१ युहना 1 - चेपाङ1 लौ ओउः जीङः बयःसा नोःराय्कोः कुरालेः लेखती छ्यानःनेःनाङ्स। ओउः नोःराय्पाय् ङ्हाहाङःसै मुओआः बा। ओहाङःसैको ओउःकायःलेः ङीइ नोइ सायःमाआलाङःसु मीक्इ च्यवःमाआलाङःसु। माः रैस ओउःकायः ङीइ योती दीन्ह्माआलाङःसु। 2 ओउः जीङः बयःओचाक्पाय् ङ्हापाय् ओउःकोः आपाकुस् मुओ खेःतो ओहाङःसैको थाआक्तीको ङीइ ओउःकायः च्यवःती झ्यान्ते ओउः गलकायः स्याव्सा जीङः बयःओकोः कुरा द्याह् “दोह्लो” त दाय्ह्ती छ्यानःनेःनाङ्स। 3 ओउःत खेःओ ङीइ च्यवःओमा सायःओमा नीङ्कायः ल्हाक्ती तोनेःनाङ्स ओहाङःसै ङीकुस् ब्राङ्तो मुसा खाय्तेःनै। दोङ्सीलेः ङी परमेस्वर् आपाकुस्मा ओउःकोः चोः येसु ख्रीस्कुस्मा ब्राङ्नाःतय्ही। 4 इ कुरापाय् ङीइ “लौ सबै चोङाय्तो स्याव्पाःतय्ही” त दाय्ह्ती लेखनेःनाङ्स। 5 “लौ परमेस्वर् छय्ङ्तो लेःआः बा। ओउःइपाय् रेव्ओ च्याक्ओ काम् दोह्मा जाङ्ह्उलु” त दाय्ह्ओ ङाइ ओउःकःसै सायःआक्तीको छ्यानःनेःनाङ्स। 6 ङी “परमेस्वर्कुस् ब्राङ्नाःतय्ही” त दाय्ह्ती बुरु च्याक्ओहाङः वाह्ती रेव्ओ काम् जाङ्ह्नाःतय्ह्नी त खेःया ङीइ दोङ् कुरा फेती झ्यान्ते माःती तोनाःतय्ह्नी। 7 खेःल ङी ओउःलो लेखा थोङ्ओहाङः वाह्ती पेओ जाङ्ह्नाःतय्ह्नी त खेःया ब्राङ्काय्ती मुनाःतय्ही फेरी परमेस्वर्कोः चोः येसु ख्रीस्त तोओकोः वयःइ ङीकोः रेव्ओ काम् वाय्ती छय्ङ्ताक्नाःतय्ही। 8 ङी “रेव्ओ काम् जाङ्ह्ओलम् खेःङीली” त दाय्ह्चाःतय्ही त खेःया ङी दोङ् व्हक्ओ ल्हुङ् नाःमाःत लयःकायः तोपाल्नाःतय्ह्इसी। 9 खेःल “ङाइ इत पेमालो हायःआलाङः” त दाय्ह्ती घोती तोनाःतय्ह्नी त खेःया दोङ्सीलेः परमेस्वर्इ लयः तोओलो लेखा पेतो हायःती ङीकोः रेव्ओ काम् क्युम्ह्ती ङीकः परमेस्वर् ल्हुङ् स्याङ्नाः ओहाङःसैको जुगाङ् छय्ङ्तो स्याव्नाःतय्ही। 10 “ङाइ रेव्ओ काम् दोह्मा हायःङल” त दाय्ह्ती दाय्ह्चाःतय्ही त खेःया परमेस्वर्कायः माःरेव् मान्तालो लेखा योती ओउःकोः नोःराय्पाय् ल्हुङ्हाङः गम्तय्ह्नीली ङ्हाम्तय्ह्नीली। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.