१ पत्रुस् 4 - चेपाङ1 प्रभु ख्रीस्पाय् एतलेः लयःकोः आङ्हाङः लीह्सीःओ गोरःआकान् त खेःया नीङ्इमा ओउःलो लेखालेः क्रोङ्ओ ल्हुङ्इ लीह्सीःओ गोरःसा खेःतो दोह् हायःती दाय्ह्सा लीह्सीःओ गोरःओ मान्ताइपाय् रेव्ओ काम् जाङ्ह्ती वाह्ओकायः फेनौ 2 ल्हाव्ह्दैबाङ्हाङः मुतोक्हाङः ओहाङःकोः रेव्तो मोह्हाय्ओलम् ग्यामाःत परमेस्वर्कोः झाक्ओ कुरा जाङ्ह्नु। 3 अनम्ह्पाय् नीङ्इ ङ्हाम्मालोलम्लो लेखालेः आन रेव्तो जाङ्ह्तेःआकानी ओउःत हायःओ द्याह् छ्यो। ओउः बेलाहाङः नीङ्इ ल्हास्याकोः कुरामा हान् तुङ्ती ङोओमा द्यव्तालम्कायः जात्र जवओमा सबै जाङ्ह्तेःआकानी। 4 ओउःतलेः नीङ्इ हायःओ खेःतेःइतो द्याह् इ कुरा नीङ्इ फेतेःआकानी त झ्यान्ते नीङ्कोः ङ्हाम्मालो साथीलम्इ “दोह् हायःतीतेः द्याह् ङीकुस् वाह्सा ग्यातेःइली” त दाय्ह्ती ग्याङ्ह्ती नीङ्कायः हेला क्लाःतेःनै। 5 ओउःमयःइ तेन्छ्याङ्खे हेला क्लाःतेःइतो लोन्तेखे ओउः सबैकायः तय्छनःती योसा परमेस्वर्कोः मीक्हाङः ओउःमयःइ लयः जाङ्ह्ओ रेव्ओ काम्लम्पाय् घोसा खेःलेःनै। ओउः बेलाहाङः सेलः मुओलम्कायःमा सीओलम्कायःमा सबैकायः परमेस्वर्इ तय्छनःती योनाःथास। 6 ओउःत झ्यान्ते परमेस्वर्कोः पेओ समचार्लेः सीओलम्कायःमा थोल्ह्ती तोओ खेःतो। ओहाङःसैको ओउःमयः ङ्हापाय् लयःकोः आङ् मुतोक्हाङः अरु मान्तालो लेखा न्युम्ह्तो स्याव्ती लोने ओउः पेओ समचार् सायःआक्तीको परमेस्वर्कोः रौ जीङः दोःसा खाय्नानी। 7 लौ सबै थोक्कोः द्युम्ओ बेलाहाङः दाह्खेःआ ओउःत झ्यान्ते घीःओ नीङ्ओ ल्हुङ् दोःती परमेस्वर्कः तेती तोनु दा। 8 दोह् खेःयामा अरुलम्कुस् राप्काय्ती मुन दोह् हायःती दाय्ह्सा नीङ्इ एतलेः हायःओ त खेःया नाःतो रेव्ओ काम्लम् क्युम्ह्ती वाय्तोलेः स्याव्नाः। 9 सबै ङ्हाम्ओलम्कायः नीङ्कोः कीम्ताङ् वाङ्ह्तोलेः चाक्ओ ल्हुङ् गम्मामाःत रोम्काय्न। 10 नीङ्कायःपाय् परमेस्वर्इ लःलयः जोक्कायः थेथे स्यार्मे बयःतेःइतो नीङ्इ दोःओ स्यार्मेकोः काम् अरुकायः जाङ्ह्काय्न। 11 नीङ्कःहाङः यात्चाक्इ स्यान्ती तोओ स्यार्मे नाःओ त खेःया ओउःइपाय् परमेस्वर्कोः दोङ् कुरालेः चीःती तोपौ। अरुखेइ ङ्हाम्ओलम्कायः लव्ह्ती जाङ्ह्सा स्यार्मे नाःओ त खेःया ओउःपाय् परमेस्वर्कोः ग्वम् दोःतीलेः जाङ्ह्पौ ओहाङःसै इत हायःतीलेः प्रभु येसुकोः ङ्हाम्ओलम्इ दोह् खेःयाकायःमा परमेस्वर्कायः तोङ्ह्ताक्सा खाय्नानी। ओउः परमेस्वर्पाय् गलकायःमा ग्वम् नाःओमा तोङ्ह्ओमा मुलेःनाः बा। ओउःच्युक्लेः स्याव्पाः दै। 