प्रकाशित वाक्य 22 - चम्बयाली नौआ नियम1 तां मेरे जो स्वर्गदूत ने से पाणी दिखाया जे हमेसा री जिन्दगी दैणे वाला पाणी केहलांदा, ते से पाणी सीसा सांई साफ थिया। ते तिस पाणी रा जरिया परमेश्वर रा सिंहासन है जे उरणू रा भी सिंहासन है। 2 नदी सहर रे बिचो-बिच बैहंदी थी, ते तिस नदी रे दोन्नों किनारे पास्से बूट्टे लग्गे रे थिये जे जिन्दगी दिंदे थिये। तदेय बूट्टेयां पर बारा किस्मां रे फल्ल लगदे थिये, ते हर महिन्ने तिन्हा बूट्टेयां पर नौए किस्म रे फल्ल लगदे थिये, ते तिन्हा बूट्टेयां रे पत्ते दवाई सांई थिये जे देस-देस रे रैह्णे वाले मणूआं री बीमारी जो ठीक करी सकदे। 3 तिस सहर बिच रैह्णे वाले लोक्कां पर परमेश्वर रा श्राप नी रैह्णा, ते परमेश्वर रा सिंहासन ते उरणू ने अप्पु भी तिस सहर बिच होणा, ते परमेश्वर रे सेवादार मणूआं ने तिन्हेरी सेवा करणी। 4 तिन्हा ने परमेश्वर जो आमणे-सामणे दिखणा, ते परमेश्वर रा नां तिन्हेरे मात्थेयां पर लिख्खे रा होणा। 5 फिरी कदी रात नी होणी, ते सहर रे लोक्कां जो रौसनी तांइ दीये या सूरज री जरुरत नी पैणी, किजोकी परमेश्वर ने अप्पु ही तिन्हा बिच चमकणा। तिन्हा ने राज्जे सांई हमेसा-हमेसा राज करणा। यीशु मसीह रा जल्दी वापिस आणा यीशु मसीह रा दोबारा आणा 6 तिसका बाद, इक्क स्वर्गदूत ने मेरे जो बोल्लेया, “से सारी गल्लां सच हिन ते बड़े झट होणे वाली हिन। प्रभु परमेश्वर जे अपणी आत्मा सारे भविष्यद्वक्ता जो दिंदे, तिन्हा ने अपणे स्वर्गदूत जो इत्ते आई करी अपणे सेवादार जो ए दसणे रा हुकम दित्तेया कि जल्द ही कै होणे वाला है।” 7 यीशु ने बोल्लेया, सुणो, मैं तौले आणे वाला है! धन्न हिन से मणू जे इस कताब री भविष्यवाणियां जो मनदे। 8 मैं से ही यूहन्ना है, जेड़ा इन्हा गल्लां जो सूणदा ते दिखदा थिया जां मैं दिख्खेया ते सूणेया, तां जे स्वर्गदूत मेरे जो ही गल्लां दसदा थिया, मैं तिसजो प्रणाम करणे तांइ झुकी गेया, 9 पर तिनिए मेरे जो बोल्लेया, दिख, इय्यां मत कर किजोकी मैं तेरा, ते तेरे भ्याल भविष्यद्वक्ता, ते इस कताब री गल्लां जो मनणे वालेयां रा सोग्गी दास है परमेश्वर जो ही प्रणाम करेयां 10 फिरी तिनिए मेरे जो बोल्लेया, इस कताब री भविष्यवाणी री गल्लां जो लोक्कां का मत लूका, किजोकी इन्हा गल्लां रे पूरे होणे रा बेल्ला नेड़े आई गे रा है। 11 जे मणू बुरे ते भिठ्ठे कम्म करदे, से मणू बुरे ते भिठ्ठे कम्म करदे रैह्ण। बिल्कुल तिस्सी तरिक्के कने जे मणू ठीक ते पवित्र कम्म करदे, से मणू ठीक पवित्र कम्म करदे रैह्ण। 12 तां फिरी मसीह यीशु ने बोल्लेया, सुणो, मैं झट ही आणे वाला है। मैं हर इक्क मणू जो तिन्हेरे कम्मां रे हिसाब कने फल्ल दैणा। 13 तां फिरी प्रभु ने बोल्लेया, मैं अल्फा ते ओमेगा है, जिसेरा मतलब है कि मैं सुरुआत ते आखिर है। 14 धन्न है से, जे अपणे चोग्गे धोई लिंदे, किजोकी तिन्हा जो सहर रे दुआर का अंदर आणे रा हक दित्तेया जाणा। ते तिन्हा जो तिस बूट्टे रा फल्ल खाणे रा भी हक दित्तेया जाणा जिस जो खाणे कने हमेसा री जिन्दगी मिलदी। 15 बाहर कूत्ते, जादू-टौणे करणे वाले, अश्लील मणू, हत्यारे, मूर्तां री पूजा करणे वाले ते झूठ बोलणे वाले होणे। से कदी भी सहर बिच नी आई सकदे। 16 मैं यीशु है! ते मैं ही अपणे स्वर्गदूत जो तुसा जो कलीसिया तिकर ए गल्लां दसणे तांइ भेज्जेया। मैं दाऊद राज्जे रा महान वंशज है, ते मैं ही भ्याग्गे रा सितारा है। 17 पवित्रात्मा ते उरणू री नौई लाड़ी यीशु जो बोलदे, “तुसां रा आणा जरुरी है।” हर बसेख जो सुनणे वाले हर इक्क मणू जो बोलणा जरुरी है, “आ!” जे कोई भी प्यासा है से जरुर आए ते तिस पाणी जो अपणाए जिस कने मुफ्त बिच जिन्दगी मिलदी। चितौणी 18 मैं यूहन्ना, इस कताब बिच लिख्खे रे बसेख बिच होणे वाली घटना जो सुनणे वाले हर इक्क मणू जो खबरदार करदा जे अब्बे ते भविष्य बिच होया करदी हिन। जे अगर कोई मणू इस बसेख री गल्लां बिच किच्छ बधाई दे, तां परमेश्वर ने तिसेरी सजा भी बधाई दैणी। तिन्हा ने तिसजो तिन्हा महामरियां कने सजा दैणी जे मैं इस कताब बिच दस्से री हिन। 19 जे अगर कोई मणू इस कताब बिच लिख्खे री भविष्यवाणियां बिच का किच्छ घटाई भी दे, तां परमेश्वर ने भी तिसका तिस बूट्टे रे फल्ल खाणे रा हक लेई लैणा जिस जो खाणे कने हमेसा री जिन्दगी मिलदी, ते तिस सहर बिच बसणे रा हक भी छिन्नी लैणा जिसेरे बारे बिच इस कताब बिच लिख्खे रा है। 20 ए तिसेरे शब्द हिन जे इस कताब बिच दस्से री गल्लां री गवाई दिंदा, से ए बोलदा, हाँ, मैं तौले ही आणे वाला है! मुझ यूहन्ना ने जवाब दित्ता, आमीन! ओ प्रभु यीशु, आओ! 21 मैं प्रार्थना करदा कि प्रभु यीशु परमेश्वर रे लोक्कां पर अनुग्रह करण। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.