१ पत्रुस् 2 - चेपाङ1 ओउःत खेःओ सबै रेव्तो हायःओ फेनु माःती तोओमा जाङ्ह्ओमा अरुकायः लती पेमालो नोःओमा इ सबै फेनु। 2 रेः चोःलम् योङ्क्राय्ती दुत् तुङ्सा आन ग्यानै ओउःलो लेखालेः नीङ्मा परमेस्वर्कोः पेओ नोःराय्कायः ल्हुङ्हाङः सेती गम्सा ग्यातेःपै। ओहाङःसैको रौ जीङः दोःआक्तीको नीङ् न्हाङ्तोलेः छय्ङ्तो स्याव्ती रेव्ओसै दल्तेःनै। 3 “परमेस्वर्पाय् गुच्युक् पेओमा काङ्ओमा मुलेःनाः त नीङ्इ लयः धेःती चीःतेःनानी” त दाय्ह्ओ परमेस्वर्कोः आखरःहाङः लेखती मुनाः ओउःत झ्यान्ते ओउःकोः नोःराय् ग्यातेःपै। 4 लौ प्रभु येसुकःताङ् वाङ्न दा। कीम् जाङ्ह्ओ मान्तालम्इ ताती वाय्ओ बाङ्लो लेखालेः जीङः नाःओ प्रभु येसुकायः ङ्हाम्मालो मान्तालम्खेइ म्रोतीलेः त्याक्थाल परमेस्वर्खेइ येसुकायः आन म्रोतोलेः योती लयःकोः कीम् जाङ्ह्साकायः छ्युङ्ह्आथै। 5 फेरी ओउः परमेस्वर्कोः कीम्हाङः देती गम्सा बाङ्लो लेखालेः नीङ् जीङः नाःओलम्पाय् छ्युङ्ह्ओलेःतेः इ। परमेस्वर्कायः म्रोताक्सा पेओ कुरा ल्हासाकायः नीङ् येसु ख्रीस्इ छ्युङ्ह्ओ पुरोहीत्लो लेखा स्याव्तेःनै। 6 ओहाङःसै परमेस्वर्कोः आखरःहाङः “लौ सीओन् त तोओ सहर्हाङः ङाइ यात्चाक्कायः लयः छ्युङ्ह्ओ कीम्हाङः देसा आन पेओ मुल्बाङ्लो लेखा गम्लेःनाङः। सुसुइ ओउःकोः कुरा ग्याती ङ्हाम्नानी ओउः मान्तापाय् गलमा ल्हुङ् घ्युम्तो स्याव्इली” त लेखती मुनाः। 7 नीङ् ङ्हाम्ओलम्खेइ ओउःकायःपाय् “आन पेओलेः” त दाय्ह्ती योतेःनानी ङ्हाम्मालोलम्खेइ “पेल” त म्हर्ती योनानी। ओउःमा परमेस्वर्कोः आखरःहाङः “लौ गाव् बाङ्खेलो कीम् जाङ्ह्ओ मान्तालम्इ ताती वाय्नीतो ओउः बाङ्लेः लोने कीम्कोः मुल् बाङ् गम्ओ लेःआः” त दाय्ह्ती लेखती मुनाः। 8 फेरी इ अरु कुरामा लेखओआः परमेस्वर्कोः कुरा ङ्हाम्मालो मान्तालम्कायः “लौ ओउःपाय् दोम् त्योक्सा बाङ् स्याव्नाः ओउःहाङः मान्ता क्वेन्ह्ती तोन्नै” एत हायःसा ङ्हाहाङःसै रय्ह्ओलेः खेःतो ओउःमयःखेपाय् ङ्हाम्नीली त खेःया वाह्तोक्हाङः तोन्आकाय्। 9 नीङ्खे आने ओउः खाल्कोः मान्तालेः खेःतेःइली। नीङ्खेपाय् परमेस्वर्इ लयः छीह्ओमयःलेःतेः इ। राजाकोः पुरोहीत्लो लेखा स्याव्ती नीङ् रेव्ओसै पेङ्कलःती जय्कुमःत मुओ परमेस्वर्कोः लयःकोः मान्तालम्लेःतेः इ। ओउःत खेःओ “परमेस्वर्पाय् गुच्युक् पेओलेः हायःआकान्” त नीङ्इ अरुकायः छ्यानःती तोसाकायःलेः ओउःइ नीङ्कायः “लौ नीङ्कोः च्याक्ओमा रेव्तो वाह्ओसै फेती ङाकोः पेओ थोङ्तो स्याव्ओहाङः वाह्लाङ् वाङ्न” त दाय्ह्ती गोत्ती तोतेःआकाय्। 10 उय्ह्लेहाङः नीङ्पाय् परमेस्वर्कोः मान्ता खेःतेःइली नीङ्कायः ओउःइ योनःती योतेःइली द्याह् ओउःइ नीङ्कायः योनःती योती झ्यान्ते नीङ्पाय् परमेस्वर्कोः मान्ता मुबाय्तेःनै। 11 लौ ङाकोः राप्ओ पुःचोङ् हौचोङ्लम् ल्हाव्ह्दैबाङ्कोः मुतोक्हाङः नीङ्पाय् भ्यामःती ब्याह्ती याक्ओ थेथे मान्तालो लेखालेः मुतेःनै ओउःत झ्यान्ते ल्हाव्ह्दैबाङ्कोः रेव्तो मोह्हाय्साकायः ग्यामाःत वाह्न। ओउः ल्हुङ्तुक्कोः मोह्हाय्ओइ गलकायःमा नीङ्कायः रेव्ताक्सा बोङःतेःनै। 