१ थेसलोनिकि 3 - चेपाङ1 नीङ्कायः क्रुस्सा दोःमाःत झ्यान्ते ङीइ छ्युप्ङुसुलु ओउःत झ्यान्ते “नीची लयःझुङ्आले आथेन्स् सहर्हाङः मुसा पेनाः” त म्हर्ती 2 नीचीकुस् यात्चाक् ख्रीस्कोः पेओ समचार् थोल्ह्ती तोओमा परमेस्वर्कोः काम् जाङ्ह्ओ हौ तीमोथी त तोओपाय् नीङ्कायः लुङ्साकायःमा पेतो ङ्हाम्ताक्साकायःमा नीङ्कःताङ् ल्होक्आलाङःसु। 3 ओहाङःसै लीह्सीःओ वाङ्ओ बेलाहाङः नीङ्इ ग्रमःत मुती ङ्हाम्सा खाय्तेःनानी। ओउःत लीह्सीःओपाय् ङी गोरःसा खेःनाःतय्ही एत नीङ्इ चीःतेःनानी। 4 दोह् हायःती दाय्ह्सा ङी ङ्हापाय् नीङ्कुस् मुतोक्हाङः “लौ लोने ङीकायः लीह्सीःओ बयःनाःताङी” त ङ्हासै दाय्ह्ती तोनेःनाङ्स ओउः तोओपाय् दोङ्सीलेः “ताप्तोलेः स्याव्ओ” त चीःमातेःनानी। 5 ओहाङःसै “ओउः थेसालोनीकाहाङः मुओलम्पाय् गतलो ङ्हाम्ती मुनै। ओउःमयःकायः सैतान्इ थ्योन्ह्ती ङ्हाम्सा फेताक्चाःथास यादो ओउःत झ्यान्ते ङीकोः काम् लोल” त म्हर्ती नीङ्कायः आन ल्हुङ् रुःआलाङी। ओउःत खेःओ नीङ्कोः कुरा सायःसाकायः नीङ्कःताङ् तीमोथी ल्होक्ङोतो 6 नीङ्कुस् क्रुस्आक्तीको ओउः द्याह् पाय्ह्ती वाङ्ती “ओउःमयःइ ख्रीस्कायः पेतो राप्ती ङ्हाम्तोलेः मुमानै नीङ्कायः पेतोलेः गीलती योसा आन झाह्तीलेः मुमानै। ङीइ ओउःमयःकायः झाह्ओलो लेखालेः नीङ्कायःपाय् ओउःमयःइ झाह्तेःनै” त दाय्ह्ती तीमोथीइ ल्हाक्ती छ्यानःआताङी। 7 ओउः कुरा सायःआक्तीको पुःचोङ् हौचोङ्य इ लीह्सीःओ गोरःओ बेलाहाङः ङी ल्हुङ् धोमाय्तो स्याव्आलाङी। 8 परमेस्वर्कोः काम् नीङ्इ फेमाःत पेतोलेः जाङ्ह्धै मुतेःनै त झ्यान्ते ङीकोः जीङःपाय् स्याक्लेःनाः। 9 द्याह् नीङ् पेतोलेः मुनै त चीःती ङी आन चोङाय्तीलेः परमेस्वर्कायः “च्युता” त तोनाङःसु। 10 न्हीदीङ् याह्दीङ्हाङः परमेस्वर्कः तेतीलेः “ओउः थेसालोनीकाहाङः मुओलम्कायः पेतो ङ्हाम्ताक्साकायः ङी आल्सा दोःताक्पाःताङी” त दाय्ह्ती तोझुङ्नाङःसु। 11 लौ ङीकोः परमेस्वर् आपाइमा ङीकोः प्रभु येसु ख्रीस्इमा नीङ्कःताङ् क्रुस्लाङ् दाक्पाःताङी। 12 ङीइ नीङ्कायः राप्ओलो लेखा लयःमयःकायःमा सबैकायःमा प्रभुइ न्हाङ्तोलेः राप्तेःताक्तेःपै। 13 ओहाङःसै ङीकोः प्रभु येसु ख्रीस् लयःकायः ङ्हाम्ओलम्कुस् वाङ्नम् दीन्हाङः नीङ् ल्हुङ्हाङः जय्तोलेः स्याव्ती परमेस्वर्कोः मीक्हाङः जय्कुमःत मुतेःनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.