१ थेसलोनिकि 2 - चेपाङ1 नीङ्कायः क्रुस्लाङ् वाङ्ओहाङः ङा आह्रे वाङ्ओ खेःल ओउःत चीःतेःनानी। 2 नीङ्कःताङ् वाङ्ओ ङ्हासै फीलीपीहाङः आन लीह्सीःओमा बयःआताङी हेलामा क्लाःआताङी ओउःतमा चीःतेःनानी। एतलेः ङीकायः त्याःसा बोङःताङीतो नीङ्कःहाङः परमेस्वर्इ ओउःकोः पेओ समचार् फुती रैमामाःत नोःताक्आताङी। 3 नीङ्कायः स्यान्ओहाङः ङीइ ब्रःतोलेः तोमाङुसुलु ल्हुङ्हाङः रेव्ओ म्हर्तीमा माःतीमा तोमाङुसुलु। 4 ओउःपाय् खेःल ओउःकोः पेओ समचार् थोल्ह्ती तोसाकायः परमेस्वर्इ छ्युङ्ह्ती दोक्आताङी ओउःत खेःओ ओउःकोः कुरा गतलो बयःआताङी ओउःतलेः तोनाङःसु। मान्ताखेकायः म्रोताक्सा खेःल ङीकोः ल्हुङ्तुक् योओ परमेस्वर्कायः म्रोताक्साकायः ह तोनाङःसु। 5 ङीइ फोल्यावःती तोसाकायः वाङ्माङीली लयःकायः क्युती लेःसाकायः माःतीलेः वाङ्माङीली ओउःत चीःतेःनानी परमेस्वर्इमा इत चीःनौ बा। 6 नीङ्कःसैमा अरुकःसैमा ङीकायः नेह्रो ओर्ताक्सा कुरा बोङःङुसुलु। ङीपाय् ख्रीस्इ छ्युङ्ह्ती लोक्ओमयः खेःनाङी ओउःत झ्यान्ते नीङ्कःसै दोह् दोह् खेःयामा त्याक्सा स्याव्चाः खेःतो। स्याव्सापाय् स्याव्ओलेः खेःतो नीङ्कःसै दोह्मा त्याक्ङुसुलु। 7 नीङ्कःहाङः मुतोक्हाङः ङी चोःकोः आमालो लेखा काङ्तोलेः खेःङीतो। 8 ङीइ नीङ्कायः ओउःच्युक् राप्ती झ्यान्ते परमेस्वर्कोः पेओ समचार् तोलाङ् वाङ्ओ ह खेःल नीङ्कायः ङीइ लयःकोः जीङःमा बयःसा ग्याआलाङी ओउःच्युक्लेः राप्नेःआलाङ्सु। 9 लौ पुःचोङ् हौचोङ्य ङीइ नीङ्कःहाङः हारीनःती जाङ्ह्ओ काम्पाय् चीःतेःनानी माःर। परमेस्वर्कोः पेओ समचार् थोल्ह्ती तोतोक्हाङः ङीइ नीङ्कःसै जेःगा तुङ्गामा दोह्मा तेङीली। न्हीदीङ् याह्दीङ्कायः ङीइ केलःती अरुइ बयःओ काम् जाङ्ह्ती जेःआलाङःसु। 10 इत नीङ्इमा चीःतेःनानी परमेस्वर्इमा चीःनौ। नीङ् ङ्हाम्ओलम्कुस् मुतोक्हाङः ङी रेव्ओ काम् दोह्मा जाङ्ह्माःत पेतो हायःतीलेः वाह्आलाङी। 11 आपाइ लयःकोः चोःकायः तोओलो लेखा नीङ्कायः ङीइ गानाक्ती लुङ्ती स्यान्ती 12 “नीङ्कायःपाय् परमेस्वर्इ ओउःकोः लयःकोः आन पेओ राजीताङः गोत्तेःआकाय् ओउःत खेःओ ओउःकोः काम्पाय् पेतो जाङ्ह्तीलेः वाह्न दा” त दाय्ह्ती तोनेःआलाङ्सु। 