12 लौ ङाइ राप्ओ पुःचोङ् हौचोङ्य नीङ्कायः वेलःती योसाकायः म्हेः य्हुमःओ लेखालो लीह्सीःओ वाङ्लेःनाः। ओउः वाङ्तोक् बेलाहाङः “लौ एत ङाकःताङ् वाङ्ओआः बा” त म्हर्ती ग्याङ्ह्तीतेः रैतेःचै ओउःत स्याव्ओपाय् थे कुरा खेःबाय्ल। 13 ओउः लीह्सीःओ नीङ्इ ख्रीस्कुस्इलेः गोरःतेःनानी ओउःत झ्यान्ते म्रोतोलेः मुन ओहाङःसैको लोनेः ओउः ताङ्ह्तो स्याव्ओ दीन्हाङः नीङ् आन चोङाय्तोलेः स्याव्तेःनै। 14 नीङ्कायःपाय् अरुइ “लौ इपाय् ख्रीस्कोः मान्ता लेःआः” त दाय्ह्ती हेला क्लाःतेःनै त खेःया नीङ् लयःकायः “भाला लेःआः ङ” त ताःनीङ्इसी दोह् हायःती दाय्ह्सा नीङ्कःताङ् परमेस्वर्कोः पेओमा ताङ्ह्ओ ग्वालामःपाय् मुलेःनाः। 15 फेरी नीङ्कःहाङः सुमा अरुकायः सात्साकायःया अरुकोः चीस् कुःसाकायःया रेव्ओ काम् जाङ्ह्साकायःया अरुकोः कुरा ह्रन्ह्साकायः न्युम्ह्तोतेः स्याव्लाम्। 16 ओउः काम्लम्खे जाङ्ह्आक्तीको रास्सीःतो स्याव्लेःनाः। पेओ काम्लम्खे ख्रीस्कायः जाङ्ह्तोक्हाङः नीङ्इ लीह्सीःओ च्यवःतेःनानी त खेःयाकायः रास्सा परतेःइली “ख्रीस्लो लेखालेः स्याव्आतय्ही” त दाय्ह्ती परमेस्वर्कायः “च्युता” त तोनु दा। 17 परमेस्वर्इ सबैकायः तय्छनःती योसा दीन्पाय् दाह्खेःनाः। ङी ङ्हाम्ओलम्कायः ङ्हालेः लोने अरुकायः परमेस्वर्इ तय्छनःती योनाःतय्ही। ओहाङःसै ङी परमेस्वर्कोः पेओ समचार् ङ्हाम्ओलम्खेकायः तय्छनःती योआतय्ही त खेःया ओउः ङ्हाम्मालोलम्खे तय्छनःती योतोक्हाङः गुच्युक् पेमालो स्याव्नै बा। 18 “पेओ मान्तालम्खेकायः दल्ताक्साकायः चाक्आनाः त खेःया ओउः पेमालो वाह्ओ ङ्हाम्मालोलम्खेकायः दल्ताक्सापाय् न्हाङ्तोलेः चाक्लेःनाः बा” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 19 ओउःत खेःओ नीङ्कःहाङः सुसुइपाय् परमेस्वर् झाक्ती झ्यान्ते लीह्सीःओ च्यवःनानी ओउः मान्तालम् पेओ काम् जाङ्ह्ओ फेमामाःत “लौ परमेस्वर्इ ङीकायः ओम्पायःती गम्नाःतय्ही” त दाय्ह्ती ओउःकायः ङ्हाम्तोलेः मुपै। ओउः सबै थोक्लम् जापीनःती न्यास्ओ परमेस्वर्पाय् ओउःइ तोती गम्ओ कुरापाय् गलमा ताप्ताक्नौ बा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.