१ युहना 4 - चेपाङ1 लौ राप्ओ पुःचोङ् हौचोङ्य “ङापाय् परमेस्वर्कोः ग्वालामः दोःआलाङः” त तोओ मान्ताकायः सबै ङ्हाम्तेःचनै ओउःइ दोङ्सी तोओ खेःनाःया खेःलया ङ्हा योआक्सा खेःतो। दोह् हायःती दाय्ह्सा नाःतो माःती तोओ कुरा छ्यानःओमयः ल्हाव्ह्दैबाङ्हाङः वाह्ती मुनै ओउःत झ्यान्ते योसाआः। 2 परमेस्वर्कोः ग्वालामः दोःओ मान्ताकायः गत हायःती तय्ह्सा दाय्ह्सा। सुसुखेइ “लौ येसु ख्रीस्पाय् मान्ता स्याव्तीलेः वाङ्आ” त दाय्ह्ती तोचानी ओउःलेः दोङ्सी परमेस्वर्कोः मान्ता लेःआः। 3 सुसुखेइ “येसु ख्रीस्पाय् गलमा मान्ता स्याव्ल” त तोचानी ओउःलेः परमेस्वर्कोः खेःबाय्ल ख्रीस्कोः बीरोत्कोः कुरा तोओ लेःआः बा। ओउः बीरोत्कायःपाय् “वाङ्लेःनाः” त दाय्ह्ओ सायःतेःआकान् दोङ्सीलेः ओउःपाय् ल्हाव्ह्दैबाङ्हाङः द्याह् वाङ्ती मुलेःआनाः बा। 4 लौ हौचोङ्य नीङ्पाय् परमेस्वर्कोः मुती झ्यान्ते ओउः माःती तोओमयःकायःतेः क्लीमःतेःआकानी। नीङ्इ दोःओ परमेस्वर्कोः ग्वालामःपाय् ल्हाव्ह्दैबाङ्हाङः मुओ ख्रीस्कोः बीरोत्सै न्हाङ्तोलेः व्हाय्तो लेःआः। 5 ओउः माःती तोओलम्पाय् ल्हाव्ह्दैबाङ्कोः लेःआः। ओउःमयः तोओ कुरा मान्ताकोः कुरा ह ओउःत झ्यान्ते ल्हाव्ह्दैबाङ्कोः मान्तालम्खेइ ओउःमयःइ तोओ कुरा ग्यातीलेः सायःनानी। 6 ङीखेपाय् परमेस्वर्कोः लेःआः तय्ही। परमेस्वर्कायः तय्ह्ओमयःखेइ ङीइ तोओ कुरा ग्याती सायःनानी। परमेस्वर्कायः तय्ह्मालोमयःखेइ ङीकायः सायःतय्हीली ओउःत झ्यान्ते परमेस्वर्कोः ग्वालामः दोःती दोङ् कुरा तोओमयः सुखेलो त तय्छनःती योसामा खाय्नाःतय्ह्नी। फेरी दोःमालो माःती तोओमयःमा सुखेलोमा त तय्छनःती योसामा खाय्नाःतय्ह्नी। 7 लौ राप्ओ पुःचोङ् हौचोङ्य लयःमयः राप्काय्इसी दोह् हायःती दाय्ह्सा पेओ राप्ओ ल्हुङ् परमेस्वर्कःसै वाङ्ओआः बा। अरुकायः राप्ओलम्खे परमेस्वर्कोः रौ जीङः दोःती ओउःकायः तय्ह्नानी। 8 अरुकायः राप्मालोलम्खेइ परमेस्वर्कायः तय्ह्नीली दोह् हायःती दाय्ह्सा परमेस्वर्कोः ल्हुङ्पाय् अरुकायः राप्ओ ल्हुङ् लेःआः बा। 9 ङी रौ जीङः दोःताक्साकायः परमेस्वर्इ लयःकोः ल्हुङ्गोरे चोःलेः इ ल्हाव्ह्दैबाङ्ताङ् ल्होक्आकान्। एत हायःतीलेः ओउःइ ङीकायः आन राप्ओ त छ्यानःआतय्ही। 10 माः रैस इपाय् दोङ् राप्ओ लेःआः। ङीखेइ ओउःकायः राप्ओ खेःल ङीइ ओउःकायः राप्धाङ्माखाहाङः ओउःखेइ ङीकोः रेव्झ्याङ्कोः क्युम्ह्ती वाय्साकायः लयःकोः चोःपाय् आङ् ल्हाङःती बयःसा थेङा ल्होक्आतय्ही। 