१ तीमोथी 1 - चेपाङ1 इ चेती ङा पावुल्इ नाङ् तीमोथीकायः लेखती ल्होक्नेःनाङ्। ङीकायः दल्ताक्ओ परमेस्वर्इमा ङीइ झाह्ओ प्रभु येसु ख्रीस्इमा छ्युङ्ह्ती ल्होक्ओ मान्ता ङालेः खेःनाङः। 2 नाङ्इ येसु ख्रीस्कायः दोङ्सीलेः ङ्हाम्तेःनौ त झ्यान्ते ङाकोः चोःलो लेखा मुतेःनाः। नाङ्कायःपाय् ङीकोः परमेस्वर् आपाइमा प्रभु येसु ख्रीस्इमा काङ्तीलेः योनःती योती ल्हुङ् धोमाय्ताक्तेःपाः। 3 मासीदोनीयाताङ् आल्तोक् बेलाहाङः “लौ एफेसस् सहर्हाङः मुअ” त दाय्ह्ती तोनेःनाङ्तो फेरीलेः “एफेसस्हाङःलेः मुअ” त कोदीङःतीलेः तोनेःनाङ् दोह् हायःती दाय्ह्सा ओहाङः दोङ्मालो कुरा स्यान्ओलम्कायः “एत स्यान्लाम्” त दाय्ह्ती तोसातेः खेःनाः। 4 फेरी ओउःमयःकोः आय्कानः तोकानःलम्सै दोःओ आह्रे ल्हाक्राय् कुरालम्मा आन होह्र्कोः कुराकायःमा “इत स्यान्ओ फेनु दा” तमा तोसा खेःतेःनाः। ओउः कुरापाय् परमेस्वर्कोः काम् पेतो स्याव्ताक्उलु स्यान्आक्तीको काय्काय्ओ ह वाङ्आनाः। परमेस्वर्कोः कुरा ङ्हाम्आक्तीको ह ओउःकोः काम् मान्ताइ पेतो स्याव्ताक्सा खाय्नानी बा। 5 नाङ्इ ओउःमयःकायः तोआक्तीको सबैइ परमेस्वर्कोः कुरा चीःओमा पेतो छय्ङ्ओ ल्हुङ्मा दोःती ख्रीस्कायः दोङ्सीलेः ङ्हाम्ती अरुकायः राप्पानी इत हायःसाकायः ङाइ ओउःतलेः तोनेःआलाङ्। 6 एत हायःओसै यात्नीस्चाक् फेती लयःकोः आह्रे नोःकाय्ओ ह झाक्तीलेः वाह्नै। 7 ओउःमयःइपाय् परमेस्वर्कोः ऐन् स्यान्ओलम्लो लेखा स्याव्सा बोङःनानी लयःकोः नोःकाय्ओ कुरामा स्यान्ओ कुरामा पेतो व्हक्तोलेः चीःइसीली। 8 “काम् पेतो जाङ्ह्साकायः ओउः ऐन्पाय् पेलेःनाः” त चीःनाङःसु। 9 ओउः ऐन्पाय् पेओ मान्ताखेकायः जाङ्ह्ओ खेःल जुगाङ् पेमालो मान्तालम्खेकायः जाङ्ह्ओ लेःआः बा। परमेस्वर्कोः कुरा सायःसा ग्यामालोलम्कायःमा पेमालो ल्हुङ् नाःओलम्मा आमा आपाकायः सात्ओलम्मा अरु मान्ताकायः सात्ओलम्कायःमा जाङ्ह्ओ लेःआः 10 फेरी ल्हास्या मान्तालम्कायःमा गोय्चोः गोय्चोःकुस् च्योत्काय्ओलम्कायःमा कुःओ स्योलम् माःती तोओमा गाल्तुम्ती तोओ मान्तालम्मा सबै रेव्तो जाङ्ह्ओलम्कायःमा ओउः ऐन्पाय् जाङ्ह्ओलेः खेःतो। दोह् दोह्लेः दोङ् पेओ स्यान्ओलम्इ “इ रेव्ओ काम् लेःआः” त दाय्ह्ती स्यान्नानी ओउःकायः छ्यानःसाकायःलेः ओउः ऐन्पाय् बयःओ खेःतो। 