१ युहना 3 - चेपाङ1 परमेस्वर्इ इच्युक् पेतोलेः राप्नाःतय्ही ङीकायःपाय् ओउःइ “लौ ङाकोः चोः लेःआः” त दाय्ह्ती तोनाःतय्ही। माः रैस दोङ्सीलेः ओउःकोः चोः लेःआः तय्ही अरु ल्हाव्ह्दैबाङ्कोः मान्तालम्इ परमेस्वर्कायः तय्ह्माःत झ्यान्ते ङीकायःमा तय्ह्तय्हीली। 2 लौ राप्ओ पुःचोङ् हौचोङ्य ङीपाय् द्याह् परमेस्वर्कोः चोः लेःआः तय्ही ङी “लोनेः गत स्याव्नाःतय्ही” त ङीकायः छ्यानःधाङ्तय्हीली। इत ह चीःनाःतय्ही “ख्रीस्कोः लोनेः वाङ्सा बेलाहाङःपाय् ङी ओउःकायः दोङ् पेतोलेः च्यवःतोक्हाङः ओउःलो लेखा थाङ्ती स्याव्नाःतय्ही” 3 ओहाङःसैको सुसुखे ख्रीस्लो लेखा स्याव्सा झाक्नै ओउःलेः ख्रीस्लो लेखा ओजायःत गम्नाःइसी। 4 रेव्ओ जाङ्ह्ओलम् परमेस्वर्कोः ऐन्कोः हुकुम्लम् सायःनीली ओउःकोः हुकुम् सायःमासा इपाय् रेव्ओ काम् लेःआः बा। 5 “ङीकोः रेव्ओपाय् क्युम्ह्ती वाय्साकायः ख्रीस्लेः थाती वाङ्ओआः” त चीःनाःतय्ह्नी ओउः ख्रीस्पाय् रेव्ओ खेःबाय्ल। 6 आने ख्रीस्कः ब्राङ्ओमयःखेइ रेव्ओ काम् जाङ्ह्माःत वाह्नै। सुसुखेइ रेव्तो जाङ्ह्धैलेः मुनै ओउःलेः ख्रीस्कायः च्यवःमालो तय्ह्मालो लेःआः इ। 7 लौ हौलम्य अरुइ माःती तोओ कुरा सायःतेःचानी। पेओ काम् जाङ्ह्ती वाह्ओचाक्खेपाय् पेलेःनाः बा ख्रीस्लो लेखा पेलेःनाः। 8 सुसुखेइ रेव्तो जाङ्ह्ती वाह्चनै ओउःलेः सैतान्कोः चाक् लेःआःइ। सैतान्इपाय् ङ्हाहाङःसै रेव्तो जाङ्ह्लयःआकान् ओउः सैतान्कोः काम्लम् ह्र्योङःती वाय्साकायः परमेस्वर्कोः चोःलेः थाती वाङ्आ। 9 परमेस्वर्कःसै रौ जीङः दोःओ मान्तापाय् रेव्ओ काम् जाङ्ह्ती वाह्इली ओउः जीङःपाय् परमेस्वर्कःसै दोःओ त झ्यान्ते एत हायःनीली। 10 रेव्ओ काम् जाङ्ह्ओ मान्तामा पुःचोङ् हौचोङ्कायः राप्मालो मान्तामा परमेस्वर्कोः खेःबाय्इली ओउःत खेःओ “परमेस्वर्कोः मान्ता सुखेलो सैतान्कोः मान्ता सुखेलो” त तय्छनःती चीःसा खाय्नाःतय्ह्नी। 11 नीङ्इ ङ्हाहाङःसै सायःओ कुरा इ लेःआः बा “नीङ् लयःमयःकायः राप्काय्नीङ्सी” त तोओपाय् ओउःत ङ्हाहाङःलेः बयःतेःआकाय्। 12 उय्ह्लेहाङः मुओ कैन् त तोओलो लेखा हायःतेःचानी। ओउःइपाय् सैतान्कोः मान्ता स्याव्ती लयःकोः हौकायः सात्आकान् दोह् हायःती दाय्ह्सा ओउःइ रेव्ओ काम्खे जाङ्ह्उतो हौखेइ पेओ काम् जाङ्ह्आकान्। 