१ थेसलोनिकि 1 - चेपाङ1 इ चेती ङा पावुल्मा सीलास् तीमोथीमा ङी सुम्चाक्इ नीङ् थेसालोनीकाहाङः मुओलम्कायः लेखती ल्होक्नेःनाङ्सु। नीङ्पाय् परमेस्वर् आपाकोःमा प्रभु येसु ख्रीस्कोःमा लेःतेःइ। परमेस्वर्इ नीङ्कायः योनःती योती ल्हुङ् धोमाय्ताक्तेःपनै। 2 ङीइ परमेस्वर्कायः तेती तोतोक्हाङः नीङ् सबैकायः गलकायःमा तेमानेःनाङ्स “च्युता” त तोमानाङःसु। 3 दोह् हायःती दाय्ह्सा ङीकोः प्रभु येसु ख्रीस्कायः पेतो राप्तीमा ङ्हाम्तीमा नीङ्इ ओउःकोः काम् त्युस्ती जाङ्ह्तेःनानी फेरी प्रभुकोः द्यान्ह्ती वाङ्सा दीन्कायः नीङ् ग्रमःतलेः ल्युङ्ह्ती मुतेःनै। ओउःत गीलती ङीइ परमेस्वर् आपाकायः तेती तोतोक्हाङः गलकायःमा “च्युता” त तोनाङःसु। 4 नीङ्कायःमा परमेस्वर्इ राप्ती झ्यान्ते लयःकोः मान्ता स्याव्साकायः छीङ्ह्मातेःआकाय् ओउःत चीःनाङःसु। 5 ङीइ नीङ्कायः तोओ पेओ समचार्पाय् मान्ताकोः नोःराय् ह तोओ खेःल परमेस्वर्कोः ग्वालामःकोः ग्वम् दोःती ङीइपाय् “इ कुरा दोङ्सीःओ कुरा लेःआः बा” त दाय्ह्ती ओउः पेओ समचार् तोनेःआलाङ्सु। नीङ्कःहाङः मुतोक्हाङः ङीइ नीङ्कायः दोह् काम्लो जाङ्ह्ओ त नीङ्इ च्यवःतेःआकानी। 6 ओउःत झ्यान्ते ङीकायःमा ङीकोः प्रभुकायःमा तेःतेःआकानी। ओउः बेलाहाङः नीङ्इ आन लीह्सीःओ गोरःतेःआकानी। लीह्सीःओ गोरःसापाय् गोरःतेःनीतो परमेस्वर्कोः ग्वालामः दोःती ओउःकोः कुरा चोङाय्तीलेः सायःतेःआकानी. 7 ओउःत झ्यान्ते मासीदोनीया देस्हाङःमा ग्रीस् देस्हाङःमा ओहाङःकोः ङ्हाम्ओलम्कायः नीङ्पाय् तेःसा खेःओ मान्तालम् स्याव्तेःआकाय्। 8 प्रभुकोः नोःराय्पाय् मासीदोनीया ग्रीस्हाङः ह नीङ्इ छ्यानःओ खेःल गाःहाङः खेःयामा नीङ्इ “परमेस्वर्कायः इतलेः ङ्हाम्सा” त छ्यानःतेःआकानी छ्यानःआक्तीको नीङ्कायः “ओउःमयः परमेस्वर्कायः पेतोलेः ङ्हाम्नानी बा” त अरुलम्इ सबै चीःनानी। ओउःत झ्यान्ते नीङ्कायः ल्हाक्ती तोओ कुराकायः ङीइ पाःती तोसा परल। 9 “पावुल् वाङ्तोक्हाङः ओउः थेसालोनीकाहाङः मुओलम्इ ओउःकायः पेतो रोम्आथै। ओहाङःसैको द्यव्ताकोः काम् फेती ओउः दोङ् जीङः नाःओ परमेस्वर्कोः काम् जाङ्ह्माआकानी। 10 ओउःकोः चोःपाय् लाङ्कासै वाङ्साकायः ल्युङ्ह्तीमा मुनै” त दाय्ह्ती सबै चीःती नोःकाय्नै। ओउः चोःपाय् येसु लेःआः ओउःकायःपाय् परमेस्वर्इ सीओसै उह्ती च्योक्ताक्आथै। ओहाङःसैको येसुइपाय् ओउः लोनेः वाङ्सा परमेस्वर्इ बयःसा न्युम्ह्ताक्ओसै ङीकायः दल्ताक्नाःतय्ही। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.