प्रकाशित वाक्य 7 - चम्बयाली नौआ नियम

परमेश्वर रे सिंहासन रे सामणे अराधना इस्राएल रे इक्क लाख चुरताली हजार मणू

^1-2 इसेरे बाद मैं चार स्वर्गदूतां जो धरती रे चार कूणेयां पर खड़ित्ते रे दिख्खेया। तिन्हा जो परमेश्वर का ए हक मिल्ले रा थिया कि चाए धरती हो या समुंद्र, से महामारी कने धरती रे लोक्कां रा नुक्सान करे। तिन्हा ने धरती रे चारो कूणेयां का हवा जो बांद्द करी दित्तेया, ताकि धरती पर, जंगला बिच ते समुंद्र पर कोई हवा ना चली सके। ते फिरी मैं पूरब दिसा बिच इक्क होर स्वर्गदूत जो दिख्खेया। तिसजो हमेसा-हमेसा तिकर जीणे वाले परमेश्वर का इक्क मौहर मिल्ले री थी। तिस स्वर्गदूत ने बाकि रे चार स्वर्गदूतां जो जोर कने हक्क लाई करी ए बोल्लेया,

³ जां तांइ असा अपणे परमेश्वर रे भक्तां रे मत्थे पर मौहर नी लगाई दिंदे, तां तांइ धरती, समुन्द्र अते बूट्टेयां जो नुक्सान मत पूजांदे।

⁴ जां स्वर्गदूत निशानी लाई चुके, तां मैं कुसकी री अवाज सुणी कि, जिन्हा लोक्कां पर परमेश्वर री निशानी लग्गे री है, से गिनती बिच इक्क लाख्ख चुरताली हजार हिन। ए मणू इस्राएल देस री बारा जातियां रे हिन।

⁵ तिन्हा स्वर्गदूतां ने यहूदा रे बारा हजार गोत्रियां पर निशानी लाई, रुबेन रे बारा हजार गोत्रियां पर निशानी लाई

⁶ अशेर रे बारा हजार गोत्रियां पर निशानी लाई, नप्ताली रे बारा हजार गोत्रियां पर निशानी लाई, मनश्शिह रे बारा हजार गोत्रियां पर निशानी लाई,

⁷ शमौन रे बारा हजार गोत्रियां पर निशानी लाई, लेवी रे बारा हजार गोत्रियां पर निशानी लाई, इस्साकार रे बारा हजार गोत्रियां पर निशानी लाई,

⁸ जबूलून रे बारा हजार गोत्रियां पर निशानी लाई, यूसुफ रे बारा हजार गोत्रियां पर निशानी लाई, ते बिन्यामीन रे बारा हजार गोत्रियां पर निशानी लाई।

इक्क बड़ी बड्डी भीड़

⁹ इसेरे बाद मैं दिख्खेया की, हर इक्क जाति, कुल, देस, भाषा, ते लोक्कां री भीड़, जिस जो कोई गिणी नी सकदा थिया चिट्टे कपड़े पाये रे, अते अपणे हत्थां बिच खजूर री डालियां लेई करी सिंहासन अते उरणू रे सामणे खड़ित्ते री थी,

¹⁰ अते बड्डी ऊच्ची अवाज बिच हक्कां लांदी बोल्लेया करदी थी, सिंहासन पर बैठ्ठे रे असा रे परमेश्वर री तारीफ हो, ते “उरणू” री भी महिमा हो! तुसा रे जरिये ही छुटकारा मिलदा।

¹¹ अते से सारे स्वर्गदूत तिस सिंहासन, ते तिन्हा चार प्राणिया, ते चौब्बी बुजुर्गां रे चारो पास्से खड़ित्ते रे थिये। से सारे झुकी करी परमेश्वर री अराधना करी के बोलणा लग्गे,

¹² असी ए एलान करदे कि असा रे परमेश्वर महान, ताकतवर, महामहिम, ते समजदार हिन। आओ असी तिन्हेरी तारीफ ते महिमा हमेसा-हमेसा तिकर करदे रैह्ण, आमीन।

¹³ इसेरे बाद बुजुर्ग मणू बिच का इक्क ने मेरे जो पूच्छेया, तू इन्हा लोक्कां जो जाणदा जिन्हा ने चिट्टे चोग्गे पाए रे हिन? तू जाणदा कि ए मणू कुते का आए रे हिन?

¹⁴ मैं तिसजो जवाब दित्तेया, ओ मेरे स्वामी, मैं ता नी जाणदा तुसा ही जाणदे। तिसने मेरे जो बोल्लेया, ए मणू जिन्हा ने चिट्टे कपड़े पाए रे हिन, ए से ही मणू हिन जे तिस बड़े वरी मुसीबतां ते जुल्मां रे समय रे दौरान मरी गे थिये। ए से मणू हिन जिन्हा ने अप्पु जो “उरणू” री कुर्बानी रे जरिये सुच्चा कित्तेया।

¹⁵ इसी वजह कने ए परमेश्वर रे सिंहासन रे सामणे खड़ित्ते रे हिन, अते परमेश्वर रे मन्दिर बिच रात-दिन तिन्हेरी सेवा करदे, अते जे सिंहासन पर बैठ्ठे रे हिन, तिन्हा ने हमेसा तिन्हा लोक्कां कने रैह्णा ते तिन्हेरी रक्षा करणी।

¹⁶ तिन्हा फिरी कदी भूखे प्यासे नी होणा, तिन्हा ने फिर कदी सूरज कने नी फुकीणा, ते ना ही तिन्हा कड़ाके री धूप बिच तपिणा।

¹⁷ किजोकी उरणू जे सिंहासन रे मझाटे है, तिन्हा ने तिन्हा लोक्कां री इदेइ रखवाली करणी जिय्यां कोई पुहाल अपणी भेड़ां री करदा। परमेश्वर ने तिन्हा लोक्कां जो से ताजा पाणी पुआणे तांइ अपणे कने लेई करी जाणा जिस कने जिन्दगी मिलदी, ते परमेश्वर ने तिन्हा लोक्कां री हाख्खियां का सारे आँसु पूंजी दैणे।