13 परमेस्वर्कोः नोःराय् ङी नीङ्कःताङ् तोलाङ् वाङ्तोक्हाङः “लौ इपाय् मान्तासै वाङ्ओ नोःराय् ह खेःल परमेस्वर्कोः लेःआः” त दाय्ह्ती ङीइ स्यान्ओ कुराकायः ङ्हाम्ती सायःतेःआकानी। ओउःत झ्यान्ते ङीइ गलकायःमा परमेस्वर्कायः “च्युता” त तोनाङःसु। दोङ्सीलेः ङीइ स्यान्ओ नोःराय्पाय् परमेस्वर्कोः लेःआः। ओउः नोःराय्इपाय् देङीलेः नीङ् ङ्हाम्ओलम्कायः पेतो वाह्ताक्तेःनै। 14 लौ पुःचोङ् हौचोङ्य नीङ्इमा यहुदीया देस्कोः येसु ख्रीस्कायः ङ्हाम्ओलम्लो लेखालेः लयःकोः देस्कोः मान्तालम्सै आन लीह्सीःओ दोःतेःआकाय्। ओउः यहुदीया देस्हाङः मुओ यहुदीलम्इ ओहाङः मुओ ङ्हाम्ओलम्कायः आन लीह्सीःओ बयःआथास। 15 ओउः यहुदीलम्इ प्रभु येसुकायःमा सात्आकानी परमेस्वर्कोः कुरा छ्यानःओलम्कायःमा सात्आकानी ङीकायःमा रुनःती ल्होक्आताङी। ओउःत हायःती ओउःमयःइ परमेस्वर्कायः म्रोताक्सा जुगाङ्लेः खाय्नीली सबै मान्तालम्कोः बीरोत् स्याव्नै। 16 ओहाङःसै परमेस्वर्कोः दल्ताक्सा पेओ समचार्पाय् ङीइ यहुदी खेःमालो जात्लम्कायः तोतोक्हाङः ङीकायः त्याःसा बोङःआताङी। ओउःत झ्यान्ते ओउःमयःइ रेव्ओ काम् जाङ्ह्तीपाय् दप्तोलेः द्युम्ताक्आकानी। ओउःमयःकः परमेस्वर् आन ल्हुङ् मल्ह्ती न्युम्ह्ताक्नाःथास। 17 ङीपाय् ङ्हा यात् चीच्योक्कायः नीङ्कःसै वेङःकाय्ती मुसा खेःओ खेःतो। आङ्खेपाय् लोक्तो लेःआः ल्हुङ्खेहाङः ङीइ नीङ्कायः योसा आन झाह्आलाङी। ओउःत झ्यान्ते नीङ्कःताङ् वाङ्सा बोङःङुसुतो वाङ्सापाय् दोःङीली। 18 ङी नीङ्कायः क्रुस्सा आन झाक्आलाङी। ङा पावुल्पाय् नीस् सुम् पेन्ह्कायः वाङ्सा बोङःङोतो वाङ्साकायः सैतान्इ ताक्ताङीली। 19 लौ ङीकोः प्रभु येसु ख्रीस् वाङ्सा खेःओ दीन्हाङः ङी दोह्कायः चोङाय्ती आसती मुचाङी त दाय्ह्सा ङीकोः पेओ काम् जाङ्ह्झ्याङ्कोः दोह्लो दाय्ह्सा ओउःपाय् इलेःआः। नीङ्मा ङीकुस् येसुकोः मीक्हाङः मुतेःनै त खेःया चोङाय्नाङी। 20 दोङ्सीलेः नीङ्पाय् प्रभुकोः लेःआः त झ्यान्ते ङी आन चोङाय्ती म्रोतो मुनाङी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.