रोमियों 8 - चम्बयाली नौआ नियम

पवित्रात्मा रे जरिये जिन्दगी

¹ इधेरे तांइ अवे जे प्रभु यीशु मसीह बिच विश्वास करदे, तिन्हा पर सजा रा हुकम नी है।

² किजोकी पवित्रात्मा ने तिन्हा जो मसीह यीशु रे जरिये पाप ते मौत रे काबू का अजाद करी दित्ते रा है ते नौई जिन्दगी दित्ते री है।

³ असा रे पापी स्वभाव री वजह कने मूसा रा कानून कमजोर होई करी जे नी करी सकेया, से परमेश्वर ने कित्ता। तिन्हा ने अपणे इकलौत्ते पुत्तर जो असा पाप्पी लोक्कां का इक्क इन्सान रे रुप बिच भेज्जेया। ते परमेश्वर ने अपणे पुत्तर जो असा रे पाप्पां तांइ कुर्बानी रे रुप बिच देई करी, असा रे पाप्पां री सजा तिन्हेरे सरीर पर पाई दित्ती ते असा पर पाप री ताकत जो मुकाई दित्ता।

⁴ तिन्हा ने ए इधेरे तांइ कित्ता ताकि असी अपणी मर्जी करणे रे बजाए, पवित्रात्मा री गल्ल मन्नी करी मूसा रे कानून जो पूरा करण।

^5-6 जे मणू पाप रे स्वभाव रे काबू बिच हिन, से पाप री गल्लां सोचदे, ते इसेरा अंजाम मौत है, पर जे मणू पवित्रात्मा रे काबू बिच हिन, से मणू आत्मिक गल्लां रे बारे बिच सोचदे, ते इसेरा अंजाम सच्ची जिन्दगी ते सांती है।

⁷ किजोकी पाप रे स्वभाव रे काबू बिच रैह्णा ता परमेश्वर कने दुश्मणी रखणा है, किजोकी पाप रा स्वभाव ना परमेश्वर रे कानून रे हेठ है, ते ना ही होई सकदा।

⁸ अते जे पाप रे स्वभाव रे काबू बिच हिन, से परमेश्वर जो खुस नी करी सकदे।

⁹ पर जां कि पवित्रात्मा तुसा रे बिच बसदा, तां तुसा पाप रे स्वभाव रे काबू बिच नी, बल्कि पवित्रात्मा रे काबू बिच रैहन्दे। ते जे अगर कुसकी मणू बिच मसीह रा आत्‍मा नी है, तां से परमेश्वर रा मणू नी है।

¹⁰ जे अगर मसीह तुसा बिच वास करदे, तां भले ही पाप री वजह कने सरीर रे मरी जाणे पर भी, पवित्रात्मा तुसा जो जिन्दगी दिंदी, किजोकी तुसा परमेश्वर रे सामणे धार्मिक ठैहराए गेरे हिन।

¹¹ पवित्रात्मा तुसा बिच रैहन्दा जिन्हा ने मसीह यीशु जो मुर्देयां बिच का जिन्दा कित्ता। ते जिय्यां परमेश्वर ने मसीह यीशु जो मुर्देयां बिच का जिन्दा कित्ता, तिय्यां ही तुसा जो भी तिस्सी पवित्रात्मा रे जरिये मुर्देया बिच का जिन्दा करणा जे तुसा बिच रैहन्दा।

¹² ओ मेरे संगी विश्वासियों, असा का निभाणे तांइ किच्‍छ जिम्मेदारियां हिन, पर असा रा पाप रा स्वभाव नी चाह्‍ंदा कि असी तिन्हा जो निभाण।

¹³ किजोकी जे अगर तुसा पाप रे स्वभाव रे काबू बिच जिन्दगी जिंगे, तां परमेश्वर का बखरे कित्ते जाणे, ते जे अगर तुसा पवित्रात्मा री ताकत कने से कम्म करणा छड्डी देयो जे पाप रे स्वभाव कने हुंदा, तां तुसा ने जीणा।

¹⁴ इधेरे तांइ जे मणू पवित्रात्मा रे हिसाब कने चलदे हिन, से ही परमेश्वर रे औलाद्दां हिन।