12 परमेस्वर्कायः ङ्हाम्मालोलम्कुस् मुतोक्हाङः सबै पेतो हायःती वाह्न ओहाङःसै ओउः मान्तालम्इ तेन्छ्याङ् नीङ्कायः माःती तोतेःइतो लोनेः प्रभु येसु द्यान्ह्ती वाङ्सा दीन्हाङः ओउःमयःइ ल्हुङ्हाङः दोङ् कुरा चीःती नीङ्कायः “पेओ लेःआः इ” त दाय्ह्ती परमेस्वर्कायः ताङ्ह्ताक्तीलेः तोनानी। 13-14 लौ नीङ्पाय् प्रभुकोः मान्तालम्लेःतेःइ ओउःकायः म्रोताक्साकायः हुकुम् बयःसा मान्तालम्कोः ऐन्पाय् सबै ग्याती जाङ्ह्नु। ओउः अरुसै ताङ्ह्ओ राजाकोः हुकुम्मा हाकीम्लम्कोः हुकुम्मा सबै ग्याती जाङ्ह्नु दा दोह् हायःती दाय्ह्सा ओउःमयःकायः पेमालो मान्तालम् न्युम्ह्ताक्साकायःमा प्रभुइलेः छीङ्ह्ती गम्आथास पेओ मान्तालम् लुङ्साकायःमा ओउःइलेः गम्आथास। 15 ओउःमयःकोः हुकुम् ग्याती नीङ् पेतोलेः वाह्तेःनै त खेःया ओउः पेमालो नोःओलम्कोः कुरापाय् “जुगाङ् आह्रे लेःआः” त छ्यानःसा खाय्तेःनानी ओउःत हायःसा परमेस्वर् झाक्ओ कुरा लेःआः। 16 नीङ्पाय् परमेस्वर्कायः ह नोकरीलो लेखा स्याव्तेःनै मान्ताकोः नोकरी खेःतेःइली। खेःसापाय् खेःतेःइली एत चीःती झ्यान्ते रेव्तो जाङ्ह्ती वाह्लाम्। 17 सबैकायः पेतोलेः नोःन अरु ख्रीस्कोः ङ्हाम्ओ पुःचोङ् हौचोङ्लम्कायः राप्नु। परमेस्वर्कः एङःती मुन। राजाकोः कुरापाय् पेतो ग्यान। 18 नीङ्कःहाङः सुसु अरुकायः नोकरी काम् जाङ्ह्तेःनानी लौ नीङ्पाय् लयःकोः मालीक्कोः अह्रावओ कुरालम् पेतोलेः म्ह्याङ्ती ग्याती जाङ्ह्नु दा। काङ्ओ मालीक्कोः अह्रावओमा खह्र्ओ मालीक्कोः अह्रावओमा दोह् खेःयामा पेतो ग्याती जाङ्ह्नु। 19 एतलेः पेओ काम् जाङ्ह्तोक्हाङः नीङ् अरुइ बयःओ लीह्सीःओ परमेस्वर् म्रोताक्साकायः गोरःतेःनानी त खेःया ओउःपाय् लुङ्सालेः पेनाः रैस। 20 पेमालो काम् जाङ्ह्तोक्हाङःखेपाय् अरुइ घान्ओमा लीह्सीःओ बयःओमा यात्चाक्इ गोरःनौ त खेःया ओउःपाय् लुङ्सीःओ खेःबाय्ल। पेओ काम् जाङ्ह्तोक्हाङःखेपाय् बुरु अरुइ बयःओ लीह्सीःओ गोरःतेःनौ त खेःया ओउःपाय् परमेस्वर्कोः मीक्हाङः आन लुङ्सीःओ लेःआः। 21 ओउःत हायःसाकायः परमेस्वर्इ गोत्तेःआकाय् दोह् हायःती दाय्ह्सा येसु ख्रीस्मा नीङ्कायः आन लीह्सीःओपाय् ग्याती गोरःलेःआ ओउःलो लेखालेः नीङ्इमा तेःतेःपानी। 22 ख्रीस्इपाय् रेव्ओ कुरा दोह्मा हायःउलु माःओ कुरामा गलमा नोःउलु। 23 अरुइ ओउःकायः रेव्ओ कुरा नोःतोक्हाङः ओउःपाय् सुकःमा रेव्तो त्याङ्ल। लीह्सीःओ च्यवःतोक्हाङः ओउःइ सुकायःमा क्योङ्ह्ती तोमाःत ओउः गलकायःमा पेतोलेः तय्छनःती योओ परमेस्वर्कायः “लौ ङाकायः पेतो योचाक्ची दा” त दाय्ह्ती ङ्हाम्ती तोआकान्। 24 येसु ख्रीस्इ ङीकोः रेव्तो हायःओ पेङ्कलःती वाय्साकायः क्ल्याय्ओ सीङःहाङः लयःकोः आङ् बयःती ङीकायः ल्हाङःती सीआ। ओहाङःसैको ङीपाय् रेव्तो हायःओ फेती द्याह् पेतो हायःती वाह्सा खाय्नाःतय्ह्नी ओउःकोः आङ् बयःओलेः ङीकायः स्याक्ताक्आतय्ही। 25 ङ्हाहाङःसै नीङ् भेदा मेत्छ्याःलो लेखालेः पेओ ल्याम् मीह्ती भ्यामःती वाह्तेःइतो द्याह् ङीकायः ह्राम्ती स्यास्ओ ओम्पायःती गम्साचाक्कःताङ् द्यान्ह्तीलेःतेः वानःतेःआकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.