प्रकाशित वाक्य 5 - चम्बयाली नौआ नियम

सत्त मौहरां कने इक्क कताब मौहर लग्गे री कताब ते छेलू

¹ फिरी मैं दिख्खेया कि जे सिंहासन पर बैठे रा थिया, तिन्हेरे सज्जे हत्थ बिच इक्क कताब थी, तिस पर दोन्नों पास्से लिखित्ते रा थिया, अते से सत्त मौहर लगाई करी बांद्द कित्ते री थी।

² फिरी मैं इक्क ताकतवर स्वर्गदूत जो दिख्खेया, जे ऊच्ची अवाज बिच ए एलान करेया करदा थिया कि इस कताब जो खोलणे अते इसेरी सत्त मौहरे तोड़ने रे लायक कुण है?

³ पर स्वर्ग बिच या धरती बिच या पताल बिच कोई भी इदेया नी थिया जे इस कताब जो खोलणे अते तिस बिच लिख्खे री गल्ल जो पढ़ने रे लायक हो।

⁴ अते मैं बड़े बुरे जोरे-जोरे रोणा लग्गेया, किजोकी तिस कताब रे खोलणे, या तिस बिच लिख्खे री गल्ल जो पढ़ने लायक कोई नी मिल्लेया।

⁵ तां तिन्हा बुजुर्ग लोक्कां बिच का इक्क ने मेरे जो बोल्लेया, मत रोआं, दिख्ख, से शेर, यहूदा रे ‍खानदान रा ताकतवर राज्जा, दाऊद राज्जे रे वंशज ने शैतान जो हराई दित्ते रा! इधेरे तांइ से इस कताब री मौहर जो खोलणे ते तिस बिच लिख्खे री गल्ल जो पढ़ने रे काबिल है।

⁶ तां मैं तिस सिहांसन रे सामणे ते तिन्हा चार जींद्दे प्राणियां ते चौब्बी बुजुर्गां रे बिच मझाटे इक्क उरणू जो खड़ित्ते रे दिख्खेया। तिस उरणू पर कुर्बानी रे निसान थिये। तिसेरे सत्त सींग अते सत्त आख्खियां थी, ए परमेश्वर री सत्त आत्‍मा हिन, जिन्हा जो पूरी धरती बिच भेज्जेया गेया थिया।

⁷ फिरी परमेश्वर रा उरणू अग्गे आया ते जे सिंहासन पर बैठे रा थिया, तिसेरे सज्जे हत्थ का से कताब लेई लित्ती।

⁸ जां तिसने कताब लेई लित्ती तां से चारो प्राणी अते चौबी बुजुर्ग मणू तिस उरणू रे सामणे झुकी गे, अते हर इक्क बुजुर्ग रे हत्थां बिच वीणा ते धूप कने भरित्ते रे सोन्ने रे बणे रे डोंगे थिये, जे परमेश्वर री सेवा करणे वाले पवित्र मणूआं री प्रार्थना जो दर्शांदा थिया।

⁹ से इक्क नौआ गाणा गाणे लगे, “तू इस कताब री मौहरे खोलणे रे तिस बिच लिख्खे री गल्लां जो पढ़ने रे लायक है, किजोकी तू मारेया गेया थिया ते तैं अपणे खून कने हर इक्क कुल, देस, भाषा, ते लोक्कां जो परमेश्वर तांइ खरीदी लित्तेया।”

¹⁰ तू तिन्हा जो इदेय मणूआं बिच बदली दित्ता जिन्हा पर परमेश्वर राज करदे, ते तिन्हा जो पुरोत्त बणाई दित्ता जे परमेश्वर री सेवा करदे, ते तिन्हा लोक्कां ने धरती पर राज करणा।

¹¹ जां मैं फिरी दिख्खेया, तां मैं चाणचक्के ही लख्खों-लख्खों स्वर्गदूतां री अवाज सूणी, तिन्हेरी कोई गिनती नी होई सकदी थी। से सारे राज्जे रे सिहांसन, तिन्हा चार जींद्दे प्राणियां, ते चौब्बी बुजुर्गां रे चारो पास्से खड़ित्ते रे थिये।

¹² अते से ऊँची अवाज बिच गाया करदे थिये, “से उरणू जे कुर्बान कित्तेया गेया थिया, से महिमा रे लायक है। तिन्हेरा हक बड़ा उच्चा है। तिन्हेरा ज्ञान बड़ा गहरा है। से बड़े जादा ताकतवर ते अमीर हिन। असी तिन्हेरी इज्जत करण, असी तिन्हेरा आदरमान करण, असी तिन्हेरी तारीफ करण।”

¹³ फिरी मैं स्वर्ग, धरती, पताल ते समुंद्र बिच परमेश्वर री बणाए री हर इक्क चीज जो ए बोलदे सूणेया, “आओ असी तिन्हेरी अराधना करण जे सिहांसन पर बैठ्ठे रे हिन। असी उरणू री तारीफ करण। आओ असी हमेसा तिन्हेरी इज्जत ते आदरमान करण, किजोकी से सारेया का जादा ताकतवर हिन।”

¹⁴ अते चारो जिऊंदे प्राणियां ने आमीन बोल्लेया, अते बुजुर्ग लोक्कां ने झुकी करी तिन्हेरी अराधना कित्ती।