रोमियों 11 - चम्बयाली नौआ नियम

इस्राएल पर परमेश्वर री दया

¹ इधेरे तांइ मैं पूच्छदा, कै परमेश्वर ने अपणी प्रजा जो छड्डी दित्तेया? बिल्कुल भी नी! मैं भी तां इस्राएली मणू है, ते अब्राहम रे ‍खानदान ते बिन्यामीन रे गोत्तर बिच का है।

² परमेश्वर ने अपणे तिन्हा लोक्कां जो नी छड्डेया, जिस जो तिन्हा ने पैल्ले का ही चुणी लित्ते रा है। कै तुसा जो पता नी है, कि पवित्रशास्त्र एलिय्याह भविष्यद्वक्ता रे बारे बिच कै दसदा? से परमेश्वर कने इस्राएल रे लोक्कां री शिकायत करी के ए बोलदा,

³ “ओ प्रभु, तिन्हा ने तुसा रे भविष्यद्वक्तां जो मारी दित्तेया, ते तुसा री बेदियां जो ढाई दित्ते रा है, ते तुसा बिच विश्वास करणे वाला मैं ही इकलौता मणू बचे रा है, ते से मेरे जो भी जान का मारणे तांइ तोप्पेया करदे हिन।”

⁴ पर तां परमेश्वर ने एलिय्याह जो ए जवाब दित्तेया, “मैं अप्पु तांइ सत्त हजार मणूआं जो बचाई रख्खे रा है, जिन्हा ने बाल देवता री मूर्ति री अराधना नी कित्ती।”

⁵ ठीक इसी तरिक्के कने परमेश्वर ने अपणे अनुग्रह कने इस्राएल रे किच्‍छ मणूआं तिन्हेरे अपणे मणू बणने तांइ चुणे रा है।

⁶ जे अगर परमेश्वर ने तिन्हा जो अपणे अनुग्रह कने चुणे रा है, तां फिरी जे अगर ए ठीक कम्मां जो करणे कने होया हुंदा, तां अनुग्रह ने अनुग्रह नी रैह्णा थिया।

⁷ इधेरे तांइ इसेरा नतीज्जा ए होया, हालांकि इस्राएल रे मणू परमेश्वर रे सामणे धार्मिक ठैहरणा चाह्‍ंदे थिये, पर से कामयाब नी होए। पर परमेश्वर ने अपणे चुणे रे लोक्कां जो अपणी नजर बिच धार्मिक ठैहराया। दूए मणू जिद्दी बणी गे ते तिन्हा ने परमेश्वर री गल्ल मनणी नी चाई।

⁸ जिय्यां कि यशायाह भविष्यद्वक्तां ने पवित्रशास्त्र बिच लिख्खे रा है, “परमेश्वर ने अज्ज तांइ तिन्हेरी समझ जो मंद करी रख्खे रा है, तुसा सूणदे तां रैह्णा, पर तुसा री समझ बिच नी आणा, अते दिख्खदे तां रैह्णा, पर तुसा जो किच्‍छ भी सूझणा नी।”

⁹ ते पवित्रशास्त्र बिच दाऊद राज्जा बोलदा, “जिय्यां इक्क चिड़ी जाल बिच फसी जांदी या जिय्यां इक्क जानवर कुसकी गड्डे बिच छुड़की पैंदा, तिय्यां ही से मणू भी जां धाम बिच हो तां जाल बिच फसी जाण ताकि तिन्हा जो ठीक तरिक्के कने सजा मिल्लो।

¹⁰ तिन्हेरी आख्खियां पर न्याहरा छाई जाओ ताकि से दिख्खी ना सकण, ते तू हमेसा तिन्हरी पीठ्ठ जो तिन्हेरी मुसीबतां रे भार कने हमेसा झुकाई करी रखणा।”

