१ कोरीन्थी 10 - चेपाङ1 लौ पुःचोङ् हौचोङ्य इत नीङ्इ चीःसा खेःतो। ङीकोः आय्कानः तोकानःलम् मोसाकुस् मीस्रा देस्सै ज्याल्ओ बेलाहाङः परमेस्वर्इ ल्होक्ओ मुस्कोः अम्रवःहाङः वाह्ती ओउः ताङ्ह्ओ तीःपाय् सबै त्यात्आकाय्। 2 ओउःत मुस्हाङःमा तीःहाङःमा वाह्ती मोसाकोः बाप्तीस्मालो लेखा सबै त्याक्आथास। 3 ओउःकुस् सबैइ यातैज्योः परमेस्वर्कोः जेःगामा जेःमाआकानी 4 ओउःकोः यातैज्योः तुङ्गामा तुङ्माआकानी। तुङ्ओ बेलाहाङःपाय् परमेस्वर्इ बाङ्सै ग्ल्युङ्ह्ताक्ओ तीःलेः तुङ्नीतो ओउःमयःकुस् वाह्ओ परमेस्वर्कोः बाङ्पाय् ख्रीस्लेः खेःतो। 5 परमेस्वर्कोः जेःगा तुङ्गा सबैइ जेःआक्नीतो आन नाःतो मान्तालम् ल्हुङ्हाङः रेव्ओ कुरा मोह्हाय्ती झ्यान्ते ओउःमयःकः परमेस्वर् ल्हुङ् मल्ह्तो स्याव्ती ओउःमयःकायः याक्गार्सीःमालोहाङः सीताक्ती वाय्आकान्। 6 इ कुरापाय् ङीकायः स्यान्साकायः मुलेःनाः। ओउःमयःलो लेखालेः रेव्ओ चीस्लम् ल्हुङ्हाङः मोह्हाय्सा स्याव्ल त ङीकायः स्यान्नाःतय्ही 7 फेरी ओउःमयःलो लेखालेः द्यव्तालम्कायः स्यवसा स्याव्ल। ओउः मोसाकुस् वाह्ओलम्कायः “ओउःमयःइ न्यास्ती जेःती तुङ्ती द्यव्ताकायः जात्र जाङ्ह्आकानी” त दाय्ह्ओ आखरःहाङः लेखती मुनाः 8 फेरी ल्हास्या काम् जाङ्ह्ती वाह्लाम्। कोय् मोसाकुस् वाह्ओलम्इ इतलेः जात्र जाङ्ह्ती मोमःचोःलम्कुस् केःलनःती ल्हास्या काम् जाङ्ह्ती वाह्ओ त झ्यान्ते यात् दीन्हाङः तेइस् हजार् मान्तालम् सीआकाय्। 9 फेरी ओउः मोसाकुस् वाह्ओलम्लो लेखा प्रभुकोः ल्हुङ्तुक् कुःती योलाम् ओउः मोसाकुस् वाह्ओलम्इ एत हायःआक्तीको कोय् मान्तालम् रुइ नेःती सीआकाय्। 10 फेरी ओउः मान्तालम्लो लेखालेः य्हवःलाम् ओउःत हायःआक्तीको कोय् य्हवःओ मान्तालम्कायः परमेस्वर्कोः लाङ्कासै सात्ताक्सा ल्होक्ओमयःइ सात्आथास। 11 इ कुरालम्पाय् मान्ताकायः गानाक्ती स्यान्सा थेङालेः स्याव्आ। ओहाङःसै ङीइ पह्रती चीःताक्साकायः इ कुरालम् परमेस्वर्कोः आखरःहाङः लेखओ खेःतो दोह् हायःती दाय्ह्सा ङी ल्हाव्ह्दैबाङ्कोः द्युम्खेःओ बेलाहाङः दाह्खयःनाःतय्ही। 12 ओउःत झ्यान्ते सुसु “लौ ङा पेतो ग्रमःत मुनाङः” त ताःतेःचै ओउःपाय् घीःती मुसाआः। नीङ् घीःती मुतेःइली त खेःया वाय्तोतेः स्याव्तेःचनै। 13 नीङ्कायःपाय् “गुच्युक् पेतोलेः ङ्हाम्नानी” त वेलःती योसाकायः लीह्ओ गोरःसा खेःतेःनै नीङ्कोः लीह्ओपाय् अरु मान्ताकोः लीह्ओसै पेमालो खेःल। लीह्सीःओ वाङ्सापाय् वाङ्लेःनाः परमेस्वर्पाय् जुगाङ् ङ्हाम्सीःओ लेःआः। ओउःइ तोती गम्ओ कुरा जाङ्ह्ती ओउःइ लोत्सा खाय्मालो लीह्ओ बयःतेःइली। फेरी लीह्ओ वाङ्तोक्हाङः ओउःइ नीङ्कायः ग्रमःत मुताक्तेःनै ओहाङःसै नीङ्इ गोरःसा खाय्तेःनानी। 14 लौ ङाइ राप्ओ हौचोङ् पुःचोङ्य द्यव्ता मुर्तीलम्कायः स्यवओ काम् फेनु दा। 15 नीङ्इपाय् व्हाय्तोलेः चीःतेःनानी ओउःत झ्यान्ते ङाकोः कुरा चीःतीलेः सायःनु दा। 