प्रकाशित वाक्य 20 - चम्बयाली नौआ नियम

हजार साल्लां रा राज

¹ “फिरी मैं इक्क स्वर्गदूत जो स्वर्ग का उतरदे दिख्खेया, जिसेरे हत्थ बिच पताल री चाब्बी ते इक्क बड्डी जजींर थी।

^2-3 तिसने अजगर जो पकड़ेया जे पैल्ले कीड़े रे रुप बिच भी जाहिर होया थिया, ते जिस जो शैतान भी बोलदे। तिस स्वर्गदूत ने तिसजो झंझिरां बिच बन्नेया तिसजो पताल बिच कैद करी दित्तेया। तिसजो कैद बिच पाणे का बाद तिसने दुआर पर निशानी लाई दित्ती ताकि तिसका बाहर आणे तांइ रस्ता ना रे, इधेरे तांइ हजार साल्लां तांइ तिसका देस-देस रे लोक्कां जो भटकाणे रा कोई रस्ता नी रेया। जां से समय मुकी जाए, तां से अजाद कित्तेया जाए, पर सिर्फ थोड़े समय तांइ।”

⁴ फिरी मैं सिहांसन दिख्खे, ते तिन्हा पर मणू बेई गे, ते तिन्हा जो इंसाफ करणे रा हक्क दित्तेया गेया, मैं तिन्हा री आत्‍मा जो भी दिख्खेया, जिन्हेरे सिर यीशु री ग्वाही दैणे ते परमेश्वर रे वचन रे वजह कने कटी दित्ते गे, ते जिन्हा ने ना तिस ड्रोणे जानवर री ते तिसेरी मूर्ति री पूजा कित्ती थी, ते ना तिसेरी छाप अपणे मत्थे ते हत्थां पर लित्ती थी, से जिन्दे होई करी मसीह यीशु कने हजार साल्लां तिकर राज करदे रेय।

^5-6 से पैल्ले मणू होणे जिन्हा जो मुर्देयां बिच का फिरी जिन्दा कित्तेया जाणा, ते से मणू खास-तौर पर धन्न ते पवित्र हिन। दुई मौत रा तिन्हा पर कोई हक नी है। तिन्हा ने परमेश्वर ते मसीह रे पुरोत्त बणना ते हजार साल्लां तिकर तिन्हा कने राज करणा। होर कोई मरे रा मणू हजार साल्लां तांइ जिन्दा नी कित्तेया जाणा।

शैतान रा खातमा होणा

^7-8 जां हजार साल पूरे होई जाणे तां शैतान कैद का छड्डी दित्तेया जाणा। तिनिए तिन्हा जातियां जो जे धरती रे चारो पास्से होणी, मतलब गोग ते मागोग जो जिन्हेरी गिनती समुंदर री रेत जिन्नी होणी, भड़काई करी लड़ाई करणे तांइ कठ्ठा करणे जो निकलणा।

⁹ तिस सैना ने सारी धरती पर फैल्ली करी परमेश्वर रे लोक्कां री छावनी ते प्यारे सहर जो घेरी लैणा ते आग्ग ने स्वर्ग का उतरी करी तिन्हेरे जो फुक्की दैणा।

¹⁰ तिन्हेरा भड़काणे वाला शैतान आग्ग ते गधंक री तिस झील बिच जिसेरे बिच से ड्रोणे जानवर ते झूठ्ठा भविष्यद्वक्ता भी होणा पाई दित्ते जाणा: ते से रात-दिन हमेसा-हमेसा तिकर तड़पदे रैह्णा।

आखरी हिसाब-किताब बड्डा चिट्टा सिंहासन ते आखरी इन्साफ

¹¹ फिरी मैं इक्क बड्डा सफेद सिहांसन ते तिसजो, जे तिस पर बैठ्ठा रा है, तिसेरे सामणे का धरती ते आसमान नस्सी गे, ते तिन्हेरे तांइ जगाह् नी मिल्ली।

^12-13 फिरी मैं मरे रे लोक्कां जो दिख्खेया, मैं खास ते आम लोक्कां जो तिस सिंहासन रे सामणे खड़ित्ते रे दिख्खेया। जिन्ने भी मणू समुंदर बिच डूब्बी करी मरे थिये, जिन्ने भी मणू तिस जगाह् बिच थिये जित्ते मरे रे मणू रैह्‍न्दे, से सारे तिस सिंहासन रे सामणे खड़ित्ते रे थिये। तिस कताब जो खोल्लेया गेया जिस बिच तिन्हा लोक्कां रे नां लिख्खे गेरे थिये जिन्हा जो कदी ना मुकणे वाली जिन्दगी थी। से कताब भी खोल्ली गयी जिस बिच लोक्कां रे कित्ते रे कम्म लिखित्ते रे थिये, ते हर इक्क जणे का तिन्हेरे कित्ते रे कम्मां रा हिसाब-किताब लित्तेया गेया।

^14-15 जिन्ने भी लोक्कां रे नां तिस जिन्दगी री कताब बिच नी लिख्खे गेरे थिये, तिन्हा जो आग्ग रे समुंदर बिच सूटी दित्तेया गेया। तिसेरे बाद, अग्गे जो मौत नी रेई, पताल, किजोकी जिन्हा लोक्कां रे नां तिस जिन्दगी री कताब बिच लिख्खे गेरे थिये, तिन्हा जो आग्ग रे समुंदर बिच सूटी दित्तेया गेया। तिसजो ही दुई मौत बोल्लेया जांदा, आग्ग रे समुंदर बिच सजा मिलणा।