१ पत्रुस् 1 - चेपाङ1 इ चेती ङा पत्रुस्त तोओ येसुकोः छ्युङ्ह्ती ल्होक्ओमयःइ लेखनाङः। इ लेखती नीङ् पोन्तस् गालाती कपादोसीया असीया बीथीनीया त तोओ जील्लाहाङः आल्ओ इताङ् उःताङ् भ्यामःती याक्ओमयःकायः ल्होक्नेःनाङ्स। 2 नीङ्कायःपाय् “लौ ङाकोः लयःकोः मान्तालम् स्याव्पै” त दाय्ह्ती परमेस्वर्इ आपाइ लयः झाक्तीलेः छीङ्ह्तेःआकाय्। ओहाङःसैको एत हायःती येसु ख्रीस्कोः वयःइ रेव्ओसै छय्ङ्ताक्साकायःमा ओउःकोः काम् ग्याताक्साकायःमा परमेस्वर्कोः ग्वालामःइ नीङ्कायः गम्तेःआकाय्। लौ नीङ्कायः परमेस्वर्इ न्हाङ्तोलेः योनःती योती आन पेतोलेः ल्हुङ् धोमाय्ताक्तेःपै। 3 द्याह् ङीकोः प्रभु येसु ख्रीस्कोः परमेस्वर् आपाकायः लाङ्काताङ् त्याव्ती लावार्ताङ् गोय्ह्ती “च्युता” त तोसा खेःतय्हीतो। दोह् हायःती दाय्ह्सा ङीकायःपाय् आन योनःती योती परमेस्वर्इ रौ जीङः दोःताक्नाःतय्ही। येसु ख्रीस्पाय् सीआक्तीको ओउःकायः परमेस्वर्इ उह्ती स्याक्ताक्ओ त चीःती “लोने ङीमा रौ जीङः दोःनाःतय्ही” त दाय्ह्ती आन चोङाय्तो मुनाःतय्ही। 4 फेरी रौ जीङः दोःती लाङ्काहाङः आन पेओ गलमा रेव्ताक्मालो गलमा ह्र्योक्ती मीह्सा खाय्मालो आसारःलेः नीङ्कायः सेती गम्ओ लेःआः। 5 नाङ्कायःमा ओउःकोः कुरा ङ्हाम्ती झ्यान्ते परमेस्वर्कोः ग्वम्इ स्याङ्ह्ससै दाह्ती दल्ताक्सा दीन्हाङः आसारः त्याक्साकायः ओम्पायःतीलेः गम्तेःनै। 6 “लौ एत पेओ दोःनाःतय्ही” त दाय्ह्ती चोङाय्तोलेः मुतेःनै। चोङाय्तोलेः मुसापाय् मुतेःनै तेन्छ्याङ् यात् चीच्योक्कायः लीह्सीःओ दीन्लम् वाङ्नाः। 7 दोह् हायःती दाय्ह्सा नीङ् “गुच्युक् पेतोलेःतेः ङ्हाम्तेःनानी” त दाय्ह्ती वेलःती योसाकायः इ दीन् वाङ्नाः। सुन्लम् युती जीताक्ती योसाकायः मान्तालम्इ म्हेःहाङः काती धाह्ताक्नानी। नीङ्कोः ङ्हाम्ओपाय् मीह्ती वाय्सा खाय्ओ सुन्सै पेओमा झाक्सीःओ लेःआः बा ओउःत झ्यान्ते नीङ्कोः ङ्हाम्ओपाय् लीह्सीःओ बेलाहाङः वेलःती योसा खेःतो। लीह्सीःओ बेलाहाङः नीङ् ग्रमःतलेः गोरःती ङ्हाम्तेःनानी त खेःया प्रभु येसुकोः द्यान्ह्ती वाङ्सा दीन्हाङः नाङ् आन लुङ्ओमा ताङ्ह्ताक्ओमा दोःतेःनै। 8 ओउः प्रभु येसुकायः च्यवःमामाःत ओउःकायः नीङ्इ राप्लेःतेःनानी। तेन्छ्याङ् ओउःकायः च्यवःमामाःत नीङ्इ ङ्हाम्लेःतेःनानी ओउःत झ्यान्ते नीङ् गुच्युक् पेतोलेः चोङाय्ती मुलेःतेःनै। ओउःच्युक् चोङाय्तो स्याव्ओकायः सुइमा चीःसामा नोःसामा खाय्नीली। 9 ओहाङःसैको नीङ् पेतो ङ्हाम्लेःनानी त खेःया नीङ्कोः ङ्हाम्झ्याङ्कोः रौ जीङः दोःतेःनै। 10 परमेस्वर्इ नीङ्कायः योनःती योती रौ जीङःपाय् सोह् बयःसा कुरापाय् उय्ह्लेहाङः मुओ परमेस्वर्कोः कुरा छ्यानःओमयःइ पेतो चीःसाकायः आन व्हत्धै बोङःआकानी। 11 ओउःमयः येसु ख्रीस्कोः ग्वालामः दोःती “ओउः लोने वाङ्सा खेःओ चाक्पाय् लीह्सीःओ गोरःआक्तीको लोने आन पेतोमा तोङ्ह्तोलेः स्याव्लेःनाः” त दाय्ह्ती ङ्हासै येसु ख्रीस्कोः कुरा छ्यानःआकानी। ओउःच्युक्पाय् छ्यानःसापाय् छ्यानःनीतो ओउः बेलाहाङः गतलो दाङ्नाः गलखा वाङ्नाः त चीःसाकायः आन बोङःआकानी। 