11 ओउःत खेःओ राप्ओ पुःचोङ् हौचोङ्य परमेस्वर्इ ङीकायः एतलेः राप्ती झ्यान्ते ङीइ लयःमयःकायः राप्सा खेःनाःतय्ही। 12 परमेस्वर्कायः ङीपाय् सुइमा गलकायःमा मीक्इ च्यवःतय्ह्नीली। ङीइ अरुकायः राप्नाःतय्ह्नी त खेःया परमेस्वर् ङीकुस् ब्राङ्तोलेः मुनाः ओहाङःसै ओउःकोः राप्ओ ल्हुङ् जुगाङ् पेतोलेः छ्यानःनाःतय्ह्नी। 13 ङी ओउःकुस् ब्राङ्नाःतय्ही त गत हायःती चीःनाःतय्ह्नी दाय्ह्सा। ङीकायःपाय् परमेस्वर्इ लयःकोः ग्वालामः बयःआतय्ही ओउःत झ्यान्ते ङी ओउःकुस्मा ब्राङ्नाःतय्ही ओउः ङीकुस्मा ब्राङ्नाःतय्ही त चीःनाःतय्ह्नी। 14 परमेस्वर् आपाइ लयःकोः चोः सबैकायः दल्ताक्सा थेङा ल्हाव्ह्दैबाङ्ताङ् ल्होक्आकान्। ओउःत ङीइ च्यवःती झ्यान्ते थोल्ह्ती तोनाङःसु। 15 सुसुइ “लौ येसुपाय् परमेस्वर्कोः चोः लेःआः” त दाय्ह्ती तोनानी ओउःकुस्लेः परमेस्वर् मुनाः ओउःलेः परमेस्वर्कुस् मुनै। 16 ओहाङःसैको “ङीकायः परमेस्वर्इ राप्नाःतय्ही” त चीःती ङ्हाम्नाःतय्ह्नी। परमेस्वर्कोः ल्हुङ् जुगाङ् राप्ओ ल्हुङ् लेःआः बा। फेरी अरुकायः राप्ओचाक्कुस्लेः परमेस्वर् मुनाः ओउःलेः परमेस्वर्कुस् मुनै। 17 इतलेः ङीकोः ल्हुङ्पाय् पेतो राप्ओ ल्हुङ् स्याव्नाः पेतो स्याव्आक्तीको ओउः वाङ्सा खेःओ तय्छनःती योसा दीन्हाङः ङी ख्रीस्लो लेखा स्याव्ती झ्यान्ते रैसा परतय्हीली। 18 सुसुइ परमेस्वर्कायः पेतो राप्नानी ओउः मान्ता परमेस्वर्कः रैइली ओउःकायः राप्तोक्हाङः रैओ ल्हुङ् वाङ्ल। “परमेस्वर्इ लोने न्युम्ह्आताङः” त म्हर्ती यात्नीस्चाक् ओउःकः रैनै। ओउःत रैओ मान्ताखे पेतो राप्सा चीःधाङ्उलु। 19 ङीकायःपाय् परमेस्वर्इ ङ्हासै राप्आतय्ही ओउःत झ्यान्ते ङीइमा द्याह् ओउःकायःमा अरुकायःमा राप्नाःतय्ह्नी। 20 यात्चाक्इ “लौ ङाइ परमेस्वर्कायः राप्नाङः” त दाय्ह्ती लयःकोः पुःचोङ् हौचोङ्कायः राप्उलु त खेःया ओउःइलेः माःती तोनौ बा। दोह् हायःती दाय्ह्सा लयःकोः मीक्इ च्यवःसा खाय्ओ हौचोङ् पुःचोङ्कायः राप्उलु त खेःया ओउःइ गत हायःती ओउः गलमा च्यवःमालो परमेस्वर्कायः राप्सा खाय्चौ र खाय्उलु है। 21 इतलेः परमेस्वर्इ तोआतय्ही “सुसुइ परमेस्वर्कायः राप्सा बोङःचनौ ओउःइलेः लयःकोः पुःचोङ् हौचोङ्कायः राप्पाःथास” त दाय्ह्ती तोओआः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.