¹¹ इधेरे तांइ मैं पूच्छदा, कै यहूदी लोक्कां ने इधेरे तांइ ठोकर खाई कि से दुबारा उठी ना सके? बिल्कुल भी नी! पर तिन्हेरे परमेश्वर री गल्लां जो ना मनणे री वजह कने गैर यहूदियां जो छुटकारा मिल्लेया, कि यहूदियां जो इस गल्ल री वजह कने हिर्स हो।

¹² इधेरे तांइ अगर यहूदी लोक्कां रा परमेश्वर री गल्ल जो ना मनणा, गैर यहूदियां तांइ आशीष मिलणे री वजह बणदा, ते जां यहूदियां ने परमेश्वर का हटी आणा, तां गैर यहूदियां जो होर भी आशीषां मिलणी।

गैर-यहूदियां रा उद्धार : कलम लगाणे रा उदारण

¹³ मैं तुसा गैर यहूदी लोक्कां जो ए गल्लां बोलदा किजोकी मैं गैर यहूदियां तांइ प्रेरित है, ते मैं अपणी सेवा बिच घमंड करदा,

¹⁴ ताकि कुसकी तरिक्के कने मैं अपणे यहूदी लोक्कां बिच हिर्स पैदा करवाई करी, तिन्हा बिच का मते जणेया रा छुटकारा करवां।

¹⁵ किजोकी इस्राएल रे लोक्कां रा छड्डेया जाणा, दुनिया रे लोक्कां तांइ परमेश्वर कने मेल जोल होणे री वजह बणेया। जां तिन्हा ने यीशु जो मसीह मन्नी करी अपणाई लैणा, तां से गल्ल मरे रे मणू जो फिरी जिन्दे करणे रे बराबर होणा।

¹⁶ जां भेंट रा पैल्ला पेड़ा परमेश्वर जो चढ़ाणे री वजह कने पवित्र ठैहरेया, तां पूरा गुन्नेरा आटा भी पवित्र है। ते जे अगर जड़ पवित्र ठैहरी, तां डाल भी पवित्र हिन।

¹⁷ इस्राएल देस रे मणू जैतून रे बूट्टे री डालियां सांई हिन। ते तिन्हेरी जड़ तिन्हेरे पुरखा अब्राहम, इसहाक ते याकूब हिन। ते जे अगर किच्‍छ डालियां तिस बिच का कट्टी भी दित्ती गयी हो, ते अगर तू इक्क जंगली बूट्टे री डाली होणे रे बावजूद भी तिन्हा बिच साट्टेया गेया हो, तां जिय्यां कोई साट्टे रे डाली तिस बूट्टे री चिकनेपन री हिस्सेदार बणदी, तिय्यां ही तू भी यहूदियां जो मिलणे वाली तिन्हा आशीषां रा हिस्सेदार बणेया, जिसेरा वादा परमेश्वर ने अब्राहम कने कित्तेया थिया।

¹⁸ ते ए गल्ल सोच्ची करी घमंड मत करदा कि तू तिन्हा डालियां का जादा बदिया है जिन्हा जो कट्टी दित्ते गेया थिया। ते जे अगर तू घमंड करे भी ता ए याद रख्खे, कि जड़ ने तिज्जो सम्भाले रा है, ना कि तू जड़ा जो।

¹⁹ अपणे मन बिच ए मत सोचदा, कि से डालियां इधेरे तांइ कट्टी गयी कि मैं साट्टेया जां।

²⁰ ए गल्ल सच है कि से तां विश्वास नी होणे री वजह कने कट्टी गयी, पर तू इधेरे तांइ घमंडी मत हो कि विश्वास बिच बणी रैहन्दा, पर डर रख्खेया कर।

²¹ किजोकी जां परमेश्वर ने अपणी असली डालियां पर दया नी कित्ती, तां जे अगर तुसा घमंड करगे तां परमेश्वर ने तुसा पर भी दया नी करणी।

²² इधेरे तांइ परमेश्वर री दया ते सख्ती पर ध्यान देयो। जे डालियां कट्टी गयी तिन्हा पर ता सख्ती होई, पर तेरे पर दया होई, जिस जो तिन्हा ने साट्टेया। तिन्हेरी दया बिच बणी रेयो, नी तां तू भी कट्टी दित्तेया जाणा।

