१ पत्रुस् 3 - चेपाङ1-2 फेरी नीङ् नाःचोङ्य नीङ्इमा लयःकोः बुधाइ तोओ कुरालम् म्ह्याङ्ती ग्याती जाङ्ह्नु दा। ओहाङःसैको सुसुकोः बुधापाय् येसुकोः कुरा ङ्हाम्माःत मुचानाः ओउः बुधाइलेः नाङ्कोः पेओ नीङ्ओ काम्लम् च्यवःती झ्यान्ते नोःती स्यान्मामाःत ओउःपाय् लोने लयः ङ्हाम्साकायः ग्यातो स्याव्नाः यादो। 3 पेपेओ नाय्लम् सुन् चान्दीकोः बालोलम् नीङ्कायः पेताक्साकायः लावसा परतेःइली। ओउःपाय् खेःल नीङ्कोः आङ् पेताक्ओसै पेओ ल्हुङ् युम्ती वाह्साकायः पेलेःनाः। 4 ओउः खाल्कोः ल्हुङ् पेताक्ओ गलमा ह्र्याती वाय्ओ स्याव्ल फेरी परमेस्वर्कोः मीक्हाङः आन पेलेःनाः। 5 एतलेः उय्ह्लेकोः परमेस्वर्कायः ङ्हाम्ओ मोमःचोःलम् पेतो स्याव्आकाय् ओउःमयः नीङ्तो ग्याओ ल्हुङ्तुक् नाःती लःलयःकोः बुधाकोः काम्पाय् पेतोलेः ग्याती जाङ्ह्ओ खेःइतो। 6 आब्राहाम्कोः बुधी सराह्त तोओमा ओउःतलेः हायःओ खेःतो। ओउःपाय् लयःकोः बुधाकायः “कीम्कोः आपालेः” त दाय्ह्ती ओउःइ तोओ कुराकः ग्याती जाङ्ह्ओ खेःतो। नीङ्मा एतलेः दोह्कःमा रैमामाःत पेतोलेः हायःतेःनानी त खेःया ओउः सराह्कोः मोमःदानेलेः स्याव्तेःनै। 7 फेरी नीङ् पुःचोङ्लम्य “बुधीपाय् ङासै ध्यव्ओ लेःआः” त चीःती लःलयःकोः बुधीकुस् याक्ती ओउःकायः लव्ह्ती बयःनु दा। नाङ्कोः बुधीपाय् नाङ्कुस् आङ् ब्राङ्ती परमेस्वर्इ योनःती बयःओ रौ जीङः दोःतेःनाःज। एत चीःनु ओहाङःसैको ओउःकायः पेतो हायःआक्तीको नीङ्कोः तेओ कुरा परमेस्वर्इ ल्हेत्माःत ग्याती सायःलेःनै। 8 लौ उया नीङ् सबैलेः परमेस्वर्कोः मीक्हाङः नाःचोङ् पुःचोङ्लेःतेः इ ओउःत खेःओ यातैज्याङ् ल्हुङ् स्याव्ती ब्राङ्तीलेः मुन। अरुलम्कायः योनःती योनु सुकायःमा काङ्तो नोःती “ओउःपाय् ङासै ताङ्ह्ओ लेःआः” त लयःकायः मीताक्ती वाह्न। 9 अरुइ नीङ्कायः पेमालो हायःतेःनै प्रनःतेःनै त खेःया ओउःइ पेमालो हायःओमा प्रनःओमा पाय्क्तेःचानी। पेमालो द्यानःती पाय्क्माझ्याङ्कोः ओउः मान्ताकायः पेओ आसीक् बयःनु दोह् हायःती दाय्ह्सा नीङ्कायः परमेस्वर्इ पेओ आसीक् बयःसाकायः गोत्तेःआकाय्। 10 ओहाङःसै “सुसु पेतोलेः प्रुह्तोलेः स्याक्सा झाक्नै ओउःपाय् पेमालो कुरामा माःओ कुरामा नोःलाम्। 11 रेव्ओ काम्लम्खे फेती अरुकुस् काय्काय्माःत पेओ काम्खे जाङ्ह्पाःनी। 12 नीङ्तो मुओ मान्ताकायः परमेस्वर्इ योनःती योती ओउःमयःकोः तेती तोओ कुरा सायःनौ बा। पेओ मान्ताइ तेती तोओखे परमेस्वर्इ सायःलेःनौ रेव्ओ मान्ताकोः कुराखे ओउःइ त्याःलेःनौ” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 13 नीङ्इ पेतो हायःतेःनानी त खेःया सुसुइ नीङ्कायः लीह्सीःओ बयःतेःचै र। 