१ कोरीन्थी 11 - चेपाङ1 ङाइ ख्रीस्कोः काम् तेःती जाङ्ह्नाङः नीङ्इमा ङालो लेखालेः ओउःकोः काम् तेःती जाङ्ह्नु दा। 2 ङाकायः गीलती ङाइ तोओ कुरापाय् ङाइ स्यान्ओलो लेखालेः नीङ्इ म्हेःमाःत सबै जाङ्ह्तेःनानी ओउःत ङाइ लुङ्तीलेः तोनेःनाङ्स। 3 ओउःत हायःसा स्याव्नाः यात्ज्याङ् अरु कुरा तोसा खेःनेःनाङ्स। सबै गोय्चोःकोः हुकुम् बयःसाचाक् ख्रीस् लेःआः सबै मोमःचोःकोः हुकुम् बयःसाचाक्पाय् गोय्चोः लेःआः फेरी ख्रीस्कोः हुकुम् बयःसापाय् परमेस्वर्लेः खेःनाः। 4 परमेस्वर्कायः तेती तोओ मान्तामा ओउःकोः कुरा छ्यानःती तोओ मान्तामा तालाङ् खुप्माःत तोसा खेःतो। सुसु गोय्चोः तालाङ् खुप्ती तोचानानी ओउःइलेः ख्रीस्कायः ङ्हाम्मालो मान्तालो लेखा मीताक्तो जाङ्ह्नानी। 5 फेरी परमेस्वर्कायः तेती तोओ मोमःचोःमा ओउःकोः कुरा छ्यानःती तोओ मोमःचोःमा तालाङ् खुप्माःत मुनै त खेःया लयःकोः बुधाकायः मीताक्नाःथास। ओउः मोमःचोःपाय् अह्र्सीःओ म्याङ् खुर्ती वाय्ओ मोमःचोःलो लेखा लेःआः। 6 ओउःत झ्यान्ते मोमःचोःपाय् तालाङ् खुप्माःत मुनै त खेःया ओउःकायः म्याङ् खुर्पाःथास। खेःल म्याङ् खुर्ती वाय्सा स्याव्ल त खेःया मोमःचोःखेपाय् तालाङ् खुप्ती मुपै। 7 गोय्चोःखे तालाङ् खुप्सा स्याव्ल दोह् हायःती दाय्ह्सा ओउःइखे “परमेस्वर्लेः गतलो” त छ्यानःती ओउःकायः ताङ्ह्ताक्मानौ। मोमःचोःलम्खेइ गोय्चोःकायः ताङ्ह्ताक्नानी। 8 ओउः ङ्हा थाती मुओ गोय्चोः मोमःचोःकःसै जाङ्ह्ओ खेःल मोमःचोःखे ओउः गोय्चोःकःसै ङ्हापाय् जाङ्ह्ओ खेःतो। 9 फेरी गोय्चोःपाय् मोमःचोःकायः जाङ्ह्ओ खेःल मोमःचोःखे गोय्चोःकायः जाङ्ह्ओ लेःआः। 10 एत स्याव्आ त खेःया परमेस्वर्कोः लाङ्कासै ल्होक्ओमयःकायः छ्यानःसाकायः मोमःचोःलम्पाय् तालाङ् खुप्ती मुसा खेःइतो। 11 एत हायःसा खेःतो ङीइ प्रभुकोः मान्ता स्याव्ती वाह्तोक्हाङः गोय्चोःकायःमा मोमःचोः परनाः फेरी मोमःचोःकायःमा गोय्चोः परनाः। 12 दोह् हायःती दाय्ह्सा ओउः ङ्हाकोः मोमःचोःपाय् गोय्चोःकःसै वाङ्आ लोनेकोः गोय्चोःलम् मोमःचोःकःसै वाङ्नै फेरी सबैकोः मुल्दुङः परमेस्वर् लेःआः। 13 गततेः म्हर्तेःनै। परमेस्वर्कः तेती तोतोक्हाङः मोमःचोःलम् तालाङ् खुप्माःत मुसा स्याव्ल माःर। 14 माः रैस गोय्चोःखे ग्याङ्ओ म्याङ् मुसा अह्र्सीःतो त नीङ्इ लयःकोः ल्हुङ्हाङः चीःतेःनानी। 15 मोमःचोःखे ग्याङ्ओ म्याङ् मुसा पेलेःनाः। ओउःकोः म्याङ् मोमःचोःकायः पेताक्नाःथास दोह् हायःती दाय्ह्सा म्याङ्पाय् मोमःचोःकोः तालाङ् खुप्साकायः बयःओआः। 16 एत ङाइ तोनेःनाङ्स ङाकोः कुरा यात्नीस्इ सायःसा ग्याइली त खेःया लौ ङीइमा सबै ख्रीस्कोः ङ्हाम्ओलम्इमा अरु दोह्मा जवङुसुलु। 17 यातैज्योः अरु कुराकायः ङाइ लुङ्ती तोनेःनाङ्सल। हुम्ती वाङ्ओ बेलाहाङः नीङ्इ पेतो हायःओ खेःल पेमालो हायःतेःनीली 18 दोह् हायःती दाय्ह्सा नीङ् वेङ्काय्ती मुतेःनै त सायःआलाङः फेरी ओउः कुरापाय् माःलेः यादो त म्हर्गार्आलाङः। 