¹⁵ किजोकी तुसा जो गुलामी री आत्‍मा नी मिल्ले री है कि तुसा जो डर बिच जिन्दगी बिताओ, पर जां परमेश्वर ने तुसा जो अपणी औलाद्दां बणाई करी गोद लेई लित्ता, तां तुसा जो पवित्रात्मा मिल्लेया। अवे असी परमेश्वर जो पिता बोलदे।

¹⁶ पवित्रात्मा अप्पु ही असा री आत्‍मा कने ए गवाई दिंदी कि असी परमेश्वर री औलाद्दां हिन।

¹⁷ ते जे अगर असी परमेश्वर री औलाद्दां हिन तां असी तिन्हेरे वारिस भी हिन। बल्कि असी मसीह यीशु कने परमेश्वर री महिमा रे वारिस हिन। जे अगर असी मसीह यीशु सांई जुल्म सैह्‍ंदे, जे असी अब्बे सहन करेया भी करदे हिन, तां असा ने भी तिन्हेरी महिमा बिच हिस्सा पाणा।

भविष्य बिच आणे वाली महिमा

¹⁸ मेरे जो ए गल्ल पक्के तरिक्के कने पता है कि इस बेल्ले असी जे दुख-तकलिफां सहन करेया करदे हिन, से तिस महिमा रे सामणे किच्‍छ भी नी है जे परमेश्वर असा जो दैणे वाले हिन।

¹⁹ किजोकी परमेश्वर री सारी रचना बड़ी उम्मीद तिस दिन जो भालेया करदे हिन जां परमेश्वर ने ज़ाहिर करणा कि कुण तिन्हेरे असली औलाद्दां हिन।

²⁰ पर परमेश्वर री बणाए री हर इक्क रचना ने अपणे बणाए जाणे रा मकसद गवाई दित्ता। ए तिसेरी अपणी मर्जी कने नी होया पर परमेश्वर ने इय्यां होणा दित्ता। पर फिरी भी आस है।

²¹ परमेश्वर री बणाए री हर इक्क रचना बड़ी उम्मीद कने तिस दिन जो भालेया करदी है, जां तिसने मौत ते बर्बादी का छुटकारा पाई करी परमेश्वर री औलाद्दां कने महिमामय अजादी बिच शामिल होई जाणा।

²² असी जाणदे कि परमेश्वर री बणाए री हर इक्क रचना, आदम रे पाप करणे रे बेल्ले का लेई करी आज तिकर इक्क दुपराणी जनानी सांई लोकिणे री पीड़ां कने तड़पेया करदी है।

²³ सिर्फ परमेश्वर री रचना ही नी तड़पेया करदे हिन, पर असी भी, जिन्हा जो परमेश्वर रा पैल्ला दान, पवित्रात्मा, जे परमेश्वर रे वादे री निशानी है, मिलणे रे बावजूद भी तिस दिन री भाल बिच अंदर ही अंदर तड़पेया करदे हिन जां असा जो हर बुराई का छुटकारा मिली जाणा।

²⁴ असा जो महिमा मिलणे री उम्मीद तिस बेल्ले दित्ती गयी थी, जां परमेश्वर ने असा जो बचाया थिया, पर जे अगर असा का से पैल्ले का ही है जिसेरी असी आस रखदे, तां असा जो तिस तांइ अग्गे जो उम्मीद लाए रखणे री जरुरत नी है।

²⁵ पर असी तिस ही चीज री आस रखदे जिन्हा जो हल्ले असी दिख्खे रा ना हो। ते असा जो सबर ते हौंसले कने तिसजो भालणा भी चाएदा।

²⁶ इस्सी तरिक्के कने पवित्रात्मा भी असा री आत्मिक कमजोरी बिच असा री मदद करदा, किजोकी असी अप्पु नी जाणदे कि परमेश्वर कै चाह्‍ंदे कि असा जो कुस गल्ल तांइ प्रार्थना करणा चाएदी, पर पवित्रात्मा अप्पु ही असा तांइ रुआंसे मन कने इदेइ बिनती करदे जिस जो लफ्ज़ां बिच बयान नी कित्तेया जाई सकदा।

