रोमियों 10 - चम्बयाली नौआ नियम

¹ ओ मेरे संगी विश्वासियों, मैं ए चाह्‍ंदा, ते परमेश्वर का मेरी ए ही प्रार्थना है कि से इस्राएल रे लोक्कां जो छुटकारा दे।

² किजोकी मैं गवाई दिंदा कि तिन्हा लोक्कां बिच परमेश्वर तांइ जोस है, पर से मणू ए नी समजदे कि परमेश्वर री सेवा कुस तरिक्के कने करणी चाएदी।

³ किजोकी से परमेश्वर रे धार्मिक ठैहराणे रे तरिक्के जो नी समजदे। से परमेश्वर रे तरिक्के जो छड्डी करी, अपणे तरिक्के कने धार्मिक ठैहरणा चाह्‍ंदे, इधेरे तांइ से परमेश्वर री धार्मिक बणाणे रे तरिक्के जो मनणा नी चाह्‍ंदे थिये।

⁴ मसीह यीशु ने मूसा रे कानूनां जो पूरा कित्तेया जिस मकसद तांइ से दित्ते गेया थिया, ताकि हर इक्क मणू जे मसीह यीशु बिच विश्वास करे, से परमेश्वर री नजर बिच धार्मिक ठैहरे।

उद्धार सब तांइ है

⁵ मूसा रा कानून, परमेश्वर री नजर बिच धार्मिक ठैहरणे रे बारे बिच पवित्रशास्त्र बिच ए लिखदा, “जे मणू इन्हा गल्लां जो मनदा, तिनिये तिन्हा री वजह कने जिन्दे रैह्णा।”

⁶ पर विश्वास कने मिलणे वाली धार्मिकता रे बारे बिच पवित्रशास्त्र बिच ए लिख्खे रा है, “अपणे मन बिच ए मत बोलदा कि मसीह जो दुनिया बिच थल्ले लाणे तांइ स्वर्ग पर कुसने चढ़णा,

⁷ या मसीह जो मुर्देयां बिच का जिन्दा करणे तांइ, थल्ले पताल बिच कुसने उतरणा?”

⁸ पर ए लिख्खे गे रा है, “परमेश्वर रा संदेश, तुसा रे नेड़े है, तुसा इस बसेख जो अपणी जुबान कने मन्नी सकदे, जे तुसा रे दिल बिच है” मतलब कि, ए परमेश्वर बिच विश्वास करणे रा से बसेख है, जिसेरा असी प्रचार करदे।

⁹ जे अगर कोई भी मणू सारेयां सामणे, अपणे दिल कने यीशु जो प्रभु मन्नी लै, ते अपणे मन बिच ए विश्वास करे कि परमेश्वर ने तिन्हा जो मुर्देयां बिच का जिन्दा कित्ता, तां परमेश्वर ने तिसजो तिसेरे पाप्पां का बचाणा।

¹⁰ किजोकी जां असी अपणे मन कने विश्वास करदे तां परमेश्वर असा जो धार्मिक ठैहरांदे, ते असी जिन्हा ने विश्वास कित्ते रा है, तिसजो अपणे मुँह कने मन्नी लैणे री वजह कने असी बचाए जाणे।

¹¹ यशायाह ने पवित्रशास्त्र बिच मसीह रे बारे बिच लिख्खे रा है, “जे कोई उस बिच विश्वास करदा तिसजो शर्मसार नी होणा पैणा।”

¹² किजोकी यहूदी ते गैर यहूदियां बिच कोई फरक नी है। किजोकी परमेश्वर सारेयां रे प्रभु हिन, ते जे तिन्हेरा नां लिंदा, से तिन्हा जो बचांदे।

¹³ किजोकी पवित्रशास्त्र बिच लिख्खे रा है, “हर इक्क मणू बचाया जाणा, जे परमेश्वर रा नां लिंदा।”

¹⁴ “पर इसका पैल्ले की मणू प्रभु रा नां लेई करी तिन्हा का मदद मंगी सके, तिन्हा जो प्रभु बिच विश्वास करणा जरुरी है; ते इसका पैल्ले कि से तिन्हा बिच विश्वास करी सके, तिन्हा जो प्रभु रे बारे बिच सुनणा जरुरी है, ते इसका पैल्ले कि से प्रभु रे बारे बिच सूणन, कुसकी जो तिन्हा लोक्कां जो प्रभु रे बारे बिच दसणा जरुरी है।”

¹⁵ ते इसका पैल्ले कि कोई तिन्हा जो प्रभु रे बारे बिच दस्से, कुसकी रा भेज्जेया जाणा जरुरी है। इधेरे तांइ पवित्रशास्त्र बिच लिख्खे रा है, “सुब बसेख लाणे वाले मणूआं रे पैर किन्ने छैल हिन।”

¹⁶ पर बड़े घट जणेया ने सुब बसेख पर विश्वास कित्ता। जिय्यां कि यशायाह भविष्यद्वक्ता ने पवित्रशास्त्र बिच बोल्ले रा है, “ओ प्रभु, बड़े घट लोक्कां ने असा रे बसेख पर विश्वास कित्ता।”

¹⁷ सुब बसेख जो सुनणे कने विश्वास हुंदा, अते सुब बसेख मसीह रे बारे बिच है।

¹⁸ पर मैं बोलदा कि इस्राएल रे लोक्कां ने मसीह रे बारे बिच बसेख सुणे रा ही है। जिय्यां कि पवित्रशास्त्र बिच लिख्खे रा है, “तिन्हेरा बसेख पूरी दुनिया बिच फैल्ली गेया, ते तिन्हेरा संदेश, दुनिया रे इक्क कुणे का दूज्जे का कुणे तिकर पूज्जी गेया।”

¹⁹ पर मैं ए बोलदा, कि ए सच है कि इस्राएल रे मणू मसीह रे सुब बसेख जो समजी गेरे हिन। जिय्यां कि प्रभु ने मूसा रे जरिये ए बोल्लेया, “मैं तुसा यहूदी लोक्कां जो, गैर यहूदियां तांइ अपणा प्यार दिखाई करी हिर्स कराणी। मैं बेवकूफ गैर यहूदियां रे जरिये तुसा रे गुस्से जो भड़काणा।”

²⁰ फिरी यशायाह ने बड़ी हिम्मत कने पवित्रशास्त्र बिच लिख्खेया कि परमेश्वर ने इय्यां बोल्लेया, “मेरे जो तिन्हा लोक्कां ने हासिल करी लित्तेया, जे मेरे जो तोप्पेया नी करदे थिये, मैं अप्पु जो तिन्हा लोक्कां पर ज़ाहिर कित्ता, जे मेरे बारे बिच पूच्छेया नी करदे थिये।”

²¹ पर इस्राएली लोक्कां रे बारे बिच परमेश्वर ने ए बोल्लेया, “मैं सारा दिन, मेरा हुकम ना मनणे वाले, ते मेरे खिलाफ रैह्णे वाले लोक्कां अग्गे तिन्हा जो फिरी अपणाई लैणे तांइ अपणे हत्थ फलाई रख्खे।”