12 ख्रीस्कोः कुरा एत छ्यानःतोक्हाङः “लौ इ नीङ्इ छ्यानःओ कुरा नीङ्कायः खेःल लोने वाङ्सा मान्तालम्कायः स्याव्लेःनाः” तमा ओउःमयःकायः छ्यानःओ खेःतो। ओउः लोने वाङ्सा मान्तालम्पाय् नीङ्लेः खेःतेःनै। फेरी ओउः येसु ख्रीस्कोः कुरापाय् तेन्छ्याङ् परमेस्वर्कोः लाङ्कासै ल्होक्ओ ग्वालामःकोः ग्वम् दोःओलम्इ नीङ्कायः छ्यानःओ पेओ समचार् लेःआः बा। इ कुरामा परमेस्वर्कोः लाङ्काहाङः मुओ ल्होक्ओमयः योसामा तय्ह्सामा आन झाह्नै। 13 ओउःत खेःओ ग्रमःत मुती ल्हुङ् व्हाय्तोलेः स्याव्तेःपै। “येसु ख्रीस्कोः थाती वाङ्सा दीन्हाङः पेतोलेः स्याव्नाःतय्ही” त दाय्ह्ती ओउः दीन् योसाकायः झाह्तोलेःमा चोङाय्तोलेःमा ल्युङ्ह्नु। 14 द्याह् नीङ्पाय् परमेस्वर्कोः चोःलो लेखालेः ओउःकोः कुराखे ग्यातीलेः सायःन ओहाङःसै ओउः ङ्हाकोः व्हाय्मालो बेलाहाङःकोः रेव्तो मोह्हाय्ओ कुराखे ग्याती जाङ्ह्लाम्। 15 ओउः रेव्तो जाङ्ह्मामाःत नीङ्कायः गोत्ओ परमेस्वर्लो लेखालेः रेव्ओ काम्सै पेङ्कलःती ओजायः जय्कुमःत नीङ्तो स्याव्ती वाह्न। 16 दोह् हायःती दाय्ह्सा परमेस्वर्कोः आखरःहाङः “लौ ङापाय् ओजायः जय्कुमःत नीङ्तो मुलेःनाङः ङालो लेखालेः नीङ्मा ओजायः जय्कुमःत स्याव्न” त दाय्ह्ती परमेस्वर् दाय्ह्ओ त लेखती मुनाः। 17 ओउः सुकायःमा छमाःत घार्तीलेः तय्छनःती योओ परमेस्वर्कायः तेती तोओ बेलाहाङः ओउःकायः नीङ् “आपाय” त गोत्ती तोतेःनानी ओउःत झ्यान्ते ल्हाव्ह्दैबाङ्हाङः वाह्ती मुतोक्हाङः परमेस्वर्कः एङःती मुनाः। 18-19 नीङ्कोः आय्कानः तोकानःइ आह्रे जवती जाङ्ह्ओसै दल्ताक्साकायः ह्र्याती मीह्ती वाय्सा खाय्ओ सुन् चान्दी ल्हाङःती बयःओ खेःबाय्ल त नीङ्इ चीःतेःनानी। सुन् चान्दीखेपाय् खेःल ओउः सबैसै महङ्गो येसु ख्रीस्कोः ल्हाती गम्ओ वयःखे ल्हाङःती बयःओलेः। ओउः ख्रीस्पाय् पेओमा केह्ओ भेदा मेत्छ्याःकोः चोःलो लेखालेः सात्साकायः ल्हाओ लेःआः। 20 फेरी ओउःत हायःसाकायः ल्हाव्ह्दैबाङ् जापीनःती न्यास्धाङ्मालो बेलाहाङः येसु ख्रीस्पाय् छ्युङ्ह्ओलेः खेःतो लोने नीङ्कायःलेः छ्यानःसालेः ताप्आ। 21 येसु ख्रीस् वाङ्ती झ्यान्ते ओउःकायः सीओसै उह्ती च्योक्ताक्ओमा ताङ्ह्ताक्ओ परमेस्वर्कायःलेः ङ्हाम्तेःनानी। ओउःत खेःओ नीङ् परमेस्वर्कायः ङ्हाम्ती चोङाय्तीलेः ल्युङ्ह्ती मुतेःनै। 22 परमेस्वर्कोः दोङ् कुरा ग्याती जाङ्ह्ती नीङ्पाय् नीङ्तो ल्हुङ् दोःती अरु परमेस्वर्कायः ङ्हाम्ओलम्कायः पेतोलेः राप्सा खाय्तेःनानी ओउःत खेःओ ओउःमयःकायः दोङ् पेतोलेः राप्काय्न दा। 23 लौ नीङ्पाय् द्याह् रौ जीङः दोःतेःनै बा। इ रौ जीङःपाय् ल्हाव्ह्दैबाङ्कोः सीती वाय्सा खेःओ जीङःलेः खेःबाय्ल। इ जीङःखेपाय् परमेस्वर्कोः गलमा वाय्मालो नोःराय्सै दोःनाः बा। 24 “लौ सबै मान्तालम्पाय् बन्कोः बीरुवालो लेखालेः मुनै ओउःमयः बन्कोः रोजम्च्युक्लेः पेओलेः मुनै। बन्पाय् ह्र्योक्ती वाय्मानाः ओउःकोः रोमा भ्र्याक्ती झ्योम्ह्तीलेः झ्यार्ती वाय्मानाः। ङी मान्तालम्खेपाय् ओउःतलेः सीती वाय्लेःनाःतय्ही 25 परमेस्वर्कोः नोःराय्खे गलकायःमा वाय्माःत मुलेःनाः” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। फेरी इ नोःराय्पाय् नीङ्कायः थोल्ह्ती तोओ पेओ समचार् लेःआः बा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.