²⁷ ते परमेश्वर जे मन री गल्लां जो जाणदे, से समजी जांदे कि पवित्रात्मा कै बोल्लेया करदे हिन, किजोकी से पवित्र मणूआं तांइ परमेश्वर री इच्छा रे हिसाब कने बिनती करदे।

²⁸ असी जाणदे कि परमेश्वर हर गल्ल बिच तिन्हा लोक्कां कने भलाई करदे जे तिन्हा कने प्यार करदे। परमेश्वर ने तिन्हा लोक्कां जो अपणे मकसद तांइ चुणे रे हिन।

²⁹ किजोकी परमेश्वर अपणे लोक्कां जो पैल्ले का जाणदे, ते परमेश्वर ने तिन्हा लोक्कां जो अपणे पुत्र सांई बणने तांइ चुणे रा है, ताकि मसीह यीशु परमेश्वर रे बाकि मती औलाद्दां बिच तिन्हेरे जेठे पुत्तर ठैहरे।

³⁰ जिन्हा मणूआं जो परमेश्वर पैल्ले का जाणदे, परमेश्वर ने तिन्हा मणूआं जो चुणी लेया, ते जिन्हा मणूआं जो परमेश्वर ने चुणी लेया, तिन्हा जो परमेश्वर ने धार्मिक भी ठैहराए रा है, जिन्हा मणूआं जो परमेश्वर ने धार्मिक ठैहराया, तिन्हा जो परमेश्वर ने अपणी महिमा भी दित्ती।

परमेश्वर रा प्रेम

³¹ अते इन्हा गल्लां जो ध्यान बिच रखदे होए असी इस अंजाम पर पुजदे, कि जां परमेश्वर असा रे पास्से है, तां कोई भी असा जो हराई नी सकदा।

³² परमेश्वर ने अपणे इकलौत्ते पुत्र जो भी नी छड्डेया, पर तिन्हा जो असा रे खातिर अपणे दुश्मणा रे हत्थां बिच भी सौंप्पि दित्तेया। परमेश्वर ने असा जो से सब किच्‍छ जरुर दैणा जिसेरा तिन्हा असा कने वादा कित्ते रा है।

³³ कोई भी परमेश्वर रे सामणे असा पर इल्जाम नी लाई सकदा, किजोकी परमेश्वर ने असा जो धार्मिक ठैहराए रा है।

³⁴ इदेया कोई नी है जे असा पर सजा रा हुकम देई सके, किजोकी से मसीह यीशु ही हिन जे असा तांइ मरे ते मुर्देयां बिच का जिन्दे होई गे, ते परमेश्वर रे सज्जे पास्से बैठ्ठे रे हिन, ते असा तांइ बिनती करेया करदे हिन।

³⁵ कोई असा जो मसीह यीशु रे प्यार का अलग नी करी सकदा। ना दुख-तकलिफां, ना मुसीबतां, ना लड़ाई-झगड़े, ना अकाल, ना नगांपन, ना खतरा ते ना ही मौत।

³⁶ जिय्यां कि पवित्रशास्त्र बिच लिख्खे रा है, जित्ते दाऊद ने परमेश्वर जो बोल्ले रा है “असी तेरे तांइ हमेसा मौत रे खतरे बिच रैहन्दे, असी मारे जाणे वाली भेड़ां सांई गिणे गेरे हिन।”

³⁷ पर असी मसीह यीशु रे जरिये हर इक्क गल्ल बिच इक्क विजेता का बधी करी हिन, किजोकी मसीह यीशु असा कने प्यार करदे।

³⁸ किजोकी मैं पक्के तौर पर जाणदा, कि ना मौत, ना जिन्दगी, ना स्वर्गदूत, ना स्वर्ग बिच रैह्णे वाले शासक, ना आज्‍ज, ना आणे वाला कल, ना ताकत, ना ही ऊंचाई असा जो मसीह रे प्यार का बखरा नी करी सकदे।

³⁹ ना कोई असा रे उप्पर, ना कोई असा रे थल्ले, ना परमेश्वर री बणाए री कोई होर रचना, असा जो परमेश्वर रे उस प्यार का बखरा करी सकदा जे तिन्हा ने असा पर प्रभु यीशु मसीह रे जरिये ज़ाहिर कित्ता।