13 एत स्याव्ती झ्यान्ते ल्हाव्ह्दैबाङ्कोः मान्तालम्इ नीङ्कायः राप्तेःइली त खेःया ग्याङ्ह्तेःचै। 14 लौ ङीखेइ लयःकोः पुःचोङ् हौचोङ्कायः राप्नाःतय्ह्नी। एत हायःती “ङी सीसा खेःओ जीङः फेती गलमा द्योक्मालो रौ जीङः दोःआतय्ही” त चीःनाःतय्ह्नी। लयःकोः पुःचोङ् हौचोङ्कायः राप्मालो मान्ताखेपाय् रौ जीङः दोःइली ओउःकोः सीसा खेःओ जीङःपाय् मुलेःनाः। 15 सुसु लयःकोः पुःचोङ्कः जुगाङ् झाक्मालो मुचनै ओउःलेः सात्रेव् मान्तालो लेखा स्याव्नै। ओउःत ताङ्ह्ओ मान्ताकोः रौ जीङःपाय् गलमा मुल। 16 येसु ख्रीस्इलेः ङीकायः दल्ताक्साकायः लयः सीसा ग्याओ खेःतो ओउःत हायःती झ्यान्ते “ओउःइ दोङ् पेतोलेः राप्नाःतय्ही” त चीःनाःतय्ह्नी। ङीमा लयःकोः पुःचोङ् हौचोङ्कायः सीसा ग्यासा खेःनाःतय्ही। 17 फेरी पैसा नाःओ मान्ताखे ह्र्यात् हौखेकः ल्हुङ् योनःमाःत र्युम्तो स्याव्नाः त खेःया ओउः नाःओ मान्तापाय् परमेस्वर्कोः राप्ओ ल्हुङ् चीःउलु बा। 18 लौ हौलम्य ङीइ नाःमालो हौकायः योती “लौ ङाकोः हौकायः आन राप्नाङः” त तोती दोह्मा बयःसा ग्यामालो मुचाःतय्ही त खेःया ओउःपाय् स्याव्ल। दोह्त नीङ्इ लेइ नोःतेःनै ओउःतलेः क्रुत्इमा जाङ्ह्सा खेःतो। 19 ओहाङःसैको ङीइ दोङ् कुरा हायःनाःतय्ही त चीःती परमेस्वर्कःहाङः फुतीलेः वाङ्ती ल्हुङ् धोमाय्तोलेः मुसा खाय्नाःतय्ह्नी। 20 ङी रेव्ओ जाङ्ह्आक्तीको ल्हुङ् रुःती मुतोक्हाङः परमेस्वर्इ ङीसै व्हाय्ती झ्यान्ते ओउःपाय् सबै चीःलेःनौ। 21 खेःल ङी ल्हुङ् रुःमामाःत मुचाःतय्ही त खेःया ङी परमेस्वर्कुस् सोकार्तोलेः मुनाःतय्ही। 22 ओहाङःसै ओउःइ झाक्ती तोओ कुरापाय् ओउःकायः म्रोताक्तीलेः जाङ्ह्नाःतय्ह्नी त खेःया दोह्लो ङी ओउःकः तेनाःतय्ही ओउःलेः दोःनाःतय्ही। 23 ओउःइ दोह्त तोनाःतय्ही दाय्ह्सा ङीइ ओउःकोः चोः येसु ख्रीस्कायः ङ्हाम्ती लयःमयः राप्काय्सा खेःनाःतय्ही ओउःतलेः परमेस्वर्इ तोआतय्ही। 24 ओउःइ तोओ कुरा जाङ्ह्ओ मान्तापाय् परमेस्वर्कुस् ब्राङ्नाःच परमेस्वर्मा ओउःकुस् ब्राङ्नाःच। ओहाङःसैको परमेस्वर्इ बयःओ ग्वालामः दोःआक्तीको ओउःपाय् ङीकुस् ब्राङ्ओ लेःआः त चीःनाःतय्ह्नी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.