²³ जे अगर से यहूदी मणू भी तौबा करी के दुबारा विश्वास करे, तां दुबारा साट्टी दित्ते जाणे, किजोकी परमेश्वर तिन्हा जो फिरी साट्टी सकदे।

²⁴ किजोकी जे तुसा जंगली बूट्टे री डालियां होणे रे बावजूद भी इस बूट्टे बिच साट्टे गे, तां से डालियां इस बूट्टे बिच वापिस किजो नी साट्टी जाणी जे इस बूट्टे री अपणी असली डालियां हिन।

सारे इस्त्राएल रा उद्धार

²⁵ ओ संगी विश्वासियों, मैं चाह्‍ंदा कि तुसा इस भेद री गल्ल जो समजी जाओ ताकि तुसा जो अप्पु पर घमंड ना हो। इस्राएल रे किच्‍छ लोक्कां ने तां तांइ इदेया ही सख्त रैह्णा जां तांइ गैर यहूदी मणू पूरी तरिक्के कने मसीह बिच विश्वास नी करी लिंदे।

²⁶ ते इसका बाद इस्राएल रे सारे लोक्कां ने छुटकारा पाणा, जिय्यां कि पवित्रशास्त्र बिच लिख्खे रा है, “छुड़ाणे वाले ने सिय्योन का आणा, ते तिनिए दुष्टता जो याकूब रे ‍खानदान का दुर करणा।

²⁷ जां मैं तिन्हेरे पाप्पां जो माफ करी दैणा, तां मैं तिन्हा कने मेरी वाचा बनणी।”

²⁸ यहूदी मणू परमेश्वर रे दुश्मण बणी गे, किजोकी से मणू सुब बसेख पर विश्वास नी करणा चाह्‍ंदे, ते से तुसा तांइ फायदे री गल्ल बणी गे री है। पर परमेश्वर तिन्हा कने प्यार करदे किजोकी तिन्हा ने तिन्हा लोक्कां जो अप्पु तांइ चुणे रा है। परमेश्वर ने तिन्हेरे पूरखां कने इसी गल्ल रा वादा कित्तेया थिया।

²⁹ किजोकी परमेश्वर अपणे दित्ते रे वरदान ते बुलाहट का कदी नी बदलदे।

³⁰ किजोकी पैल्ले तुसा परमेश्वर रा हुकम नी मन्नेया, पर अवे इस्राएल रे लोक्का रा परमेश्वर रे हुकम जो नी मनणे री वजह कने तुसा गैर यहूदियां पर दया होए री है।

³¹ तिय्यां ही तिन्हा ने भी अवे हुकम नी मन्नेया, कि तुसा पर जे दया होया करदी है, इस कने तिन्हा पर भी दया होई जाओ।

³² किजोकी सारेयां ने परमेश्वर रे हुकम री ना-फरमानी कित्ते री है, ताकि परमेश्वर सब जणेया पर दया करे।

³³ वाह! परमेश्वर रा धन्न ते बुद्धी अते ज्ञान किन्ने जादा गम्भीर हिन! कोई भी तिन्हेरे फैसलेयां जो नी समजी सकदा ते कोई भी तिन्हेरे रस्तेयां जो नी समजी सकदा!

³⁴ किजोकी पवित्रशास्त्र बिच लिख्खे रा है, “प्रभु रे मन जो कोई नी जाणी सकदा? ते कोई भी इन्ना समजदार नी है कि तिन्हा जो सलाह देई सके।

³⁵ ते कुसकी ने भी पैल्ले तिन्हा जो किच्‍छ नी दित्तेया, जिसेरे बदले तिसजो किच्‍छ दैणा पेयो।

³⁶ किजोकी परमेश्वर रे ही पास्से का, ते तिन्हेरे ही जरिए, ते तिन्हेरे तांइ ही सब किच्‍छ है। तिन्हेरी महिमा हमेसा-हमेसा तांइ हुंदी रेयो: आमीन।”