रोमियों 9 - चम्बयाली नौआ नियम

इस्राएल रे लोक्कां तांइ अव्वे कै? परमेश्वर ते उसेरे चुणे रे मणू

¹ मैं सच बोलदा किजोकी मैं मसीह यीशु रा मणू है, मैं झूठ नी बोल्लेया करदा है, मेरा विवेक पवित्रात्मा रे जरिये इस गल्ल जो पक्का करदा,

² मेरे जो बड़ा वरी दुख है, अते मेरे जो अपणे लोक्कां तांइ बड़ी काली हुंदी।

³ किजोकी मैं यहूदी लोक्कां जो, जे मेरे अपणी जाति रे मणू हिन, छुटकारा दुआणे तांइ श्रापित कित्ते जाणे, ते मसीह का अलग करी दित्ते जाणे तांइ भी तैयार है।

⁴ से मणू मेरे सांई इस्राएल देस रे मणू हिन, से परमेश्वर रे गोद लित्ते री औलाद्दां बणने तांइ चुणे गे थिये, परमेश्वर ने तिन्हा पर अपणी महिमा ज़ाहिर कित्ती। तिन्हा ने तिन्हा लोक्कां कने वाचा बन्नी। तिन्हा जो परमेश्वर रा कानून, ते तिन्हेरी अराधना करणे रा सौभाग्य मिल्लेया।

⁵ अब्राहम, इसहाक ते याकूब तिन्हेरे पुरखे हिन। ते मसीह यीशु भी इन्सानी तौर पर इक्क इस्राएली मणू थिये। परमेश्वर जो महिमा मिलदी रे जे सारेयां पर राज करदे। आमीन!

⁶ पर इय्यां नी है कि परमेश्वर अपणे वादे जो निभाणे बिच नाकाम होई गे, किजोकी इस्राएल रे ‍खानदान रा हर मणू परमेश्वर रा मणू नी है।

⁷ अते अब्राहम रे ‍खानदान बिच पैदा होणे री वजह सारे तिन्हेरी सच्ची औलाद्दां नी बणी जांदे, किजोकी जिय्यां कि पवित्रशास्त्र बिच परमेश्वर ने अब्राहम जो बोल्लेया, “इसहाक का ही तेरा वंश गिणेया जाणा।” हालांकि अब्राहम रे होर भी बच्चे थिये।

⁸ मतलब की इन्सानी तौर पर अब्राहम री जे औलाद्दां होए री हिन, से सारे परमेश्वर री औलाद्दां नी केहलांदी। पर परमेश्वर रे वादा कित्ते रे औलाद्दां ही अब्राहम री औलाद्दां गिणी जांदी।

⁹ किजोकी परमेश्वर ने ए वादा कित्तेया थिया, मैं अगले साल फिरी हटणा, ते सारा जो इक्क मुंडा होणा।

¹⁰ अते इन्ना ही नी, पर असा रे पुरखे इसहाक ते रिबेका जो जुड़वे बच्चे होये।

^11-12 पर तिन्हेरे पैदा होणे रे पैल्ले या तिन्हेरे बिच किच्‍छ भी खरा या बुरा होणे का पैल्ले ही परमेश्वर ने रिबेका जो दस्सेया, “बड्डे मुंडे ने छोटे मुंडे री सेवा करणी।” परमेश्वर ने ए गल्ल ए ज़ाहिर करणे तांइ बोल्ली कि से अपणे मकसद तांइ लोक्कां जो चुणदे, ते ए तिन्हा दोन्नां रे किच्‍छ करणे री वजह कने नी थिया।

¹³ जिय्यां कि पवित्रशास्त्र बिच लिख्खे रा है, “मैं एसाव का बधी करी याकूब जो चाएया।”

¹⁴ तां फिरी असी कै बोलण? कै परमेश्वर तिन्हा जो चुनणे बिच ना नाइन्साफी करदे जिन्हा जो से चुणना चाह्‍ंदे? बिल्कुल भी नी।

¹⁵ किजोकी परमेश्वर ने मूसा कने बोल्लेया थिया, “मैं जिस पर भी दया करणा चाह्‍ंगा, तिस पर दया करणी, ते जिस कुसकी पर अनुग्रह करणा चाह्‍ंगा, तिस पर अनुग्रह करणा।”

¹⁶ इधेरे तांइ परमेश्वर तिन्हा जो चुणदा, जिन्हा पर से दया करणा चाह्‍ंदे, ते ए सारा किच्‍छ असा री मर्जी या कम्मां पर निर्भर नी करदा, पर सिर्फ परमेश्वर री दया पर निर्भर करदा।

¹⁷ किजोकी पवित्रशास्त्र बिच परमेश्वर ने मिस्र रे फिरौन जो बोल्लेया थिया, “मैं तिज्जो इधेरे तांइ राज्जा बणाया थिया, ताकि मैं तेरे जरिये अपणी ताकत दिखाई सकां, ते मेरे नां रा प्रचार सारी दुनिया बिच हो।”

