःओ बेलाहाङः सबैकायः छ्यानःओ लेःआः। 7 ओउः कुरा छ्यानःती “इ येसु ख्रीस्कोः दोङ् कुरा ङ्हाम्नु” त ङाइ थोल्ह्ती तोसाकायःमा परमेस्वर्इ ङाकायः यहुदी खेःमालो मान्तालम्कःताङ् छ्युङ्ह्ती ल्होक्आताङः। एत दाय्ह्ती ङाइ माःती तोओ खेःल दोङ् कुरालेः तोनेःनाङ् बा। 8 ङ्हाम्ओलम् हुम्लाङ् वाङ्तोक्हाङः गोय्चोःलम्इ छय्ङ्तो जीक्मालो ल्हुङ्इ काय्काय्मामाःत क्रुत् प्योती परमेस्वर्कायः तेती तोपानी। 9-10 ओउःतलेःमा मोमःचोःलम्इ त्याक्गार्सीःओ नाय् लावपाःइसी। महङ्गो नाय्लम् सुन्कोः मुन्द्रीलम् केङःलम् लावमाःत परमेस्वर्कोः मान्तालो लेखा पेओ काम् जाङ्ह्ती पेताक्पाःइसी। 11 ओउःमयःइ स्यान्ओलम्कः एङःती नोःमामाःत स्यान्पाःइसी। 12 मोमःचोःलम्इ गोय्चोःलम्कायः स्यान्सामा हुकुम् बयःसामा ताक्ङल ओउःमयः नोःमाःत मुसा खेःतो। 13 दोह् हायःती दाय्ह्सा ओउः मोमःचोः हवा त तोओ गोय्चोः आदम् त तोओसै ङ्हा जाङ्ह्ओ खेःल आदम्पाय् ङ्हा जाङ्ह्ओ खेःतो। 14 फेरी सैतान्इ आदम्खेकायः खेःल हवाखेकायः माःती होम्ती रेव्तो काम् जाङ्ह्ताक्आथै। 15 ओउः मोमःचोःइपाय् रेव्तोलेः जाङ्ह्उतो मोमःचोःलम् राप्ओ पेओ ल्हुङ्इ ङ्हाम्नानी त खेःया चोः ओत्ओ बेलाहाङः स्याक्लेःनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.