19 ओउःत वेङ्काय्ओपाय् स्याव्सा खेःसापाय् खेःलेःनाः दोह् हायःती दाय्ह्सा परमेस्वर्कायः म्रोताक्ओलम् “सुलो” त छ्यानःसाकायः अरुकःसै एत वेङ्काय्सा खेःतो यादो। 20 ओहाङःसैको यातै थाव्हाङः हुम्ती वाङ्ओहाङः नीङ् प्रभुकोः भोस् पेतो जेःसाकायः वाङ्तेःइली 21 दोह् हायःती दाय्ह्सा जेःतोक्हाङः नीङ् लःलयःकायः जेःतेःनाःइसी ह। यात्चाक्इ अरुकःसै ङ्हा जेःतेःनानी यात्नीस् अरुखे योङ्क्राय्ती मुनै अरुखे ङोती मुनै। 22 दोङ्सीलेः जेःसा तुङ्साकायः नीङ्कोः लयःकोः कीम्हाङः स्याव्नाः माःर। नीङ्इपाय् ख्रीस्कोः मान्तालम् मीतो च्यवःती ओउः नाःतो नाःमालोलम्कायः रास्तेःताक्तेःनानी। एत हायःसाकायः ङाइ नीङ्कायः लुङ्ती तोसा खाय्ङल जान्तीलेः तोनेःनेःनाङ्स बा। 23 ङाइ नीङ्कायः स्यान्ओ कुरा परमेस्वर्इलेः बयःआताङः। ओउः कुरापाय् इलेःआः। प्रभु येसुकायः सात्लाङ् दाक्सा खेःओ दीन्कोः द्याह्मयःलोहाङःलेः ओउःइ लाङ् रोत्ती 24 “च्युता” त तोआक्तीको ओउः लाङ्कायः फन्ह्ती “लौ नोह्न इ जेःनु दा। इपाय् ङाकोः आङ् लेःआः ङाकोः आङ्पाय् नीङ्कोःलेः खेःजेःनाः बा। ङाकायः गीलसाकायः एतलेः हायःनु दा” त दाय्ह्ती येसुलेः दाय्ह्आ। 25 ओहाङःसैको जेःआक्तीको ओउःइ धाक्सायःकोः तीः रोत्ती “लौ इ तुङ्गापाय् ङाकोः वयःइ दोःताक्ओ परमेस्वर्कोः रौ तोती गम्ओ कुरा लेःआः बा। गल खेःयाकायःमा नीङ्इ इतलेः तुङ्तेःनानी ओउः बेलाहाङः नीङ्इ एत हायःती ङाकायः गीलनाङ्स” त दाय्ह्तीमा दाय्ह्आ। 26 दोह् हायःती दाय्ह्सा गल खेःयाकायःमा इ लाङ्मा जेःतेःनानी इ तुङ्गामा तुङ्मातेःनानी नीङ्इ प्रभु येसुकोः वाङ्धाङ्माःखाहाङः ओउःकोः सीओ कुरा अरुलम्कायः छ्यानःती तोतेःनानी। 27 ओउःत खेःआ सुसुखेइलो ओउः लाङ्कायःमा पेतो जेःनीली ओउः तुङ्गाकायःमा पेतोलेः तुङ्नीली ओउःइलेः प्रभुकोः आङ्मा वयःकायःमा रेव्तो हायःनानी 28 ओउःत झ्यान्ते सबै मान्तालम् लयःकोः ल्हुङ्तुक् योच्युक् योआक्तीको ह प्रभुकोः लाङ्मा जेःपानी ओउःकोः तुङ्गामा तुङ्पानी। 29 सुसुइ म्हर्माःत जेःती तुङ्ती मुचै ओउःइलेः प्रभुकोः आङ्पाय् मीतो च्यवःती झ्यान्ते लयःकायः न्युम्ह्ताक्तो थाङ्ताक्चाःइसी। 30 ओउःत खेःया नीङ्कःगन नाःतोलम् ग्रुती मुतेःनै यात्नीस् सीआकाय्। 31 ङी ङ्हाहाङः लयःकोः ल्हुङ्तुक्कायः योसा खेःतो ओहाङःसै ङीकोः ल्हुङ्तुक् पेनाः त खेःया ङीपाय् न्युम्ह्तो स्याव्सा परतय्हीली। 32 ङीपाय् ङ्हाम्मालो ल्हाव्ह्दैबाङ्कोः मान्तालो लेखा वाय्तोलेः स्याव्सापाय् परमेस्वर् झाक्ल ओउःत झ्यान्ते ङीकायः स्यान्साकायः ओउःइ एतलेः न्युम्ह्ताक्नाःतय्ही। 33 लौ उया पुःचोङ् हौचोङ्य नीङ् प्रभुकोः भोस् जेःलाङ् वाङ्तोक्हाङः पेतो ब्राङ्तीलेः जेःनु दा। 34 यात्चाक् योङ्क्राय्तो मुनाः त खेःया ओउःइपाय् लयःकोः कीम्हाङः कोस्तो जेःआक्पौ ओहाङःसै नीङ् हुम्ती वाङ्तोक्हाङः न्युम्ह्ताक्तो थाङ्सा काम् जाङ्ह्तेःनीली। एतलेः तोनेःनाङ्स दा ङा लोने वाङ्तोक्हाङः अरु कुरामा तोनेःनाङ्स। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.