रोमियों 14 - चम्बयाली नौआ नियम

अपणे भाई पर इल्जाम मत लगाओ

¹ जे मणू विश्वास बिच कमजोर हिन, तिन्हा जो अपणी संगती अन्दर लेई लेयो, पर तिन्हेरी तुसा का अलग राय होणे तांइ तिन्हा री बहस मत करो।

² इक्क जो विश्वास है कि सब किच्‍छ खाणा ठीक है, पर जे विश्वास बिच कमजोर है, से साग पात ही खांदा।

³ मांस-मच्छी खाणे वाला मणू, साग-पात खाणे वाले मणू जो तुच्छ ना समजे, ते साग-पात खाणे वाला मणू, मांस-मच्छी खाणे वाले पर इल्जाम ना लाए, किजोकी परमेश्वर ने तिन्हा दोन्नां जो अपणाए रा है।

⁴ तुसा कुसकी होर मणू रे नौक्कर पर इल्जाम लाणे वाले हुंदे कुण? तिसेरी कामयाबी या नाकामयाबी तिसेरे मालक रे ही हत्थां बिच है। ते तिसने कामयाब ही होणा किजोकी परमेश्वर तिन्हा जो कामयाब करी सकदे।

⁵ कोई मणू ता इक्क दिन जो दूज्जे दिन का बधी करी मनदा, ते कोई मणू सबणी दिनां जो इक्क बराबर मनदा। इसी तरिक्के कने हर इक्क मणू जो अपणे मन अंदर इस गल्ल जो पक्का करी लैणा चाएदा कि जे से सोच्चेया करदा है, से ही किजो सही है।

⁶ जे अगर कोई मणू कुसकी दिन जो मनदा, ता से प्रभु जो आदरमान दैणे तांइ मनदा। जे अगर कोई मणू मांस-मच्छी खांदा, ता से प्रभु जो आदरमान दैणे तांइ खांदा, किजोकी से परमेश्वर रा शुकर करदा, ते अगर कोई मणू साग पात खांदा, ता से भी प्रभु जो आदरमान दैणे तांइ खांदा, ते परमेश्वर रा शुकर करदा।

^7-8 असी सारे परमेश्वर रे हिन। इधेरे तांइ असा जो अपणे जीणे-मरणे बिच अप्पु जो नी, पर परमेश्वर जो खुस करणा चाएदा।

⁹ किजोकी मसीह यीशु इधेरे तांइ ही मरे, अते मुर्देयां बिच का जिन्दे भी होई गे, ताकि से मरे रे ते जिन्दे, दोन्नां रे प्रभु ठैहरे।

¹⁰ तां तू अपणे संगी विश्वासी पर इल्जाम किजो लांदा? या तू फिरी किजो अपणे संगी विश्वासी जो तुच्छ समजदा? असी सारे जणेया ने परमेश्वर री हिसाब-किताब री गद्दी रे सामणे खड़िणा।

¹¹ किजोकी पवित्रशास्त्र बिच, “प्रभु बोलदे कि मैं अपणी जिन्दगी री कसम खाई करी बोलदा, कि हर इक्क मणू ने मेरे सामणे अपणे गोड्डे टेकणे, ते हर इक्क मणू ने अपणी जुबान कने मन्नी लैणा कि मैं परमेश्वर है।”

¹² इधेरे तांइ, असा बिच का हर इक्क मणू जो अपणे अपणे कम्मां रा हिसाब परमेश्वर जो दैणा पैणा।

प्रेम रा नियम

¹³ इधेरे तांइ, अग्गे का असी इक्क-दूए पर इल्जाम ना लाण, पर तुसा ए पक्का सोच्ची लेयो कि कोई अपणे संगी विश्वासी तांइ पाप करणे री वजह ना बणे।

¹⁴ मेरे जो पता है, ते प्रभु यीशु रे जरिये मेरे जो ए पक्का होई गे रा है, कि हर इक्क खाणे रे चीज सुच्ची है। पर जे तिसजो भिठ्ठा समजदा, तिस तांइ से भिठ्ठा है।

¹⁵ जे अगर तू अपणे संगी विश्वासी जो अपणी रोट्टी री वजह कने दुखी करदा, तां तू मसीह रे प्यार री रीति पर नी चलदा। इधेरे तांइ से रोट्टी मत खाओ, किजोकी मसीह ने तिस मणू तांइ अपणी जान दित्ती थी।

¹⁶ इधेरे तांइ, भले ही जे तुसा करेया करदे हिन तिसजो सही समजदे होण, पर जे अगर कोई तिसजो गलत समजदा हो, ता से कम्म मत करो।

¹⁷ किजोकी परमेश्वर रे राज बिच खाणा-पीणा नी है, पर धार्मिकता, मेल जोल ते से सांती है, जे पवित्रात्मा कने हुन्दा।

¹⁸ जे कोई इस तरिक्के कने मसीह यीशु री सेवा करदा, से परमेश्वर जो खुस करदा, ते मणू भी तिसेरा आदरमान करदे।

¹⁹ इधेरे तांइ असा जो तिन्हा गल्लां जो करणे बिच लग्गी रैह्णा चाएदा, जिन्हा कने मणू मिली जुली करी रे, ते सारेयां रा विश्वास मजबूत हो।

²⁰ रोट्टी री वजह कने परमेश्वर रा कम्म मत बिगाड़ो, सब खाणे रे चीजां ता सुच्ची हिन, पर जे अगर तिस मणू रे विश्वास तांइ रुकावट री वजह बणदा, तां से रोट्टी खाणा सही नी है।

²¹ भला ता ए है कि तुसा ना मांस-मच्छी खाओ, ना ही अंगूर रा रस्स पीयो, ते ना ही इदेया किच्‍छ करो, जिस कने तुसा रे संगी विश्वासी रे विश्वास बिच रुकावट बणे।

²² तुसा ए विश्वास करदे होणे कि जे तुसा करदे से सही है, पर तिसजो अपणे ते परमेश्वर रे बिच रख्खो। धन्न है से जे अप्पु जो तिस गल्ल बिच मुजरिम नी ठैहरणा दिंदे जिस जो से सही समजदे।

²³ पर जे अगर तुसा रे मन बिच तिस रोट्टी रे बारे बिच कोई शक हुंदा, कि से तुसा जो खाणा चाएदा या नी, तां तुसा तिसजो खाई करी पाप करेया करदे हिन। जे किच्‍छ भी असी करदे, ते जे अगर से परमेश्वर बिच विश्वास कने नी हुंदा, तां से असा तांइ पाप है।