प्रकाशित वाक्य 3 - चम्बयाली नौआ नियम

सरदीस सहर री कलीसिया जो बसेख

¹ तिनिये मेरे जो बोल्लेया, “सरदीस सहर रे कलीसिया रे स्वर्गदूत जो ए चीठ्ठी लिख्ख, मैं अपणे सज्जे हत्थ बिच सत्त तारेयां जो थाम्मि करी रख्खे रा है, ते मैं ही तिन्हा सत्त दियां रे धूपदान रे बिच-मझाट्टे घूमदा-फिरदा। मैं तुसा जो ए बोलदा, मैं तेरे कम्मां जो जाणदा। दिखणे बिच ता तू मेरा भरोस्सेमंद विश्वासी लगदा पर अवे तू मेरे कहे मुताबिक नी चलदा।

² मैं जाणदा कि इक्क विश्वासी होणे रे तौर पर तुसा री जिन्दगी रा स्तर तिस जगाह् पर नी है जे परमेश्वर ने ठैहराए रा है, इधेरे तांइ चुकन्ने होई जाओ ते अपणी आत्मिक निंद्दर का उठी हो, ते अपणी मसीही खुबियां जो तिन्हेरे मुकणे का पैल्ले फिरी नौए जदेया करी लेयो जे तुसा बिच हल्ले भी हिन। मैं जाणदा कि तेरी घटी बड़ी जादा है किजोकी परमेश्वर तेरे कम्मां का खुस नी हिन।

³ तिन्हा शिक्षां जो याद करो जे तुसा ने लम्बे समय पैल्ले सुणी ते मन्नी थी। जे गल्लां तुसा जो सिखाई गे थी, तिन्हेरे मुताबिक चलो, अपणी लापरवाही का तौबा करो। जे अगर तुसा अपणी लापरवाही का बाज नी आए, तां मैं कुसकी चोर सांई चाणचक्के ही आणा, ते तुसा जो तिस बेल्ले रा पता भी नी चलणा जां मैं अचानक ही तुसा जो सजा दैणे तांइ आई जाणा।

⁴ पर सरदीस सहर बिच तुसा लोक्कां बिच किच्‍छ इदेय मणू भी हिन जे पाप कने भिठ्ठे नी होए रे हिन। तिन्हा ने मेरे कने चिट्टे कपड़े पाई करी चलणा, किजोकी से मणू इसेरे काबिल हिन।

⁵ जिन्हा लोक्कां ने दुष्ट पर जीत हासिल करणी, तिन्हा जो मैं इसी तरिक्के कने चिट्टे कपड़े पुआणे। मैं तिस कताब का तिन्हा लोक्कां रे नां नी कटणे जिस कताब बिच से नां लिख्खे गेरे हिन जिन्हा जो हमेसा री जिन्दगी मिलणी। मैं अपणे पिता ते परमेश्वर, ते सारे स्वर्गदूतां रे सामणे ए एलान करणा कि से मणू मेरे हिन।

⁶ जे सुनणा चाए, से ध्यान कने सुणे कि पवित्रात्मा कलीसिया कने कै बोलदा।”

फिलदिलफिया सहर री कलीसिया जो बसेख

⁷ तिनिये मेरे जो बोल्लेया, “फिलदिलफिया सहर रे कलीसिया रे स्वर्गदूत जो ए चीठ्ठी लिख्ख, मैं ही से पवित्र ते सच्चाई है, जिस का से चाब्बी है जे दाऊद राज्जे का थी। जां मैं चाब्बी लेई करी दुआर खोलदा, तां तिसजो कोई भी बांद्द नी करी सकदा, ते जां मैं चाब्बी लेई करी कोई दुआर बांद्द करदा, तां कोई तिसजो खोल्ली नी सकदा। मैं तेरे जो ए बोलदा,

⁸ मैं तेरे कम्मां जो जाणदा, सुण, मैं जाणदा कि तेरे का बड़ी घट ताकत है, पर तू फिरी भी मेरी गल्लां रे मुताबिक चलेया, ते तू मेरे पर विश्वास करणे का कदी नी मुकरेया। इधेरे तांइ मैं तेरे तांइ इक्क दुआर जदेया खोल्ली दित्ते रा है जिस जो कोई भी बांद्द नी करी सकदा।

⁹ सुणो, तुसा बिच मझाटे किच्‍छ शैतान रे गुट रे मणू हिन जे यहूदी होणे रा दावा ता करदे पर से हकीकत बिच यहूदी नी हिन ते से झूठ बोल्लेया करदे हिन। मैं तिन्हा लोक्कां जो तुसा रे पैरां पर पैणे तांइ मजबूर करी दैणा ते तिन्हा ने जाणी लैणा कि मैं तुसा कने प्यार करदा।

