१ थेसलोनिकि 4 - चेपाङ1 लौ उया पुःचोङ् हौचोङ्य परमेस्वर्कायः म्रोताक्ती वाह्सा कुरा स्यान्नेःआलाङ्स आने दोङ्सीलेः नीङ् ओउःतलेः वाह्तेःनै बा। द्याह् प्रभु येसुकायः ङ्हाम्तेःनानी त झ्यान्ते “ओउःत न्हाङ्तोलेः पेतोलेः हायःनु दा” त नीङ्कायः ङीइ आन तेती तोनेःनाङ्स। 2 ङी प्रभु येसुसै दोःओ गानाक्ती तोओ कुरापाय् नीङ्कायः बयःनेःआलाङ्स ओउःत झ्यान्ते ओउः कुरा नीङ्इ चीःतेःनानी। 3 परमेस्वर्पाय् दोह् दोह् झाक्नाः त दाय्ह्सा नीङ् पेतो छय्ङ्तोलेः स्याव्ती ल्हास्याकोः काम् जुगाङ्लेः फेनु एत हायःओ परमेस्वर् झाक्नाः। 4 सबैइ लयःकोः बुधीकायः “गतलो पेतो स्याव्ताक्सा” त चीःसा खेःतो। 5 परमेस्वर्कायः तय्ह्मालोलम्लो लेखालेः बुधीकायः मोह्हाय्ओ ल्हुङ्इ झुङ्आले जाङ्ह्तीतेः वाह्तेःचनै। 6 एत हायःती सुइमा अरु ङ्हाम्ओ हौकायः तोपाल्ती ओउःकोः बुधी आलःतेःचानी उया परमेस्वर्इ न्युम्ह्ताक्तेःनै ओउःत ङीइ ङ्हालेः गानाक्ती तोनेःआलाङ्स बा। 7 दोह् हायःती दाय्ह्सा ङीइ रेव्तो हायःती वाह्साखेकायः खेःल पेतो छय्ङ्तोलेः वाह्साखेकायः परमेस्वर्इ गोत्आतय्ही। 8 सुसु इ कुरा सायःसा ग्यामालो मुचनै ओउःपाय् ङी कुरा स्यान्ओ मान्ताकः एङःमाःत मुओ खेःल ङीकायः लयःकोः ग्वालामः बयःओ परमेस्वर्कःमा एङःमाःत मुनै। 9 ङ्हाम्ओलम्कुस् राप्काय्ती मुन त दाय्ह्ओ ङाइ लेखती तोसा परङल ओउःत हायःसा परमेस्वर्इलेः स्यान्ती तोतेःआकाय्। 10 फेरी ओउः मासीदोनीया देस्हाङः मुओ ङ्हाम्ओलम्कायः नीङ्इ दोङ्सीलेः राप्तेःनानी। राप्सापाय् राप्तेःनानी “न्हाङ्तो राप्ओ ल्हुङ् स्याव्न” त दाय्ह्ती नीङ् पुःचोङ् हौचोङ्कायः तेती तोनेःनाङ्स। 11 ङीइ ङ्हा तोओलो लेखालेः अरुकोः काम् योमामाःत लयःकायः काम् केलःती जाङ्ह्नीङ्इसी 12 ओउःत हायःतीलेः नीङ्कायः योती “दोङ्सीलेः ओउःमयः पेओ मान्तालम् लेःआः इ” त दाय्ह्ती अरु ङ्हाम्मालो मान्तालम् म्हर्नै। फेरी लयःकोः काम् जाङ्ह्ती झ्यान्ते नीङ् दोह्कायःमा अरुकः तेसा परतेःइली। 13 लौ पुःचोङ् हौचोङ्य सीओ ङ्हाम्ओलम्पाय् गत स्याव्नै त ङाइ नीङ्कायः चीःताक्सा खेःतो। ओउःमयः एनःओलो लेखा मुनै ओउःत झ्यान्ते नीङ्पाय् अरु ङ्हाम्मालो मान्तालम्लो लेखा ल्हुङ् लीह्तोलेः नीङ्कोः सीओ पुःचोङ् हौचोङ्लम्कायः क्रेस्सा परतेःइली। ङ्हाम्मालो मान्तालम्खेइ “लोनेः पेतोलेः स्याव्नाः” त जुगाङ् चीःनीली 14 ङीखेइ “येसु ख्रीस् सीआक्तीको लोने उह्ती च्योक्ओ” त दाय्ह्ओ ङ्हाम्नाःतय्ह्नी ओउःत खेःओ सीतो मुओ येसुकायः ङ्हाम्ओलम्इमा लोने येसुकुस् वाङ्सा परमेस्वर्इ दोःताक्नाःथास। 15 प्रभुइ ङीकायः तोओ कुरालेः नीङ्कायःमा तोनेःनाङ्स ओउः कुरापाय् इलेःआः। प्रभु वाङ्सा खेःओ दीन्हाङः ङी सेलः मुओलम्इ सीओलम्कोः ङ्हासै च्योल्सा दोःङीली। 16 ओउः बेलाहाङःपाय् हुकुम् सोतोलेः गोःओमा ओउः ताङ्ह्ओ परमेस्वर्कोः लाङ्कासै ल्होक्ओमयःकोः हाव्नयःमा परमेस्वर्कोः नर्सीङ्ग्या मुत्ओमा ओउः सबै कुस्ब्रक्त ङीकोः प्रभुलेः ग्ल्युङ्ह्ती वाङ्नाः। प्रभु वाङ्तोक्हाङः ओउः सीती मुओ ख्रीस्कायः ङ्हाम्ओलम् ङ्हासै उह्ती च्योक्लेःनै। 17 लोने ङी सेलः मुओलम्मा ओउःमयःकुस् प्रभु क्रुस्साकायः अलवःकोः मुस्ताङ् लनःनाःतय्ही ओहाङःसै ङी गलकायःमा प्रभुकुस् मुनाःतय्ही। 18 लौ इ कुरा तोती लयःमयः लुङ्काय्ती नोःकाय्न। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.