16 प्रभुकोः भोस्हाङः परमेस्वर्कायः “च्युता” त तोती ओउःकोः तुङ्गा तुङ्नाःतय्ह्नी। ओउःत तुङ्तोक्हाङः ङी “लौ ङीकायःपाय् ख्रीस्कोः वयः बयःओ लेःआः” त दाय्ह्ती थोप्ती ब्राङःतीलेः तुङ्नाःतय्ही। ओहाङःसैको ओउः फन्ह्ती जेःओ लाङ् ङीइ “लौ ङीकायःपाय् ख्रीस्कोः आङ् बयःओ लेःआः” त दाय्ह्तीमा थोप्ती ब्राङःतीलेः जेःनाःतय्ही। 17 यात्केरः लाङ्मा ङी नाःतोलम्कायः सबै थोप्नाःतय्ही ओउःत खेःओ ङी यातैज्योः आङ्लो लेखा मुनाःतय्ही। 18 इस्राएली मान्तालम्कःगन परमेस्वर्कायः ल्हाओ जेःगा जेःओलम्इ ब्राङःतीलेः परमेस्वर्कायः स्यवनानी। 19 इत दाय्ह्ती दोह्त तोनेःनाङ्स दाय्ह्सा मुर्तीलम्मा ओउःमयःकायः ल्हाओ जेःगामा दोह्मा खेःबाय्ल। 20 ओउःपाय् दोह्मा खेःल ओउः यहुदी खेःमालोलम्इ जेःगा ल्हातोक्हाङः परमेस्वर्कायः खेःल द्यव्तालम्कायः ल्हानानी त तोनेःनाङ्स। फेरी लान्लम्कुस् ब्राङ्काय्ती मुसा स्याव्ल त दाय्ह्तीमा तोनेःनाङ्स। 21 प्रभुकोः तुङ्गामा लान्कोः तुङ्गामा नीस्ज्योः तुङ्सा खाय्तेःनीली। फेरी प्रभुकोः जेःगामा लान्कोः जेःगामा ओउः नीसैज्योः जेःसा खाय्तेःनीली। 22 ङीइ ओउःत हायःनाःतय्ह्नी त खेःया परमेस्वर्कोः ल्हुङ् मल्ह्ताक्नाःतय्ही फेरी ङीपाय् ओउःकोः न्युम्ह्ताक्ओसै बेत्सा खाय्तय्ह्नीली। 23 “लौ सबै कुरा ङीकायः स्याव्नाः” ततेः दाय्ह्तेःनै। माः ओउःत दाय्ह्ओ दोङ् कुरा लेःआः बुरु सबै कुरा जाङ्ह्सा पेलेःनाः खेःल अरुकायः लव्ह्सा खेःल। 24 लयःकोः कुरा झुङ्आले ल्हुङ्हाङः त्युम्ह्तेःचानी अरुकायः “ङाइ गत हायःती लव्ह्ती बयःचाङः” त म्हर्ती ओउःत जाङ्ह्सा बोङःनु। 25 बजार्हाङः लेःओ थोक्लम्पाय् दोह्कायःमा व्हत्माःत ल्हुङ् सोकार्तो जेःनु 26 दोह् हायःती दाय्ह्सा “ल्हाव्ह्दैबाङ्मा सबै ओहाङः नाःओ थोक्लम्मा परमेस्वर्कोः लेःआः बा” त परमेस्वर्कोः आखरःहाङः लेखती मुनाः। 27 फेरी ङ्हाम्मालो मान्ताकोः कीम्ताङ् आल्तोक्हाङः नीङ् जेःसा झाक्तेःनै त खेःया ओउःइ बयःओ जेःगा दोह्कायःमा व्हत्माःत सोकार्तो जेःनु दा। 28 ओउःत हायःसा स्याव्तो सुलाङःइ “इ जेःगापाय् द्यव्ताकायः ल्हाओआः” त दाय्ह्ती तोतेःनै त खेःया ओउः मान्ता ब्रःताक्माःसाकायः ओउः जेःगा जेःलाम्। 29 नीङ्खेइ “सबै थोक् जेःसा स्याव्नाः” त चीःसापाय् चीःतेःनानी ओउः मान्ताखेइपाय् पेतो चीःमाःत झ्यान्ते ओउः जेःगा जेःलाम्। एत सायःती “अरुखेइ कुरा पेतो चीःमाःत झ्यान्ते ङाखेपाय् चीःओ मान्तालेः दोह् हायःती जेःसा खाय्ङल” त दाय्ह्ती यात्नीस्चाक्इ व्हत्नै यादो। 30 फेरी “परमेस्वर्इ ङीकायः जेःसा ताक्आतय्ही ओउःत खेःया ङीइ परमेस्वर्कायः ‘च्युता’ त तोती जेःतोक्हाङः अरुइ दोह् हायःती ङीकायः पेमालो तोचाःतय्ही” त दाय्ह्ओमा दाय्ह्नै यादो। ङापाय् इत त्याङ्नाङः 31 “जेःधार्नामा तुङ्धार्नामा दोह् खेःयाकायःमा परमेस्वर् ताङ्ह्ताक्साकायः जाङ्ह्नु दा” त दाय्ह्ती तोनाङः। 32 ओहाङःसै यहुदीलम्कायःमा यहुदी खेःमालोलम्कायःमा ङ्हाम्ओलम्कायःमा सबै सुकायःमा ब्रःताक्लाम्। 33 ङालो लेखालेः लयःकोः कुरा बोङःमाःत सबैकायः गलमा म्रोताक्ती ओउःमयःकायः दल्ताक्सा बोङःनु। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.