१ थेसलोनिकि 5 - चेपाङ1 लौ पुःचोङ् हौचोङ्य इ कुरा गल स्याव्नाः दाय्ह्सा नीङ्कायः लेखती तोसा परल। 2 ओउः कुराकायःपाय् “गतलो वाङ्नाः” त नीङ्इ लयः चीःतेःनानी। याह्दीङ्हाङः वाङ्ओ कुःसा बोङःओ मान्ता “गल वाङ्चाः” त अरु सुइमा चीःआक्नीली। ओउःलो लेखालेः प्रभु वाङ्सा खेःओ दीन्पाय् “गल वाङ्नाः” त मान्ता सुइमा चीःआक्नीली। 3 गलखा मान्तालम् “लौ पेतोलेः मुनाःतय्ही दोह्मा वाङ्ल द्याह्” त दाय्ह्ती नोःकाय्नै ओउः बेलाहाङःलेः मोमःचोःकोः चोः ओत्सा जीक्ओलो लेखालेः ओउः मान्तालम्कःताङ् रोमो तोकोलेः आन दुक्तो खह्र्तो वाङ्नै। ओउःत व्हक्मालो नोःकाय्ओ मान्तालम्इ दल्सा जुगाङ् खाय्नीली। 4 ओउःमयःखेइ दल्सा खाय्नीली नीङ्खे च्याक्ओहाङः मुओ चीःमालो मान्तालम् खेःतेःइली ओउःत झ्यान्ते प्रभुकोः वाङ्सा खेःओ दीन्पाय् कुःओ चोर्लो लेखालेः पाह्र् पाह्र् दाह्ती वाङ्तोक्हाङः नीङ्खे क्रम्तो ग्रीनःतेःइसीली। 5 ङीपाय् थोङ्ओ न्हीदीङ्हाङः वाह्ओ मान्तालम्खे खेःनाःतय्ही च्याक्ओ याह्दीङ्हाङः वाह्ओलम्खे खेःतय्हीली। 6 ओउःत झ्यान्ते अरुलो लेखालेः ङीखे न्हील्ह्ती एनःओ मान्तालो लेखा मुसा स्याव्ल म्र्यातो व्हक्ती मुसा खेःनाःतय्ही। 7 एनःसा खेःओ मान्तालम्पाय् याह्दीङ्हाङः एनःनै हान् तुङ्ओलम्मा याह्दीङ्हाङः ङोनै। 8 ङी न्हीदीङ्कोः मान्तालम्खे ल्हुङ् म्र्यातो स्याव्ती राप्ओ ङ्हाम्ओ ल्हुङ् दोःती “लौ ङी पेतो दल्नाःतय्ही” त म्हर्ती चोङाय्तीलेः ल्युङ्ह्ती मुन। 9 ङीकायः न्युम्ह्ताक्साकायः परमेस्वर्इ छ्युङ्ह्आतय्ही खेःल। ओउः न्युम्ह्ओसै ङीकोः प्रभु येसुइ दल्ताक्नाःतय्ही ओउःत स्याव्साकायः परमेस्वर्इ छ्युङ्ह्आतय्ही। 10 ङीकायः दल्ताक्साकायः येसुपाय् सीओआः ओहाङःसैको ओउः वाङ्तोक्हाङः ङी सीयाकायःमा सेलः मुयाकायःमा गाव् खेःयाकायःमा ङी ओउःकुस् मुसा दोःनाःतय्ही। 11 ओउःत चीःती लयःमयः लुङ्काय्धै लव्ह्काय्धै मुन। नीङ्इ द्याह् लेखालेः ओउःत हायःनु दा। 12 लौ पुःचोङ् हौचोङ्य नीङ्कःहाङः परमेस्वर्कोः काम् जाङ्ह्ओ स्यालःओमा स्यान्ओ मान्तालम्कायःमा “ओउःमयःकायः पेतो हायःनु दा” त नीङ्कायः तेती तोनेःनाङ्सु। 13 ओउःमयःइ जाङ्ह्ओ काम्कायः राप्तीमा एङःतीमा योनु। लयःमयःकुस् काय्काय्मामाःत ब्राङ्काय्ती मुन। 14 “लीङ्हायःओलम्कायः गानाक्ती तोनु रैओलम्कायः लुङ्तीलेः तोनु। पेतो हायःसा चीःमालोलम्कायः लव्ह्नु सबैकः ल्हुङ् मल्ह्काय्माःत मुन” त तोनेःनाङ्स। 15 यात्चाक्इ नीङ्कायः पेमालो हायःतेःनै त खेःया ओउःकायः पेमालो पाय्क्लाम्। गलकायःमा लयःमयःकायःमा सबैकायःमा पेतो काङ्तीलेः हायःनीङ्इसी दा। 16 फेरी गलकायःमा चोङाय्ती मुन। 17 परमेस्वर्कायः दीःमामाःत तेती तोनु। 18 दोह् खेःयाकायःमा ओउःकायः “च्युता” त तोनु। नीङ् येसु ख्रीस्कायः ङ्हाम्ओलम्इ ओउःत हायःतीलेः वाह्ओपाय् परमेस्वर् झाक्आनाः। 19 म्हेः सीती म्हीत्ताक्ओ मान्तालो लेखातेः परमेस्वर्कोः ग्वालामःइ जाङ्ह्ओ काम्तेः त्याःतेःचानी। 20 मान्ताइ छ्यानःओ परमेस्वर्कःसै वाङ्ओ कुरालम्कः अह्र्तेःचनै। 21 सबै कुरा वेलःती योनु पेओखे गम्नु। 22 सबै पेमालोखे चल्ती वाय्नु। 23 ओहाङःसैको ओउः ल्हुङ् धोमाय्ताक्ओ परमेस्वर्इ नीङ्कायः पेतोलेः छय्ङ्ताक्तेःपै। नीङ् ल्हुङ्तुक्मा आङ्मा वाहीमःमा ङीकोः प्रभु येसु ख्रीस्कोः वाङ्सा खेःओ दीन्कायः नीङ्तोलेःतेः मुपै। 24 नीङ्कायः छ्युङ्ह्ती गोत्ओ प्रभुइ ओउःतलेः हायःनौ दोह् हायःती दाय्ह्सा ओउःकायः नीङ्इ आह्रेलेः ङ्हाम्ओ खेःल बा। 25 लौ पुःचोङ् हौचोङ्य ङीकायःमा परमेस्वर्कः तेती तोताङी दा। 26 सबै ङ्हाम्ओलम्कायः झाह्ती नमस्ते ल्होक्नेःनाङ्स 27 इ चेती सबै ङ्हाम्ओलम्कायः पह्रनु दा एत ङाइ प्रभुकोः मय्ङ्हाङः तोनेःनाङ्स बा। 28 लौ नीङ्कायः ङीकोः प्रभु येसु ख्रीस्इ योनःती योती आनतेः बयःतेःपनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.