¹⁰ इधेरे तांइ तुसा ने सबर कने जुल्मां जो सैह्णे रा मेरा हुकम मन्नेया। तिस वजह कने, मैं तुसा जो परिक्षा रे समय बिच बचाणा। ए परिक्षा रा समय दुनिया रे हर इन्सान री जिन्दगी बिच आणा।

¹¹ इधेरे तांइ, तुसा जो मेरे पर मजबूती कने विश्वास करदे होए सबर कने जुल्म सहणा जारी रखणा चाएदा, ताकि कोई तुसा जो तुसा रा ईनाम पाणे का ना रोक्की सके।

¹² जिन्हा लोक्कां ने दुष्ट पर जीत हासिल करणी, तिन्हा लोक्कां ने परमेश्वर रे मन्दिर रे खम्भे सांई होणा जिन्हेरी मैं अराधना करदा, ते तिन्हा जो से जगाह् भी छडणी नी पैणी। ए दिखाणे तांइ कि से मणू मेरे हिन मैं तिन्हा पर परमेश्वर रा नां ते परमेश्वर रे सहर यरुशलेम रा नां री छाप लाणी। तिस सहर ने परमेश्वर रे पास्से स्वर्ग का उतरणा। मैं तिन्हा पर इक्क नौए नां री छाप लाणी।

¹³ जे सुनणा चाए, से ध्यान कने सुणे कि पवित्रात्मा कलीसिया कने कै बोलदा।”

लौदीकिया सहर री कलीसिया जो बसेख

¹⁴ तिनिये मेरे जो फिरी बोल्लेया, “लौदीकिया रे सहर रे कलीसिया रे स्वर्गदूत जो ए चीठ्ठी लिख्ख, मैं आमीन है, किजोकी मैं भरोस्सेमंद है, ते मैं इस गल्ल जो साबित करदा कि परमेश्वर सच है। जे किच्‍छ भी परमेश्वर ने बणाए रा है मैं तिसेरा जरिया है। मैं तुसा जो ए बोलदा,

¹⁵ मैं तेरे कम्मां जो जाणदा। तू तिस पाणी सांई है जे ना ता ठंडा है, ते ना ही गर्म है। खरा हुन्दा कि जे अगर तू मेरे कहे मुताबिक चले ता पूरे तरिक्के कने चले, या ता बिल्कुल भी ना चले।

¹⁶ किजोकी मेरे पर तेरा विश्वास कोस्से पाणी जदेया है, इधेरे तांइ मैं तेरे जो ठुकराई दिंदा।

¹⁷ तेरे जो लगदा कि तू बड़ा अमीर है किजोकी तेरे का अपणी जरुरत री हर इक्क चीज है, पर तू ए नी जाणदा कि तू बड़ा अभाग्गा है। किजोकी सच्चाई ए है कि तू गरीब है, तेरे पाणे तांइ कपड़े नी हिन ते तू अह्ना है।

¹⁸ इधेरे तांइ मैं तेरे जो सलाह दिंदा कि तू मेरे का सोन्ना खरीदी लै ताकि तू हकीकत बिच अमीर बणी जाए। तू मेरे का चिट्टे कपड़े भी खरीदी लै ताकि तू लोक्कां सामणे नंगे होणे री कने शर्मसार होणे का बची जाए। तेरे जो अपणी हाख्खियां बिच पाणे तांइ किच्‍छ दवाई भी खरीदी लैणी चाएदी ताकि तू दिख्खी सके।

¹⁹ किजोकी मैं जिस कने प्यार करदा, तिसजो सुधारदा भी, ते जिस जो औलाद सांई मनदा, तिसजो कोड़े भी लादां ताकि से पाप रे कम्म करणा छड्डी दे।

²⁰ सुण, मैं कुसकी मणू सांई है जे तुसा रे दुआर पर खड़ी करी खोलणे तांइ खटखटाया करदा हो। जे अगर कोई मेरी अवाज सुणी करी दुआर खोल्ली दे, तां मैं अंदर जाई करी तिस कने रोट्टी खाणी।

²¹ जिन्हा लोक्कां ने दुष्ट पर जीत हासिल करणी, तिन्हा जो मैं अपणे कने सिंहासन पर बैठाणा, जिय्यां मैं भी दुष्ट जो हराई करी अपणे पिता कने तिन्हेरे सिंहासन पर बेई गेया।

²² जे सुनणा चाए, से ध्यान कने सुणे कि पवित्रात्मा कलीसिया कने कै बोलदा।”