१ कोरीन्थी 5 - चेपाङ1 नीङ्कःहाङः यात्नीस्चाक् आन रेव्ओ काम् जाङ्ह्ओ मान्ता मुताङःनै। ओउःच्युक् रेव्ओ काम्पाय् जुगाङ् ङ्हाम्मालोलम्इमा जाङ्ह्सा ब्लाय्क्नै। नीङ्कःहाङः “यात्चाक् लयःकोः कान्छी आमाकुस् एनःओलेः” त दाय्ह्ओ सायःआलाङः बा। 2 एत हायःओ चीःती नीङ् ङाःती मुसा खेःआक्ल लीह्ती मुसा खेःतेःइतो। ओहाङःसैको ओउः रेव्तो काम् जाङ्ह्ओ मान्ताकायः रुनःतो ल्होक्सा खेःतो। 3 ङापाय् आङ्खेहाङः लोक्तोलेः मुनाङः ल्हुङ्तुक्खेहाङः ङा नीङ्कुस् ब्रक्तलेः मुनाङः। ओउःत झ्यान्ते ङा नीङ्कुस् मुओलो लेखा येसु ख्रीस्कोः काम् जाङ्ह्ती ङाइ ओउःच्युक् रेव्तो हायःओकायः “जुगाङ् पेल” त दाय्ह्आक्तीको इतलेः तोनेःनाङ्स। 4 लौ नीङ् हुम्ती मुओ बेलाहाङः ङामा ल्हुङ्हाङः नीङ्कुस् मुलेःनाङः ओउः बेलाहाङः ङीकोः प्रभु येसु ख्रीस्कोः ग्वम् दोःती 5 ओउः रेव्ओ काम् जाङ्ह्ओ मान्ताकायः सैतान्कःताङ् ल्हानु दा। ओउःकोः आङ्खे वाय्धार्ना “ओउःकोः जीङःखे प्रभु वाङ्सा खेःओ दीन्कायः दल्तो स्याव्पाः” त दाय्ह्ती ओउःत हायःनु दा। 6 लौ नीङ्कोः ङाःती नोःओपाय् स्याव्ल। क्राक्ओ ओय्क्हाङः यात् पीन् फताक्सा ओखोत् काआक्तीको लाङ् जुदालेः फताक्नौ त नीङ्इ चीःतेःनानी। ओउःलो लेखालेः यात्चाक् रेव्ओ मान्ताइपाय् सबै ङ्हाम्ओ मान्तालम्कायः रेव्ताक्सा खाय्नौ। 7 ओउःत झ्यान्ते ओउः रेव्ओ काम् जाङ्ह्ओ मान्ताकायः ल्होक्सा खेःतो। ओहाङःसैको नीङ् छय्ङ्तोलेः स्याव्तेःनै फताक्ओ ओखोत् कामालो लाङ्लो लेखालेः। नीङ् सबै रेव्ओलेः खेःतेःआक्तेःइली दोह् हायःती दाय्ह्सा च्योल्ओ दीन्कोः ल्हाती सात्सा भेदाकोः चोःलो लेखालेः ङीकायः दल्ताक्ओ ख्रीस्पाय् सात्ओ लेःआः। 8 च्योल्ओ दीन्कोः छ्यात् जवओलम् ओखोत् कामालो लाङ् जेःनानी। ओउःमयःलो लेखालेः ङीपाय् पेमालो रेव्ओ ल्हुङ् खेःल दोङ् पेओ छय्ङ्तो ल्हुङ् स्याव्तीलेः वाह्पाःतय्ही। 9 ङाइ ङ्हा लेखओहाङः “लौ ल्हास्या काम् जाङ्ह्ती वाह्ओमयःकुस् ब्राङ्ती वाह्तेःचनै” त लेखङोतो 10 ओउःत लेखओआः जुगाङ् ङ्हाम्मालोलम्खेकायः लेखङल। ल्हाव्ह्दैबाङ्कोः ल्हास्यालम् लओ कुःओ मुर्ती मानओ मान्तालम्खेकायः ङाइ तोङल। इ ल्हाव्ह्दैबाङ्कोः मान्तालम् जुगाङ् फेसाकायः ल्हाव्ह्दैबाङ्सैलेः क्रव्सा खेःतेःइतो। 11 खेःल ङाइ ङ्हाम्ओलम्खेकायः ह लेखनेःनाङ्स। नीङ्कःहाङःपाय् यात्चाक् एत रेव्तो जाङ्ह्ओ मान्ता लओ मान्ता मुर्ती मानओ मान्ता पेमालो नोःओ मान्ता हान् ङोती तुङ्ओ मान्ता पैसा जेःओ मान्ता मुनाः त खेःया ओउःकुस् वाह्लाम् जेःलाम्। एतलेः तोनेःनाङ्स। 12-13 ङ्हाम्मालो मान्तालम्कायः तय्छनःती योलाङ् वाङ्ओ खेःङल ओउःमयःकायः परमेस्वर्इलेः तय्छनःती योनौ। नीङ्खेइ लयःमयःकोः मान्तालम् तय्छनःती योतो रेव्ओलम्कायः ल्होक्नु दा। “रेव्तो जाङ्ह्ओलम्कायः लयःकःसै ल्होक्नु” त दाय्ह्ओ परमेस्वर्कोः आखरःहाङःमा लेखती मुनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.