१ युहना 2 - चेपाङ1 लौ हौलम्य “नीङ् रेव्तो हायःओ जाङ्ह्माःत मुन” त दाय्ह्ती इ कुरा लेखनेःनाङ्स। ओउःत लेखनाङ्सतो सुलाङःइ रेव्ओ काम् जाङ्ह्चनौ त खेःया ओउःकायः येसु ख्रीस्इलेः परमेस्वर् आपाकः तेती तोसा ग्यानाः। ओउः येसु ख्रीस्पाय् गलमा रेव्ओ हायःमालो लेःआः 2 ओउःइ ङीकोः रेव्झ्याङ्कोः वाय्साकायः लयःकोः आङ् ल्हाङःती न्युम्ह्ताक्ती वयः क्लेह्ती सीलेःआ। माः रैस ङीकोः रेव्झ्याङ्कोः ह आले खेःल सबै ल्हाव्ह्दैबाङ्हाङः मुओलम्कोः रेव्झ्याङ्कोः वाय्साकायः सीओआः बा। 3 इतलेः “परमेस्वर्कायः तय्ह्आतय्ही” त चीःसा खाय्नाङःसु ङीइपाय् ओउःइ तोओ कुरा ग्याती जाङ्ह्नाःतय्ह्नी त खेःया ङीइ परमेस्वर्कायः पेतो तय्ह्नाःतय्ह्नी। 4 सुसुइ “परमेस्वर्कायः तय्ह्लेःनाङः” त दाय्ह्ती मुनाः ओउःइ तोओ कुरा जाङ्ह्उलु त खेःया ओउःखेपाय् दोङ् ल्हुङ् नाःमाःत माःतीलेः तोनौ। 5 सुसुखेइ ओउःइ तोओ कुरा ग्याती जाङ्ह्नाःतय्ह्नी दोङ्सीलेः ओउःइ परमेस्वर्कायः पेतो राप्ओलेः मुनाः ओहाङःसै “परमेस्वर्कुस् ब्राङ्ती वाह्नाःतय्ही” त चीःनौ। 6 फेरी “ङा परमेस्वर्कुस् ब्राङ्ती वाह्नाङःच” त दाय्ह्ती दाय्ह्ओ मान्ता ओउःपाय् ख्रीस्लो लेखा पेतो वाह्सा खेःतो। 7 लौ हौलम्य इ ङाइ लेखओ कुरा नया अह्र्त खेःल उय्ह्लेकोः लेःआः बा। ओउःपाय् नीङ्कायः ङ्हाहाङःसै तोती बयःओलेः खेःतो। 8 ओउः अह्र्तपाय् आय् अह्र्त खेःसापाय् खेःलेःनाः बुरु गलकायःमा रौलेः स्याव्नाः। ओउः कुराकायःपाय् “दोङ् कुरा लेःआः” त ख्रीस्इमा सबैकायः छ्यानःआकान् ओउःतलेः नीङ्इमा छ्यानःतेःनानी। ओउः कुरापाय् इ लेःआः “द्याह् च्याक्ओखे क्रव्लेःनाः दोङ् थोङ्ओखे दाह्सा बोङःती मुनाः” 9 सुसुखेइ अरु ङ्हाम्ओ हौकायः राप्माःत “ङा थोङ्ओहाङः येसुकुस् वाह्नाङः” त दाय्ह्ती दाय्ह्चाः ओउःलेः व्हक्माःत दोङ्सीलेः च्याक्ओहाङः मुधाङ्लेःनै। 10 सुसुखेइ ङ्हाम्ओ हौकायः राप्चानानी ओउःलेः थोङ्ओहाङः तोन्माःत वाह्नै। 11 ओउः हौकः ब्लाय्क्ओ मान्ताखे च्याक्ओहाङः वाह्धै मुनाः ओउःइ च्यवःसा खाय्मालो मुनाः त झ्यान्ते “गाःहाङः आल्नाङः” त चीःउलु। 12 लौ हौलम्य नीङ्कोः रेव्ओपाय् येसु ख्रीस्इ क्युम्ह्ती वाय्ताक्आकान् त झ्यान्ते इ चेती लेखनेःनाङ्स। 13 लौ थालवःपालम्य ओउः ङ्हाहाङःसै मुओ ख्रीस्कायः तय्ह्तेःआकानी ओउःत झ्यान्तेमा इ चेती ङाइ लेखमानेःनाङ्स। लौ लाव्मयःलम्य “ओउः रेव्ताक्ओचाक्कायः क्लीमःतेःआकानी” ओउःत झ्यान्ते नीङ्कायः लेखमानेःनाङ्स। 14 लौ हौलम्य परमेस्वर् आपाकायःतेः तय्ह्तेःनानी ओउःत झ्यान्ते नीङ्कायः लेखनेःनाङ्स। लौ थालवःपालम्य ओउः ङ्हाहाङःसै मुओ ख्रीस्कायः तय्ह्तेःनानी ओउःत झ्यान्ते नीङ्कायःमा लेखनेःनाङ्स। लौ लाव्मयःलम्य परमेस्वर्इ तोओ कुरापाय् नीङ्कोः ल्हुङ्हाङः सेती गम्ती नीङ्इ गेतीलेः सैतान्कायः क्लीमःतेःआकानी ओउःत झ्यान्तेमा नीङ्कायःमा लेखनेःनाङ्स। 