१ पत्रुस् 5 - चेपाङ1 लौ नीङ् स्यालःओ थालवःपालम्य ङाइ द्याह् तोचेःनाङ्स दा। ङामा थालवःपालेः खेःमानाङः फेरी ख्रीस्कोः लीह्सीःओ गोरःओ च्यवःओ मान्तामा खेःमानाङः। लोने वाङ्सा खेःओ ताङ्ह्ताक्सा बेलाहाङः ङापाय् ख्रीस्कुस् ताङ्ह्तोलेः स्याव्सा दोःमानाङः। ओउःत झ्यान्ते ङाइ द्याह् तोसा कुरापाय् नीङ्इ सायःनाङ्स दा। 2 नीङ्इ स्यास्ती योसा खेःओ परमेस्वर्कायः ङ्हाम्ओलम्कायःपाय् पेतो ग्यातीलेः स्यास्नु दा। पैसाकायः ह जाङ्ह्माःत लयःकोः ल्हुङ् म्रोतीलेः ओउः काम् जाङ्ह्नु एतलेः परमेस्वर् झाक्लेःनाः। 3 फेरी खह्र्तोलेः गानाक्ती तोमामाःत ओउःमयःकायः लयः स्यालःती छ्यानःती स्यान्नु दा। 4 ओहाङःसैको सबैकायः स्यालःती स्यास्ती गम्ओ येसु ख्रीस्कोः द्यान्ह्ती वाङ्सा दीन्हाङः नीङ्पाय् ओउः आन पेओमा ताङ्ह्ओमा गलमा मीह्मालो काम् जाङ्ह्झ्याङ्कोः दोःतेःनै। 5 नीङ् लाव्मयःलम्य ओउः दीक्पाल्लम्इ तोओ कुरापाय् ग्याती सायःनु दा। माः रैस नीङ् सबैइ अरु अरुकायः ल्हुङ् युम्तीलेः काम् जाङ्ह्काय्न। सुमा लयःकोः नेह्रो ओर्ताक्लाम् दोह् हायःती दाय्ह्सा परमेस्वर्कोः आखरःहाङः “लौ लयःकोः नेह्रो ओर्ताक्ती वाह्ओलम्खेपाय् परमेस्वर् झाक्ल मीतो वाह्ओलम्खे परमेस्वर्इ योनःती योती पेतोलेः बयःनाःथास” त दाय्ह्ती दाय्ह्ओ लेखती मुनाः। 6 ओउःत झ्यान्ते परमेस्वर्कोः मीक्हाङः मीओ ल्हुङ् दोःती वाह्न ओहाङःसैको लोने ओउःकोः क्रोःओ बेलाहाङः ओउःइ ताङ्ह्ताक्तेःनै। 7 दोह् दोह्लोकायः नीङ् ल्हुङ् रुःतेःनै ओउःलेः नीङ्कोः परमेस्वर् आपाकायः तोनु दा दोह् हायःती दाय्ह्सा ओउःइ नीङ्कायः आन योनःतीलेः योतेःनै बा। 8 लौ ब्रःमामाःत घीःतीलेः वाह्न। नीङ्कायः ह्र्योक्ती वाय्सा बोङःओ सैतान् त तोओइ जाःलो लेखा वेःताङ् ङोय्ताङ् सोङ्होली बोङ्होली त हायःती वाह्ती सुकायःमा जेःती माक्ती वाय्सा बोङःनौ। 9 ओउःकायः सायःमामाःत परमेस्वर्कायः ङ्हाम्ती ग्रमःत मुन। ल्हाव्ह्दैबाङ्हाङः गाःहाङः खेःयामा नीङ्कोः ङ्हाम्ओ पुःचोङ् हौचोङ्लम्मा नीङ्लो लेखालेः लीह्सीःओ गोरःनानी एत चीःती ल्हुङ् घ्युम्तेःचै। 10 ओहाङःसैको नीङ्इ बल लीह्सीःओ गोरःआक्तीको लोने परमेस्वर्इ नीङ्कायः योनःती योती पेतो ल्हुङ् क्रोङ्तोलेः ङ्हाम्तेःताक्तेःनै दोह् हायःती दाय्ह्सा परमेस्वर्इ नीङ्कायः प्रभु येसु ख्रीस्कुस् गलकायःमा तोङ्ह्तोलेः स्याव्साकायः गोत्तेःआकाय्। 11 ओउः परमेस्वर्पाय् गलकायःमा ग्वम् नाःओ मुलेःनाः बा। ओउःच्युक्लेः स्याव्पाः दै। 12 लौ इ नीङ्कायः ल्होक्सा चेती ङाकोः पेतोलेः ङ्हाम्ओ हौ सीलास्इ लेखताक्आलाङः। परमेस्वर्कोः दोङ् पेओमा सोह् बयःओमा दल्ताक्सा कुरा छ्यानःती नीङ्कायः लुङ्साकायः इ मीओ चेती लेखनेःनाङ्स। इ कुरा पेतो ङ्हाम्ती ग्रमःत मुन दा। 13 फेरी इ रोमी सहर्हाङः मुओ नीङ्लो लेखालेः परमेस्वर्इ छ्युङ्ह्ओमयःइपाय् नीङ्कायः नमस्ते ल्होक्तेःनै। ङाकोः ङ्हाम्ओ चोः त तोओ मर्कस्मा नमस्ते ल्होक्तेःनै। 14 अरु अरुकायः सबै राप्ती ग्रोम्ती स्यवकाय्न् दा। ओहाङःसैको नीङ् ख्रीस्कायः ङ्हाम्ओलम्पाय् सबै ल्हुङ् धोमाय्तोलेः मुतेःपै। ओउःच्युक्लेः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.