11 ओउः दोङ् स्यान्राय्पाय् ङीकोः सबैसै पेओमा ताङ्ह्ओ परमेस्वर्इ बयःओ पेओ समचार् लेःआः बा। ओउः पेओ समचार् थोल्ह्ती तोसाकायः परमेस्वर्इ ङाकायःलेः बयःआताङः। 12 फेरी ओउः काम् जाङ्ह्साकायः ङीकोः प्रभु येसु ख्रीस्इ ङाकायः ङ्हाम्ती “ओउःइ ङाकोः काम् जाङ्ह्लेःनौ” त दाय्ह्ती ङाकायः छ्युङ्ह्आताङः। छ्युङ्ह्आक्तीको ओउःइ ग्वम् बयःआताङः ओउःत झ्यान्ते ओउःकायः ङाइ द्याह् “च्युता” त तोलेःनाङः। 13 ओउःतलेः ख्रीस्इपाय् ओउःकोः काम् जाङ्ह्साकायः बयःताङःतो ङ्हापाय् ङाइ ओउःकायःमा अह्र्सीःओ योती आन रेव्तो तोआलाङः ओउःकोः मान्तालम्कायःमा ङाइ आन लीह्सीःओ बयःआलाङःसु। बयःसापाय् बयःआलाङःसु ओउः बेलाहाङः ङाइ चीःमामाःत ङ्हाम्मामाःत जाङ्ह्आलाङः त झ्यान्ते परमेस्वर्इ योनःतीलेः योआताङः। 14 माः रैस ङीकोः प्रभुइ ङाकायः आन योनःती योती ओउःइ ङाकायःपाय् येसु ख्रीस्सै दोःओ राप्ती ङ्हाम्ओ ल्हुङ् बयःआताङः। 15 लौ इलेः दोङ् ङ्हाम्सीःओ कुरा लेःआः इपाय् पेतो सायःउ दा। रेव्ओ काम् जाङ्ह्ओलम्कायः दल्ताक्सा थेङा येसु ख्रीस्पाय् ल्हाव्ह्दैबाङ्ताङ् वाङ्ओआः फेरी रेव्तो जाङ्ह्ओलम्कोः ङापाय् सबैसै रेव्तो लेःआः ङ। 16 ओउःत झ्यान्ते प्रभुइ योनःती योती ङाच्युक् रेव्ओ मान्ताकायः येसु ख्रीस्इ आन काङ्तो हायःआताङः। ङाकायःपाय् ङ्हालेः ओउःकोः योनःती योओ काम् जाङ्ह्ती “लौ नीङ्मा ओउःलो लेखालेः दोःतेःनै” त अरु लोने ङ्हाम्ती रौ जीङः दोःओलम्कायः छ्यानःनाःथास। 17 द्याह् ओउः गलमा सीमालो च्यवःसा खाय्मालो राजा त तोसा ओउः यातैज्योः परमेस्वर्लेः ओउःपाय् गलकायःमा ताङ्ह्ओमा एङःसीःओमा स्याव्पाः माः है ओउःतलेः स्याव्पाः। 18-19 लौ तीमोथी हौय इ कुरा ङाइ द्याह् तोनेःनाङ्। ओहाङःसै परमेस्वर्इ नाङ्कायः ङ्हा तोती गम्ओ कुरा ताप्ताक्साकायः ओउः कुरा गीलती नाङ् ग्रमःत मुती परमेस्वर्कोः कुरा चीःती ओउःकायः पेतो ङ्हाम्ती वाह्सा खाय्तेःनौ। यात्नीस्चाक्इ ओउःत हायःओ फेती झ्यान्ते ओउःमयःकोः ङ्हाम्ओपाय् द्याह् वाय्ओ लेःआः। 20 ओउःमयःकोः य्हुमेनीयस् त तोओमा आलेक्जान्द्रीया त तोओ मुनाःच। ओउःनीस्इ “परमेस्वर्कायः पेमालो तोलाम्” त स्यान्साकायः ङाइ सैतान्कायः दाक्आलाङःचु। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.