14 बुरु पेतोलेः जाङ्ह्साकायः लीह्सीःओ च्यवःतेःनानी त खेःया नीङ्पाय् भालातेः स्याव्तेःआकाय् बा। सुकःमातेः रैमामाःत ल्हुङ् रुःमामाःत मुन। 15 मान्ताकः रैमामाःत येसु ख्रीस्कः ल्हुङ्हाङः एङःतीलेः “ङाकोः प्रभु” त दाय्ह्ती माननु। नीङ्पाय् येसुकायः चोङाय्ती लुङ्ती मुन। अरु मान्ताइ “लौ दोह् हायःतीतेः एतलेः चोङाय्ती मुतेःनै” त व्हत्याकायः पेओ त्याङ्सा कुरा ल्हुङ्हाङः सेती गम्नु दा। 16 ओउः बेलाहाङः ङोस्तोलेः पेतो त्याङ्न गलकायःमा पेओ काम्लम् जाङ्ह्ती नीङ्ओ ल्हुङ् दोःती वाह्न। ओहाङःसैको नीङ् ख्रीस्कायः ङ्हाम्ती वाह्ओलम्कायः माःती गाल्तुम्ती नोःओलम्पाय् लोने सोकार्सीःमाःतो स्याव्नै। 17 रेव्ओ काम् जाङ्ह्याकायः मान्तालम्इ लीह्सीःओ च्यवःनानी। ओउःसै परमेस्वर् झाक्ती झ्यान्ते नीङ्इ पेओ जाङ्ह्तोक्हाङः लीह्सीःओ च्यवःतेःनानी त खेःया ओउःपाय् पेलेःनाः। 18 ओउः दोह्मा रेव्ओ जाङ्ह्मालो ख्रीस्पाय् ङीकोः रेव्ओ काम्लम् सबै क्युम्ह्ती वाय्साकायः यातै पेन्ह्हाङः सीलेःआ। ओउः पेओ नीङ्ओ मान्ताइपाय् ङी रेव्ओ मान्तालम् परमेस्वर्कुस् गोय्खामःसाकायः ङीकोः होन्त लीह्सीःओ गोरःआकान्। ओउःकोः आङ् मुतोक्हाङः येसुपाय् सात्ओ खेःतो परमेस्वर्कोः ग्वम्इ उह्ती च्योक्ताक्ओ खेःतो। 19 ओउः ग्वम्इ दोःताक्तीमा ख्रीस्पाय् ओउः उय्ह्लेहाङःसै पानःती गम्ओ रुआङ्लम्कःताङ् परमेस्वर्कोः कुरा तोलाङ् आल्आ। 20 ओउः पानःती गम्ओलम्इ उय्ह्लेहाङः नोआह् त तोओकोः जहास् जाङ्ह्तोक् बेलाहाङःपाय् परमेस्वर्कोः कोदीङःती तोओ कुरा सायःसा ग्यामालो खेःइतो ओउःत झ्यान्ते नोआह्कुस् आत्जन ह तीःजहास्हाङः पोक्ती झ्यान्ते तीःसै दल्तो स्याव्आकाय्। 21 ओउःलो लेखालेः ङीकायःमा तीःहाङः बाप्तीस्मा त्याक्ती रेव्ओसै पेङ्कलःती दल्तो स्याव्नाःतय्ही। बाप्तीस्मा त्याक्ओहाङः तीःइ आङ्कोः रयः वाय्ती छय्ङ्ताक्साकायः खेःबाय्ल “ङी नीङ्ओ ल्हुङ्तुक् खेःआतय्ही” त परमेस्वर्कायः छ्यानःसाकायः बाप्तीस्मा त्याक्नाःतय्ह्नी। 22 ओहाङःसै ङीकायः दल्ताक्साकायः येसु ख्रीस्पाय् सीआक्तीको उह्ती च्योक्आक्तीको लाङ्काहाङः परमेस्वर्इ सबै लाङ्काकोः ल्होक्ओमयःकायःमा हुकुम् बयःओलम्कायःमा ग्वम् नाःओलम्कायःमा पुःलेःनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.