15 इ ल्हाव्ह्दैबाङ्मा ल्हाव्ह्दैबाङ्कोः कुरामा नाःतो झाक्तेःचनै। सुसुइ ल्हाव्ह्दैबाङ्कोः थोक्लम्पाय् झाक्चानानी ओउःकःहाङः परमेस्वर्कः झाक्ओ ल्हुङ् नाःइली। 16 ल्हाव्ह्दैबाङ्हाङः दोह् दोह् कुरा मान्तालम् च्यवःमानानी झाक्मानै क्युसा बोङःमानानी ओउः कुराकायः मोह्हाय्ओ ल्हुङ्पाय् ङाःओ ल्हुङ्पाय् परमेस्वर् आपाकःसै वाङ्ल इ खाल् ल्हाव्ह्दैबाङ्कोः ल्हुङ् ह लेःआः बा। 17 ओउः ल्हाव्ह्दैबाङ्मा ओउःकोः मोह्हाय्सीःओ कुराखेमा मीह्ती वाय्लेःनाः सुसुखेइ परमेस्वर्कोः कुरा जाङ्ह्चनौ ओउःलेः गलमा वाय्माःत मुनै। 18 लौ हौलम्य ल्हाव्ह्दैबाङ्कोः पुत्ओ दीन्लम् दाह्खयःनाः। “ख्रीस्कोः बीरोत् वाङ्नाः” त तोओ सायःतेःआकानी। द्याह्पाय् ख्रीस्कोः बीरोत्लम् नाःतोलेः वाङ्आकाय् ओउःत झ्यान्ते ओउः ल्हाव्ह्दैबाङ्कोः लोन्दोकोः दीन् “वाङ्खयःआ” त चीःनाःतय्ह्नी। 19 ओउः बीरोत्लम्पाय् ङीकःसै वेङ्इसीतो ङीकुस् दोङ् ब्राङ्ओमयः खेःइली ङीकुस् ब्राङ्ओमयः खेःइतो त खेःया ओउःमयः ङीकःसै वेङ्आक्इली। ङीकःसै वेङ्ती आल्आकाय् त झ्यान्ते ओउःमयः ङीकुस् ब्राङ्मालोलेः त छ्यानःआकानी। 20 नीङ्खेकायः परमेस्वर्इ लयःकोः छय्ङ्तो ग्वालामः त्यावःअसै बयःतेःआकाय् ओउःत झ्यान्ते नीङ्इ सबै दोङ् कुरा व्हाय्तोलेः चीःतेःनानी। 21 नीङ्इ दोङ् कुरा तय्ह्माःत झ्यान्ते लेखनाङ्सल। खेःल नीङ्इ दोङ् कुराखे तय्ह्ती झ्यान्ते माःओ कुराखेकायः “दोङ् कुरा खेःल” त चीःतेःनानी ओउःत झ्यान्ते लेखनेःनाङ्स। 22 सुखेलो “येसुपाय् ओउः वाङ्सा ख्रीस्लेः खेःल” त दाय्ह्ती दाय्ह्ओ मान्ता लेःआः ओउःपाय् माःरेव् मान्ता लेःआः ख्रीस्कोः बीरोत्लेः स्याव्नाः। ओउःखेइ परमेस्वर् आपाकायःमा ओउःकोः चोःकायःमा ङ्हाम्उलु। 23 सुखेइ चोःकायः ङ्हाम्उलु ओउःलेः आपाकुस् मुल सुखेइ चोःकायः ङ्हाम्नौ ओउःपाय् आपाकुस् मुनाःच। 24 लौ उया ओउः ङ्हा सायःओ कुरालेः ल्हुङ्हाङः सेतो गम्नु दा। ओउःपाय् ल्हुङ्हाङः सेतो गम्आक्तीको नीङ् गलकायःमा नीस् आपाचाःकुस् ब्राङ्तोलेः मुतेःनै। 25 ओहाङःसै ख्रीस्इलेः इत तोती गम्ओआः बा ङी गलमा द्युम्मालो रौ जीङः दोःनाःतय्ही। 26 इ कुरा “ओउः नीङ्कायः ब्रःताक्सा बोङःओ माःरेव्लम्कायः धय्ती योती मुन” त दाय्ह्ती लेखनेःनाङ्स। 27 नीङ्खेपाय् ख्रीस्कोः ग्वालामः दोःतेःआकाय्। ओउः ग्वालामःपाय् नीङ्कायः बयःआक्तीको नीङ्कुस् मुलेःनाः त झ्यान्ते नीङ्कायः दोङ् कुरा सबै स्यान्तेःनै अरु स्यान्ओ मान्तापाय् परल। ओउःइ तोओ कुरापाय् माःती तोओ खेःबाय्ल ओउःत स्यान्ओइ तोओलो लेखालेः नीङ् ख्रीस्कुस् गलमा मुतेःनै। 28 लौ द्याह् हौलम्य ख्रीस्कुस् ब्राङ्तो मुन ओहाङःसैको उया ओउःकोः लोने वाङ्सा दीन्हाङः ङी ओउःकायः रास्माःत फुतीलेः क्रुस्नाःतय्ह्नी। 29 ख्रीस्पाय् छय्ङ्तो लेःआः त नीङ्इ चीःतेःनानी ओउःत खेःया परमेस्वर्कोः काम् जाङ्ह्ओचाक्मा ओउःकोः चोः त तोसा लेःआः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.