¹⁸ इधेरे तांइ परमेश्वर जिस पर दया करणा चाह्‍ंदे तिस पर दया करदे, अते जिस जो जिद्दी बनाणा चाह्‍ंदे तिसजो जिद्दी बणाई दिंदे।

परमेश्वर रा गुस्सा ते उसेरी दया

¹⁹ तां फिरी किच्‍छ लोक्कां ने मेरे कने बोलणा, “जे अगर इदेयी गल्ल है, तां परमेश्वर असा जो गलत किय्यां ठैहराई सकदे?” किजोकी कोई भी परमेश्वर जो से करणे का नी रोक्की सकदे जे से करणा चाह्‍ंदे।

²⁰ ना, इय्यां मत बोल। तू इक्क मामुली इन्सान होई करी, किय्यां परमेश्वर जो जवाब देई सकदा? कै मिट्टी जो अपणे बणाणे वाले कुम्हार का ए पूच्छणे रा हक है, कि तू मेरे जो इदेया किजो बणाया?

²¹ कै इक्क कुम्हार जो ए हक नी है कि इक्क ही साँचे का बदिया कम्मां तांइ भांडे बणाए, ते तिस्सी साँचे बिच का आम इस्तेमाल रे भी भांडे बणाए?

²² परमेश्वर अपणी ताकत ते गुस्सा तिन्हा लोक्कां पर ज़ाहिर करणा चाह्‍ंदे थिये जे मुकाई दित्ते जाणे रे जोग्गे थिये, पर इसेरे बजाए परमेश्वर तिन्हा लोक्कां कने सबर कने रे।

²³ परमेश्वर ने तिन्हा लोक्कां पर अपणी महिमा ज़ाहिर करी कित्ता, जिन्हा जो तिन्हा ने अपणी महिमा दैणे तांइ चुणेया थिया।

²⁴ मतलब असी लोक, जिन्हा जो परमेश्वर ने ना सिर्फ यहूदी लोक्कां बिच का, पर गैर यहूदियां बिच का भी चुणेया।

²⁵ गैर यहूदियां रे बारे बिच सोचदे होए परमेश्वर ने भविष्यद्वक्ता होशे री कताब बिच बोल्ले रा है, “मते जणे जे मेरे मणू नी थिये, तिन्हा जो मैं अपणे मणू बोलणा। मते मणू जिन्हा जो मैं पैल्ले प्यार नी कित्तेया, तिन्हा जो मैं अवे प्यार करणा।

²⁶ ते जिस जगाह् पर परमेश्वर ने बोल्लेया, तुसी मेरे मणू नी हिन, तित्ते ही जिन्दे परमेश्वर ने तिन्हा जो अपणी औलाद्दां बोल्लेया।”

²⁷ अते यशायाह भविष्यद्वक्ता ने पवित्रशास्त्र बिच इस्राएल देस रे लोक्कां रे बारे बिच रोई करी बोल्लेया, “भले ही इस्राएल रे औलाद्दां समुन्द्र री रेत रे कणां सांई अणगिणत हिन, तां भी तिन्हा बिच का थोड़े जणेया ने ही बचणा।”

²⁸ किजोकी प्रभु ने तौले ही दुनिया रे सारे लोक्कां का सख्ती कने हिसाब लैणा।

²⁹ अते जिय्यां कि यशायाह भविष्यद्वक्ता ने पैल्ले भी बोल्लेया थिया, “जे अगर सेना रे प्रभु असा रे औलाद्दां जो नी बक्शदे, तां असा री हालत सदोम ते अमोरा प्रदेश रे लोक्कां सांई होई जाणी थी, जिन्हा जो परमेश्वर ने मुकाई दित्तेया थिया।”

इस्त्राएल रा अविश्वास

³⁰ तां फिरी असी कै बोलण? गैर यहूदी मणू परमेश्वर री नजरां बिच धार्मिक बणने री कोसीस नी करेया करदे थिये, पर परमेश्वर ने तिन्हा लोक्कां जो धार्मिक ठैहराया, किजोकी तिन्हा लोक्कां ने मसीह बिच विश्वास कित्तेया।

³¹ इस्राएल रे मणू चाह्‍ंदे थिये कि परमेश्वर तिन्हा लोक्कां जो मूसा रे कानूनां जो मनणे कने धार्मिक ठैहराई दैण, पर तिन्हा जो धार्मिक नी ठैहराया गेया।

³² इय्यां किजो नी होया? किजोकी से मणू परमेश्वर पर विश्वास करणे कने नी, पर मूसा रे कानून जो मन्नी करी धार्मिक ठैहरणा चाह्‍ंदे थिये। से मणू अपणे रस्ते बिच बड्डे बट्टे कने ठोकर खाई करी छुड़की पये।

³³ जिय्यां कि पवित्रशास्त्र बिच लिख्खे रा है, “दिख्खो, मैं सिय्योन बिच इक्क बट्टे जो रखणा, जिस कने ठोकर लगदी, अते इक्क इदेइ टोल, जिस कने ठोकर खाई करी लोक्कां ने छुड़कणा, पर से जे कोई मणू तिस पर विश्वास करे, तां तिसजो कदी शर्मसार नी होणा पैणा।”